N’osobora Kugarramu Amaani Omukristaayo ow’Agarukiriire omu by’Omwoyo

Buli mwaka, Abakristaayo baingi abagarukiriire omu by’omwoyo baija ha Kiijukyo. Nabo bakaba bali omu kalitaango k’obwomeezi baitu bagarukirra ha bw’ensonga ezitali zimu na zimu, kandi ezimu nizibazibwaho omu brocuwa Return to Jehovah. (Baheb 12:1) N’obukiraaba kiri kiti, Yahwe n’akyabatwara nk’ab’omuhendo, habwokuba akabagura n’esagama y’omwana we. (Eng 20:28; 1Pet 1:18, 19) Nitusobora tuta kubakonyera kugaruka omu kitebe?

Abagurusi b’ekitebe baserra kandi balengaho kukonyera Abakristaayo abagarukiriire omu by’omwoyo nk’omulingo omulisa aserra entama ey’ebuzire. (Luk 15:4-7) Kinu nikyoleka okufaayo kwa Yahwe okw’aine. (Yer 23:3, 4) Itwena nitusobora kugarramu amaani abagarukiriire omu by’omwoyo, hatali abagurusi b’ekitebe bonka. Obutwoleka okufaayo n’ebambazi kisemeza Yahwe kandi kirugamu emigisa. (Nfu 19:17; Eng 20:35) Nahabweki, tekerezaaho ow’oruganda ow’osobora kugarramu amaani kandi okikole omu bwangu!

MUROLE VIDIYO GARRAMU AMAANI ABAGARUKIRIIRE OMU BY’OMWOYO, KANDI MUGARUKEMU EBIKAGUZO BINU:

• Abbey akakora ki obu y’atangaine munyanya itwe ow’akaba atamanyire?

• Habwaki tusemeriire kubanza kwekaguzaaho abagurusi tutakakonyire ow’oruganda ow’agarukiriire omu by’omwoyo?

• Abbey aketekaniriiza ata kubungira Laura omurundi ogwakabiri?

• Abbey akoleka ata okugumisiriza hamu n’okugonza obw’akaba n’agarramu Laura amaani?

• Ekyokurorraho ekiri omu Luka 15:8-10 nitusobora kukyegeraho ki?

• Migisa ki eyarugire omu kukorra hamu kukonyera Laura?