ISOMO 7

Bihikire Kandi Nibinanura

Luka 1:3

EKY’OSEMERIIRE KUKORA: Kozesa obwakaiso oburukwesigwa kukonyera abarukukuhuliiriza kwetegereza.

Kozesa ebintu ebirukwesigwa. Eby’orabaza bisigikirre ha Kigambo kya Ruhanga kandi obukiraaba kisobokere somera kimu kuruga omu Baibuli. Obworaaba nogenda kubazaaho obwakaiso obukusigikirra ha sayansi, ebiri omu makuru, eby’abantu barabiremu, rundi obwakaiso obundi bwona, kigumye kara ngu eby’orakozesa nibyesigwa kandi bihikire.
Eby’orakozesa bikozese omu mulingo oguhikire. Soborra ebyahandiikirwe omu mulingo ogurukwikiraniza n’enkarra ezibyetoroire, obutumwa bwa Baibuli, hamu n’ebitabu kuruga hali “omwiru omwesigwa kandi ow’amagezi.” (Mat. 24:45, NW) Obworaaba nojuliza ebitabu ebindi ebitarukusigikirra ha Baibuli, rundi ebigambo eby’abantu abandi otongeramu ebyawe.

Otakihinguraniza kandi otongeramu ebyawe obworaaba n’obazaaho emihendo n’obwakaiso obugumiibwe. Wegendereze kurora ebigambo nka “abantu abamu” tibyafooka “abantu abakukira obwingi,” “obusumi obumu” tikyafooka “buli kasumi” kandi “obundi” tikyafooka “nikizooka.”
Soborra kurungi obwakaiso. Hanyuma y’okusoma ekyahandiikirwe rundi kujuliza ekintu ekindi, kaguza omu mulingo ogw’amagezi rundi kozesa ekyokurorraho kusobora kukonyera abarukukuhuliiriza kwetegereza.