Bakazoora Ekibindi Ekya Ira Muno Kihandiikirweho Ibara ly’Omu Baibuli

Omu 2012, abaseruliiriza ha bantu ba ira nibakozesa ebisigalira bakazoora ebibbali by’ekibindi ekimazire emyaka 3,000. Ekyakizire kubasemeza bikaba bihandiiko ebi basangire ha kibindi kinu.

Ebibbali binu obu babiteraniize, bakasobora kurora ebigambo bya Kanani ebikaba bikihandiikirweho. Hakaba ahandikirweho, “Eshba’al Ben Beda,” ekirukumanyisa “Esi-baali, mutabani wa Beda.” Gunu nugwo murundi ogubandize abaseruliirizi kuzoora ekintu ekya ira kihandiikirweho ibara linu.

Haroho omuntu ondi arukweta Esi-baali arukubazibwaho omu Baibuli. Akaba mutabani w’Omukama Saulo. (1 Ekyebyomubusinge 8:33; 9:39) Omu ha baseruliiriza abakizoire arukwetwa Yosef Garfinkel, akagamba: “Nikihuniiriza kumanya ngu ibara linu erya Esi-baali nirisangwa omu Baibuli, kandi nirisangwa na ha kibindi ekyabaireho omu busumi Omukama Daudi akaba n’alema.” Kinu kyokurorraho kindi ekirukwoleka omulingo ebizoirwe omu kuseruliiriza birukusagika Baibuli!

Kusigikirra ha Baibuli, ibara lindi erya Esi-baali mutabani wa Saulo niryo Isi-bosesi. (2 Samuiri 2:10) Habwaki bacwireho “baali” ha ibara linu bagarraho “bosesi”? Omuseruliirizi omu n’agamba ngu ayahandiikire Samuiri Eyakabiri n’asobora kuba yali n’ayetantara kukozesa ibara Esi-baali habwokuba rikaba liri ibara lya ruhanga ow’ebisuba ayamanywaga nka Baali ou Abakanani baramyaga. Baitu ibara linu nitulisanga omu kitabu kya Baibuli ekirukwetwa Ekyebyomubusinge eky’Okubanza.