Ekikorwa Kimu Eky’Embabazi ez’Omukristaayo
OMU myaka 1950, ise John ow’akaba naruga omu rubuga orutaito orwa India orukwetwa Gujarat, akabatizibwa nk’omu ha Bakaiso ba Yahwe. Baitu John, bagenzi be bataano, hamu n’anyina bo bakaba bali Bakatuliki abagonzaga muno ediini yabo. Nahabweki, baikaraga nibahakaniza ise bo habw’enyikiriza ye.
Kiro kimu, John akatumwa ise nukwo atwale ebbahasa hali ow’oruganda omu kitebe. Baitu ha kiro eki nyenkyakara, John akesara ekyara obwakaba nalengaho kufundukura eduramu enkoto. Habw’okugonza kworobera ise, akesiba ekigoye ha kyara kye ekikaba nikijwa esagama nukwo yatwara ebbaruha.
John obu yahikire nambere ise yamutumire, ebbahasa akagiha omukazi w’ow’oruganda. Nauwe akaba omu ha Bakaiso ba Yahwe. Omukazi onu obwakaba nakwata ebbahasa, akarora ekyara kya John kihutaire kandi yacwamu kumukonyera. Akaihayo akasanduko k’emibazi, yasemeza ekihoya kandi yakisiba kurungi. Hanyuma yamuha ekikopo kya caayi. Obwire bwona obu bamazire hamu akaba namubaliza kurungi ha bintu ebirukukwata ha Baibuli.
Omulingo John yaroramuga Abakaiso ba Yahwe gukahinduka habw’embabazi munyaanya itwe onu yamwolekere. Akamukaguza ebikaguzo bibiri ebirukukwata ha nyikiriza z’Abakaiso ba Yahwe ezirukwahukana ha z’Abakatuliki. Akakaguza Yesu obwaraaba ali Ruhanga kandi obu kiraba kihikire Abakristaayo kusaba Malyamu. Munyaanya itwe onu akaba ayegere orulimi orukwetwa Gujarati kandi akagarukamu John omu rulimi rwe. Akamugarukamu n’akozesa Baibuli kandi hanyuma yamuha akatabu “This Good News of the Kingdom.”
John obu yasomere akatabu kanu, akamanya ngu ebyakaba nasoma gakaba mananu. Akagenda yakaguza omwebembezi we ow’ediini ebikaguzo bibiri ebi yali akagwize munyaanya itwe. Omwebembezi w’ediini akabihirwa muno yamuhungurra Baibuli natokera haiguru: “Ofookere Setani! Nyoleka nambere Baibuli egamba ngu Yesu tali Ruhanga. Nyoleka nambere erukugamba ngu titusemeriire kuramya Malyamu. Byona binyoleke!” John akahunirra kurora ngu omwebembezi w’ediini nasobora kwetwaza mulingo ogu. Akamugambira ngu talyongera kurubata omu Kelezia omurundi ogundi. Kandi atagaruke kurubatayo!
John akatandika kwega Baibuli n’Abakaiso ba Yahwe, yaikiriza amananu kandi yatandika kuheereza Yahwe. Obwire bukahika, n’abanyabuzaale be bandi batandika kuheereza Yahwe. Hati harabireho emyaka 60, baitu buli murundi John arora enkojo ya ha kyara kye, aijuka ekikorwa ky’Ekikristaayo eby’embabazi ebyamuletiire kuhereza Yahwe obwomeezi bwe bwona.—2 Abakolinso 6:4, 6.