Malaika Omukuru Mikaeri Nuwe Oha?

Eky’okugarukamu kuruga omu Baibuli

Mikaeri, amadiini gamu ougeeta Mikaeri Omuhikiriire, liri ibara eryahairwe Yesu obwakaba atakaizire omu nsi.a Mikaeri akakungana na Sitaani hanyuma y’okufa kwa Musa kandi akakonyera malaika kuhikyaho nabbi Danieri obutumwa bwa Ruhanga. (Danieri 10:13, 21; Yuda 9) Mikaeri nakorra h’amakuru g’ibara lye erirukumanyisa—“Noha Ali Nka Ruhanga?”—kuraba omu kurwanirra obulemi bwa Ruhanga n’okurwanisa abanyanzigwa ba Ruhanga.—Danieri 12:1; Okusuku’rwa 12:7.

Tekerezaaho ensonga habwaki ky’amakuru kugamba ngu Yesu nuwe Mikaeri malaika omukuru.

● Mikaeri nuwe “maraika omukuru.” (Yuda 9) Ekitiinisa “maraika omukuru,” nikimanyisa “omukuru wa bamalaika,” kandi ebigambo “maraika omukuru” nibisangwa omu Baibuli emirundi ebiri. Omu nkarra zoona ibiri, booleka ngu ebigambo binu bikozesebwa kwoleka ngu malaika omu nuwe aine ekitiinisa kinu. Rumu ha nkarra ezi nirugamba ngu Yesu ayahumbuukire “alisirimuka okuruga omu iguru, nokugambira haiguru, niraka erya maraika omukuru.” (1 Abasesalonika 4:16) Yesu aine ‘iraka erya malaika omukuru’ habwokuba nuwe Mikaeri, malaika omukuru.

● Mikaeri n’aduumira ihe erya bamalaika. “Mikaeri na bamaraikabe [bakarwana] nekijoka” kandi ekijoka eki nikyo Sitaani. (Okusuku’rwa 12:7) Mikaeri aine obusobozi obw’amaani omu bihangwa eby’omwoyo, habwokuba n’ayetwa “omu hali abarukukira obukuru” kandi “omukama omukuru.” (Danieri 10:13, 21; 12:1) Ebitiinisa binu nibyoleka ngu Mikaeri nuwe “mudumizi omukuru omu ihe lya bamalaika” nk’oku omukugu omu owa New Testament arukwetwa David E. Aune yagambire.

Baibuli ekozesa ibara erindi limu hali omuntu anyakwine obusobozi hali ihe lya bamalaika. Esoborra eti: “Mukama waitu [Yesu] obwalisuku’rwa okuruga omu iguru hamu nabamaraika abamanige, omu murro ogurukwaka, [nahoora] enzigu.” (2 Abasesalonika 1:7, 8; Matayo 16:27) Yesu ‘akagenda omu iguru; bamalaika n’ab’obusobozi n’abamaani bateekwa hansi ye.’ (1 Petero 3:21, 22) Kyakubaire kitarukukora amakuru Ruhanga kuteekaho Yesu na Mikaeri nk’abadumizi ba bamalaika abarukurwanisangana. Oihireho, nikikorra kimu amakuru kugamba amabara gombi Yesu na Mikaeri nigakozesebwa kumanyisa omuntu omu.

● Mikaeri “alyemerra” omu “[kasumi] akobujune akatakabahoga.” (Danieri 12:1) Omu kitabu kya Danieri, ekigambo “alyemerra” kikira kukozesebwa kumanyisa omukama ow’aimuka kugira ekintu eky’embaganiza ekiyakoraho. (Danieri 11:2-4, 21) Yesu Kristo, ow’ayetwa “Kigambo kya Ruhanga,” naija kugira ekintu eky’embaganiza ekiyakoraho ‘nk’Omukama wa bakama’ kuhwerekereza abanyanzigwa ba Ruhanga boona kandi alinde abantu ba Ruhanga. (Okusuku’rwa 19:11-16) Eki naija kukikora omu kasumi “[ak’omuhito] omwingi ogutakabahoga ensi ekaba okubaho.”—Matayo 24:21, 42.