Tinagendaga Hantu Hoona Ntaine Emundu Yange

OBWOMEEZI BWANGE OBWA KARA:

Nkazaalirwa kandi nakurra omu Rome, omu kiikaro ekikaba kirumu abanaku. Obwomeezi bwali butanguhire. Nkaba ntarukumanya nyina nyowe, kandi ntaine enkoragana enungi na ise nyowe. Nkakura ninyega ebiragiro by’abo abarukusabiriza ha nguudo.

Nambere nahikiize emyaka ikumi nkaba ntandikire kwiba. Ha myaka 12, nkairuka naruga omuka habw’omurundi gw’okubanza. Haroho akasumi ise nyowe obuyaijaga kuntabarra ha poliisi nangarra muka. Naikaraga ninkungana n’abantu, nagonzaaga kurwana kandi nkaba nkwatiirwe ensi yoona ekiniga. Obunahikize emyaka 14, nkarugira kimu omu ka. Nkatandika kukozesa ebitokooza bwongo n’okusabiiriza ha nguudo. Habwokuba nkaba ntaine ah’okuraara, nataahaga omu motoka z’abandi batakimanyire, nindaaramu hanyuma ninzinduka kara nindugamu. Kandi naserraga nambere hali ekisaaru nuho ninaabira.

Nkafooka omusuma koondo. Naibaga buli kimu otwaliiremu kusikaho abantu ensaho zaabo, n’okucwa amaju g’abantu ekiro. Nkatandika kwekorra ibara libi kandi hanyuma nkaraalizibwa kweteranizaaho ekitebe eky’abacwi b’ebiragiro ruranganwa, kandi kinu kikansobozesa kwongera ha bukugu bwange obw’okwiba natandika kucwa bbanka. Habwokuba nkaba ndi mukaali muno, bataahi bange bakanfoora omu h’abakuru. Tinagendaga hantu hoona ntaine emundu yange. Naraaraga nayo ha musago gwange. Kurwana, kukozesa ebitokooza bwongo, kwiba, kubaza kubi n’okusiihana nibyo nakoraga obwire bwona. Poliisi yaikaraga nendubatiraho kagere ha kagere. Nkakwatwa emirundi nyingi, kandi nkamara emyaka nyingi nintekwa omu nkomo ninyongera nindugamu.

OMULINGO BAIBULI YAHINDWIRE OBWOMEEZI BWANGE:

Haroho akasumi obunarugire omu nkomo, nacwamu kugenda kubungira isenkati nyowe. Nkaba ntamanyire ngu uwe n’abaana be babiri bakaba bafookere Bakaiso ba Yahwe. Bakandaaliza kwija omu nsorrokano. Habw’okugonza kumanya ekibayo nkacwamu kugenda nabo. Obutwahikire ha Kyombeko ky’Obukama, nkalemeraho ngu ningonza kwikarra haihi n’orwigi nukwo nsobole kurora kurungi boona barukutaahamu n’abarukuturuka. Obu ntakwebiirwe nkaba nyine emundu yange.

Orusorrokano oru rukahindura obwomeezi bwange. Ninyijuka nintekereza ngu nikisisana ndi munsi endi. Abantu bakandamukya omu mulingo gw’obunywani kandi basemeriirwe. Ninkyaijukira kimu kurungi omulingo amaiso gaabo gaali nigooleka ngu mali nibanfaaho. Abakaiso ba Yahwe bakaba nibahukanira kimu h’abantu nkaba ninyikaramu!

Nkatandika kwega Baibuli n’Abakaiso ba Yahwe. Nk’oku nayeyongiire kwega, nukwo nayeyongiire kukirora ngu nsemeriire kukora empindahinduka omu bwomeezi bwange. Nkakwatwaho ebigambo ebiri omu Enfumo 13:20: “Gendaga nabantu abamagezi, kandi olifoka owamagezi: Baitu mutahi wabadomadoma alisasa.” Nkakyetegereza ngu nkaba nsemeriire kwecwaho ekitebe ky’abacwi b’ebiragiro. Eki kitanyanguhire baitu Yahwe akankonyera nabecwaho.

Nkafooka mwecumi omu mubiri. Nkateekamu amaani naleka kunywa etaaba n’okukozesa ebitokooza bwongo. Nkasara isoke lyange erikaba liraihire, naihaho obwoma bw’amatu kandi naleka kubaza kubi. Habw’omurundi gw’okubanza omu bwomeezi bwange, nkatandika kuba n’okwetanga.

Tinagozaaga kusoma n’okwesomesa, nahabweki kikangumira muno kuteekaho omutima kwetegereza ebindukwega. Baitu nkateekamu amaani, kandi mporampora nkatandika kugonza Yahwe. Nkahurra ntandikire kuhinduka, omuntu wange ow’omunda akatandika kundumiiriza. Nayehurraga kubi kandi nagurukyagurukyaga Yahwe obwaraaba n’asobora kunganyira habw’ebibi ebinkaba nkozere. Omu kasumi ako, kikampumuza muno obunasomere omulingo Yahwe yaganyireemu Omukama Daudi hanyuma y’okukora ebibi eby’amaani.​—2 Samuiri 11:1–12:13.

Ekintu ekindi ekyangumiire nukwo kutebeza enju ha nju. (Matayo 28:19, 20) Nkaba nintiina ngu ninsobora kutangaana omuntu ounakozere kubi ntakegere amananu! Baitu mporampora nkahika naleka kutiina. Nkatandika kutunga okumarwa kwonyini habwokukonyera abandi kumanya Isiitwe ow’omu iguru anyakwijwire okuganyira.

OMULINGO NGASIIRWE:

Kwega hali Yahwe kikajuna obwomeezi bwange! Baingi h’abanywani bange aba kara bafiire rundi bali mu nkomo, baitu nyowe nkyaine obwomeezi oburumu okusemererwa kandi ndindiriire ebiro eby’omu maiso ebirungi. Nyegere kuba muntu mwebundaazi, omuhulizi kandi nyegere n’okulema ekiniga kyange ekingi. Kandi eki kinkonyiire kuba n’enkoragana enungi n’abandi. Nyowe na mukazi wange Carmen nitwegondeza omu buswere oburumu okusemererwa. Kandi kitusemeza muno obutukonyera abandi kwega ebirukukwata ha Baibuli.

Ntakeberwe, kambagambire na kinu, hati ninkora omulimo gwange n’obwesigwa, nkora mu bbanka​—baitu hati tinziiba baitu nziyonja kurungi muno!