Omukazi Abaza na Yesu ha Iziba

Hanyuma y’Okuhingurwaho, Yesu hamu n’abegeswa be bakaraba Samaliya obu bakaba nibagaruka Galiraya. Yesu obwakaba ali haihi kuhika ha rubuga Sukura, akemerra ha kicweka ekirukwetwa iziba lya Yakobo. Obwakaba ahumwireho, abegeswa be bakagenda omu rubuga kugura eby’okulya.

Omukazi akaija ha iziba kutaha amaizi. Yesu akamugambira ati: Mpaho amaizi ag’okunywa. Omukazi akamugarukamu ati: ‘Habwaki nobaza nanyowe? Ndi mukazi Musamaliya. Abayudaaya tibabaza n’Abasamaliya.’ Yesu akamugarukamu ati: ‘Kakuba obaire ommanyire, wakunsabire amaizi kandi nakukuhaire amaizi ag’obwomeezi.’ Omukazi akamukaguza ati: ‘Nomanyisa ki? Toine eky’okukozesa kutaha.’ Yesu akamugambira ati: ‘Ogu wena anyakunywa ha maizi ganu, taligaruka kukwatwa iroho.’ Omukazi akamugambira ati: ‘Waitu, mpa amaizi ago.’

Yesu akamugarukamu ati: ‘Genda oyete baro aije hanu.’ Omukazi akamugambira ati: ‘Tinyine iba nyowe.’ Yesu amugarukamu ati: ‘Obalize amananu. Okaswerwa emirundi etaano, kandi hati omusaija ow’orukwikara nauwe tali baro.’ Omukazi akagamba ati: ‘Mali oli nabbi. Itwe turamiza ha rusozi runu, baitu Abayudaaya bagamba ngu tusemeriire kuramiza omu Yerusalemu honka. Ninkigumya ngu Masiya obwaliija alitugambira omulingo tusemeriire kuramyamu.’ Yesu akamugambira ekintu eky’akaba atakagambiraga muntu wena. Akamugambira ati: ‘Ninyowe Masiya.’

Omukazi akairuka yagenda omu rubuga yagambira Abasamaliya ati: ‘Nikizooka mboine Masiya. Amanyire byona ebirukunkwataho. Mwije murole!’ Bakamuhondera bagenda ha iziba kandi bahuliriza Yesu eby’akaba n’ayegesa.

Abasamaliya bakaraaliza Yesu kwija kwikara omu rubuga rwabo. Akamara ebiro bibiri nabegesa kandi baingi bakamwikiririzaamu. Bakagambira omukazi Omusamaliya bati: ‘Hanyuma y’okuhuliiriza omusaija onu, hati tumanyire ngu nuwe mujuni w’ensi.’