Paulo Atumwa Kugenda Roma

Paulo akamalirra orugendo rwe orwakasatu omu Yerusalemu. Kunu nuho bamukwatiire bamuta omu nkomo. Omu bwire bw’ekiro, Paulo akatunga okwolekwa nambere yarozere Yesu namugambira ati: ‘Noija kugenda Roma naho otebezeyo.’ Paulo bakamwiha omu Yerusalemu bamutwara Kaisaliya nambere yamazire emyaka ebiri omu nkomo. Obwakaba ali omu maiso g’Omulemi Fesito nacwerwa omusango, Paulo akagamba ati: ‘Ninsaba Kaisali owa Roma nuwe ancwere omusango.’ Fesito akamugarukamu ati: “Ojuliire Kaisali: Oligenda hali Kaisali.” Paulo bakamuta ha lyato erikaba nirigenda Roma, kandi Luka na Alisitako, bakagenda nauwe.

Obu bakaba bali omu nyanja, ihunga ly’amaani likatera kumara ebiro bingi. Bona bakatekereza ngu nibagenda kufa. Baitu Paulo akabagambira ati: ‘Bantu inywe, maraika angambirege ati omu kirooto: “Otatiina Paulo. Noija kuhika Roma, kandi bona abali ha lyato linu tibarukwija kufa.” Mugume! Titurukwija kufa.’

Ihunga likamara ebiro 14 niritera. Hanyuma, bakatandika kurora omwaro gw’ekizinga kya Merita. Elyato likatomera omusa lyacwekacweka, baitu busaho n’omu ha abantu 276 ayafiire. Abamu bakaziha kandi abandi bakwatiirra ebiti ebikaba nibiserera eby’acwekere ha lyato kuhika obu bahikire ha musa. Abantu ba Merita bakabafaho kandi babahembera omurro gw’okwota.

Obu harabireho ameezi asatu, abaserikale bakata Paulo ha lyato rindi bamutwara Roma. Obuyahikireyo, ab’oruganda bakaija kumurora. Obuyabarozere, akasiima Yahwe kandi yatunga obumanzi. Paulo nobwaraaba yali munyankomo, akaikirizibwa kwikara omu nju y’empangisa nalindwa abaserikale. Akamarayo emyaka ebiri. Abantu baijaga kumurora kandi yabatebezaga ebirukukwata ha Bukama bwa Ruhanga n’ebirukukwata hali Yesu. Kandi Paulo akahandikira ebitebe ebiri omu Asiya n’omu Buyudaaya. Mali Yahwe akakozesa Paulo kurarangya amakuru amarungi omu mahanga maingi.