Daudi na Goliasi

Yahwe akagambira Samuiri ngu: ‘Genda omu ka ya Yese. Omu ha baana be nuwe arukugenda kuba mukama wa Isareri arukuhonderaho.’ Samuiri akagenda omu ka ya Yese. Obu yarozere mutabani wa Yese omukuru, akaijwamu ekitekerezo ekirukugamba kiti: ‘Mpaka onu nuwe Yahwe akomeremu kuba mukama.’ Baitu Yahwe akagambira Samuiri ngu tali nuwe. Yahwe akamugambira ati: ‘Nyowe tindora okusisana kw’omuntu okwaharuguru baitu ndora n’ekiri omu mutima gwe.’

Yese akaletera Samuiri batabani be bandi mukaaga. Baitu Samuiri akamugambira ati: ‘Busaho Yahwe ow’akomere omuli banu boona. Oine abatabani bandi?’ Yese akamugarukamu ngu: ‘Hasigaireyo Daudi, macura wange. Agenzere kuliisa entaama.’ Daudi obu bamulesere, Yahwe akagambira Samuiri ati: ‘Nuwe onu ou nkomere!’ Samuiri akasesa amagita ha mutwe gwa Daudi, ekikaba nikyoleka ngu akaba n’agenda kufooka mukama wa Isareri ow’akuhonderaho.

Hakarabaho akasumi, Abaisareri bagenda kurwanisa Abafirisiti, kandi Abafirisiti banu bakaba baine omurwani nyamugundu kandi ow’amaani maingi ayayetwaga Goliasi. Buli kiro, Goliasi yajumaga Abaisareri kandi yatokaga n’agamba ati: ‘Mukomeyo omusaija arandwanisa. Obwaransingura, turafooka bairu banyu. Baitu obundamusingura, nimwija kufooka bairu baitu.’

Daudi akaba aletiire bagenzi be eby’okulya nambere bakaba bataire orukande habwokuba bakaba bali baserikale omu ihe lya Isareri. Obu yahuliire Goliasi ebi yagambire, akagamba ati: ‘Ninyija kumurwanisa!’ Baitu Omukama Saulo akamugambira ati: ‘Baitu iwe okyali musigazi.’ Daudi yamugarukamu ati: ‘Yahwe n’aija kunkonyera.’

Saulo akaihayo ebijwaro bye ebi yakozesaga omu bulemu yabiha Daudi baitu Daudi yamugambira ati: ‘Tinsobora kurwanira omu by’okujwara binu.’ Kandi Daudi akatunga omwesuuso gwe yagenda ha kyambu, yakoma obubaale obwekulingiriire kurungi, yabuta omu kasaho. Daudi akatandika kwiruka nagenda nambere Goliasi akaba ali. Ekisaija kinu ekikooto kikagamba kiti: ‘Ija hanu kasigazi iwe. Ninyija kuha omurambo gwawe hali ebinyonyi n’ebisoro by’omu kisaka bigulye.’ Baitu Daudi atatiine. Nauwe akatoka yamugarukamu ati: ‘Oizire oine empirima n’icumu, baitu nyowe nyizire omu ibara lya Yahwe. Torukurwanisa itwe baitu norwanisa Ruhanga. Kiro kinu abantu banu boona nibaija kurora ngu Yahwe n’akira empirima n’icumu amaani. Inywena n’aija kubahayo omu mikono yaitu.’

Daudi akata ibaale omu mwesuuso gwe yalizigisa kandi yalihungura n’amaani ge goona. Yahwe akamukonyera, ibaale lyatera Goliasi ha buso lyataaha omu mutwe gwe munda. Omusaija ow’akaba ali mukooto muno akagwa hansi yafa. Abafirisiti obu bakirozere bakatiina kandi bairuka. Naiwe noyesiga Yahwe nk’oku Daudi yamwesigire?