‘Ebisumuruzo eby’Obukama’ Nibyo Biha?
Eky’okugarukamu kuruga omu Baibuli
“Ebisumuruzo ebyobukama,” nibimanyisa obusobozi obw’okukingurraho abantu ‘kutaaha omu Bukama bwa Ruhanga.’ (Matayo 16:19, Engeso Ezabakwenda 14:22)a Yesu akaha Petero “ebisumuruzo ebyobukama obwomu iguru.” Kinu nikimanyisa ngu Petero akatunga obusobozi obw’okukingura obutumwa oburukukwata ha mulingo abantu abesigwa basobora kwegondeza omu mugisa ogw’okutaaha omu Bukama bw’omu iguru kuraba omu kutunga omwoyo gwa Ruhanga ogurukwera.
a Obwire obumu, Baibuli ekozesa ekigambo “ekisumuruzo” nk’akokurorraho k’obusobozi rundi obujunanizibwa.—Isaya 22:20-22; Okusuku’rwa 3:7, 8.
Ebisumuruzo bikakozesebwa kukingurra baha?
Petero akakozesa obusobozi kuruga hali Ruhanga kukingurra omuhanda guruupu isatu ez’abantu nukwo bataahe omu Bukama:
1. Abayudaaya hamu n’Abayudaaya abaahindukire. Omu kaire kake Yesu amazire kufa, Petero akekambisa guruupu y’Abayudaaya kwikiriza Yesu nk’omuntu ow’akomerwe Ruhanga kulema omu Bukama. Petero akabooleka ekibaali basemeriire kukora kusobora kujunwa. Nahabweki akabakingurraho omuhanda ogw’okutaaha omu Bukama, kandi enkumi n’enkumi ‘bakaikiriza ekigambo kye.’—Engeso Ezabakwenda 2:38-41.
2. Abasamaliya. Hanyuma, Petero akasindikwa hali Abasamaliya.b Na ha murundi gunu akakozesa ekisumuruzo ky’Obukama uwe n’omukwenda Yohana, obubaasabiire abasamaliya okuheebwa omwoyo ogurukwera. (Engeso Ezabakwenda 8:14-17) Kinu kikakingurraho Abasamaliya omuhanda ogw’okutaaha omu Bukama.
b Abasamaliya bakaba baine ediini ey’ekaba n’eyahukana ha diini ey’Ekiyudaaya baitu enyegesa zaayo ezimu hamu n’emigenzo yayo byasigikirraga ha Biragiro bya Musa.
3. Abanyamahanga. Hanyuma y’okurabaho emyaka esatu n’ekicweka Yesu amazire kufa, Ruhanga akooleka Petero ngu abanyamahanga (abantu abatali Bayudaaya) nabo baakutungire omugisa obw’okutaaha omu Bukama. Petero akahondera oburagirizi bunu, kandi yakozesa kimu ha bisumuruzo binu kuraba omu kutebeza Abanyamahanga, kandi yabakingurra orwigi nukwo batunge omwoyo ogurukwera, bafooke Bakristaayo, n’abantu abasemeriire kutaaha omu Bukama.—Engeso Ezabakwenda 10:30-35, 44, 45.
Nikimanyisa ki ‘kutaaha omu Bukama’?
Abo ‘abataaha omu Bukama’ bafooka balemi hamu na Yesu omu iguru. Baibuli ekaranga ngu ‘baakwikaliire ha ntebe ez’ekitiinisa’ kandi ‘baleme nk’abakama hali ensi yoona.’—Luka 22:29, 30; Okusuku’rwa 5:9, 10.
Ebisuba ebirukukwata ha bisumuruzo eby’Obukama
Ekisuba: Petero nuwe acwamu nooha arataaha omu iguru.
Amananu: Baibuli egamba ngu Yesu Kristo, hatali Petero, ‘nuwe alicwa omusango gw’abomeezi n’abafu.’ (2 Timoseo 4:1, 8; Yohana 5:22) Amananu gali, Petero wenka akabazaaho Yesu ngu “nuwogu Ruhanga ouyataireho okucwera omusango abomezi nabafu.”—Engeso Ezabakwenda 10:34, 42.
Ekisuba: Iguru likalindirra Petero kucwamu ni di obwalikozesa ebisumuruzo by’Obukama.
Amananu: Yesu obw’akaba n’abazaaho ebisumuruzo eby’Obukama, akagambira Petero ati: “Kyona kyona ekyoliboha hansi, kiribohwa omu iguru: kyona kyona ekyolisumurra hansi kirisumurrwa omu iguru.” (Matayo 16:19) N’obukiraaba ngu abamu bagamba ngu ebigambo binu bimanyisa ngu Petero nuwe ancwamu nibaha abasemeriire kugenda omu iguru, ebigambo eby’okubanza eby’Oruyonaani byoleka ngu encwamu za Petero zaakuhondiire ezi ezimazire ira kukorwa omu iguru omu kiikaro ky’okuzibanza.c
c Rora ebigambo ebirukusoborra Matayo 16:19 omu New World Translation of the Holy Scriptures (ey’Okwesomesa).
Ahandi Baibuli eyoleka ngu Petero akaba akomerwemu kugenda omu iguru obw’akaba n’akozesa ebisumuruzo by’Obukama. Ekyokurorraho, akahondera oburagirizi kuruga hali Ruhanga obw’akaba n’akozesa ekisumuruzo ekyakasatu.—Engeso Ezabakwenda 10:19, 20.