Yesu Akoma Abakwenda Ikumi na Babiri

Yesu obwakaba amazire omwaka gumu n’ekicweka natebeza, akaba aine encwamu ey’amaani ey’okukora. Nibaha abayakukomere kukora nauwe? Nibaha abayakutendekere kwebembera ekitebe Ekikristaayo? Kusobora kukora encwamu zinu, Yesu akaba aine kutunga obuhabuzi bwa Yahwe. Akagenda wenka ha rusozi yaraara n’asaba. Obubwakiire, Yesu aketa bamu h’abegeswa be kandi yakomamu abakwenda 12. Noijuka amabara gaabo? Amabara gaabo gakaba Petero, Andereya, Yakobo,Yohana, Firipo, Batolomayo, Tomasi, Matayo, Yakobo omwana wa Alifayo, Sadayo, Simoni, hamu na Yuda Isikalyota.

Banu ikumi na babiri nubo bakugenzerege nauwe kutebeza. Hanyuma y’okubatendeka, akabatuma bagende batebeze bonka. Yahwe akabaha amaani ag’okusobora kubinga abadaimoni n’okukiza abarwaire.

Yesu aketa abakwenda banu banywani be kandi yabesigaga. Abafalisayo batekerezaaga ngu abakwenda tibasomere kandi bantu ba buli kiro. Baitu Yesu akabatendeka kusobora kukora omulimo ogu. Bakaba nibaija n’okwikara na Yesu omu busumi obukuru omu bwomeezi bwe nk’omu kasumi obwakaba atakafiire, na hanyuma y’okuhumbuuka. Baingi h’abakwenda be Ikumi na babiri baali nibaruga Galiraya nka Yesu. Kandi bamu baali baswire.

Abakwenda baali bantu abatahikiriire kandi basobyaga. Obwire obumu bayanguhirizaaga kubaza kandi bakoraga encwamu ezitahikire. Kandi obumu tibagumisirizaaga. Haroho n’obu bakungaine nibarwanira obukuru. Baitu, baali basaija barungi abagonzaaga Yahwe. Kandi bakufookere musingi ogw’ekitebe Ekikristaayo hanyuma ya Yesu kugaruka omu iguru.