Ebikaguzo Kuruga Omu Basomi Baitu

Omukwenda Paulo akaba namanyisa ki obuyagambire ati: “Obwebiragiro nkafa hali ebiragiro”?​—Bag. 2:19.

Paulo akahandiika ati: “Obwebiragiro nkafa hali ebiragiro, nyomere hali Ruhanga.”​—Bag. 2:19.

Paulo ekiyahandiikire kyali nikikwatagana n’ensonga enkuru ey’akaba n’agonza ebitebe omu kicweka kya Rooma ekya Garatiya bimanye. Abakristaayo abamu omu kicweka eki bakaba nibahabisibwa abegesa ab’ebisuba. Abasaija abo bayegesaaga ngu omuntu kusobora kujunwa asemeriire kworobera Ebiragiro bya Musa, kukira muno eky’okusarwa. Baitu Paulo akaba akimanyire ngu Ruhanga akaba atakyayetaagisa abaheereza be kusarwa. Akakozesa ensonga ez’amaani kwoleka ngu enyegesa zinu zaali z’ebisuba kandi akongera n’okugumya okwikiriza kw’ab’oruganda omu kicunguro kya Yesu Kristo.​—Bag. 2:4; 5:2.

Baibuli n’ekyoleka kurungi ngu omuntu obwamara kufa aba atamanyire kintu kyona, kandi ebintu ebimwetoroire biba bitakyamukwataho. (Mug. 9:5) Paulo obuyagambire ngu: “Nkafa hali ebiragiro,” akaba n’amanyisa ngu Ebiragiro bya Musa byali bitakyamwineho obusobozi bwona. Kandi, Paulo akaba n’akigumya ngu habw’okwikiririza omu kicunguro, akaba ‘ayomiire hali Ruhanga.’

Empindahinduka egi ekabaho omu nyikara ya Paulo “obwebiragiro.” Omu mulingo ki? Nubwo akaba yamara kusoborra ati: “Omuntu taihibwaho omusango obwemirimo yebiragiro, baitu obwokuikiriza Kristo Yesu.” (Bag. 2:16) Ky’amananu ngu ebiragiro byali bikozere omulimo omukuru muno. Paulo akasoborra Abagaratiya ati: “Bikatebwaho obwebyokusisa, okuhikya okuija okwomuijukuru ayaraganiziibwe.” (Bag. 3:19) Ego, Ebiragiro bikakyolekera kimu ngu abantu abatahikiriire kandi abasiisi baali batasobora kworobera ebiragiro kikumi ha kikumi, baali nibetaaga ekihongwa eky’okumalirra kandi ekihikiriire. Nahabweki, ebiragiro bikakonyera abantu kwetegereza ngu Yesu nuwe akaba ali ‘omwijukuru,’ ow’akaba araganiziibwe. Kurabira omu kwikiririza omuli Yesu Kristo, omuntu akaba n’asobora kubarwa Ruhanga nk’ow’ahikiriire. (Bag. 3:24) Paulo akabarwa nk’ow’ahikiriire habwokuba kurabira omu Biragiro akaba aikiriize kandi ataire okwikiriza kwe omuli Yesu. Omu mulingo ogu, Paulo ‘akafa hali ebiragiro’ kandi ‘yayomeera hali Ruhanga.’ Nahabweki, Ebiragiro bikaba bitakyaineho Paulo obusobozi, baitu Ruhanga nuwe akaba abumwineho.

Paulo akasoborraho ensonga niyo emu omu bbaruha ye hali Abarumi. Akagamba ati: “Nukwo nainywe, bagenzi bange, mwafire muti hali ebiragiro omu mubiri gwa Kristo . . . Baitu hati bunu tukasumuru’rwa okuruga omu biragiro, obutwafire hali eki ekikaba kitutungire.” (Bar. 7:4, 6) Eyahandiikirwe kinu hamu n’ekya Abagaratiya 2:19, nibyoleka ngu Paulo akaba atarukubazaaho okufa nk’omusiisi ow’acwire ebiragiro, oihireho akaba n’abazaaho okucungurwa. Ebiragiro bikaba bitakyaineho Paulo hamu n’Abakristaayo abandi abali nka uwe obusobozi. Baali bacungwirwe kurabira omu kwikiririza omu kicunguro kya Kristo.