Nikimanyisa Ki Kuba Muntu Arukwera

Eky’okugarukamu kuruga omu Baibuli

Kuba muntu arukwera nikimanyisa kuba otaine kamogo koona. Ekigambo eky’Oruheburaniya ekihindurwa kumanyisa “ekirukwera” kiruga omu kigambo ekimanyisa “ekyahukaniziibwe ha bintu ebindi.” Nahabweki, ekintu ekirukwera nikyo kintu ekyahukaniziibwe ha bintu ebindi kutakozesebwa omu mirimo endi eya buli kiro, rundi ekitwarwa nk’ekintu ekirukwera habwokuba kiba nikyera kandi kisemiire.

Ruhanga nuwe arukukirrayo kimu kuba arukwera. Baibuli egamba eti: “Busaho ondi arukwera nka [Yahwe].”a (1 Samuiri 2:2) Nahabweki, Ruhanga nuwe aine obusobozi obw’okututeraho endengo ezirukukwata ha burukwera.

Ekigambo arukwera nikisobora kukozesebwa hali ekintu kyona ekiine akakwate na Ruhanga, kukira muno ebintu byona ebyahukaniziibwe ha bintu ebindi kukozesebwa omu kuramya honka. Ekyokurorraho, Baibuli ebazaaho:

● Ebiikaro ebirukwera: Ruhanga akagambira Musa ow’akaba ali haihi n’ekisaka ekirukwaka omurro ati: “Nambere oyemeriire nuho arukwera.”—Okuruga 3:2-5.

● Ebijaguzo ebirukwera: Abaisaleri abaakara baramizaaga Yahwe ha bijaguzo eby’okuramya ebyabahoga butoosa ebyayetwaga “okusorrokana okurukwera.”—Ebyabalevi 23:37.

● Ebintu ebirukwera: Ebintu ebyakozesebwaga omu kuramya Ruhanga ha yekaru eyakara omu Yerusalemu byayetwaga ‘ebintu ebirukwera.’ (1 Ekyabakama 8:4) Ebintu nk’ebi byabaga biine kukwatwa omu mulingo ogw’ekitiinisa, n’obukiraaba ngu byali bitasemeriire kuramibwa.b

Omuntu ow’atahikiriire nasobora kuba arukwera?

Ego. Ruhanga naragira Abakristaayo ati: “[Mube] abarukwera, baitu ninyowe ndukwera.” (1 Petero 1:16) Amananu gali, abantu abatahikiriire tibasobora kuhika ha ndengo za Yahwe ezihikiriire ez’oburukwera. Baitu nabwo, abantu aborobera ebiragiro bya Ruhanga nibasobora kurorwa ‘nk’abarukwera, abasemeriire Ruhanga.’ (Abarumi 12:1) Omuntu ow’akora kyona ekirukusoboka kuba arukwera akyoleka omu bigambo n’omu bikorwa bye. Ekyokurorraho, ahondera amagezi ga Baibuli agagamba ngu mube abarukwera kandi mulekere kimu obusiihani kandi mube abarukwera omu ngeso zoona.—1 Abasesalonika 4:3; 1 Petero 1:15.

Omuntu n’asobora kuleka kuba arukwera omu maiso ga Ruhanga?

Ego. Kakuba omuntu aleka kuhondera endengo za Ruhanga ezirukukwata ha ngeso, Ruhanga naaba atakyamurora nk’ow’arukwera. Ekyokurorraho, ekitabu ekya Abaheburaniya kikahandiikirwa “[ab’oruganda] abarukwera,” baitu kyabahabura ngu nibasobora kukurakuraniza “omutima omubi ogwokutaikiriza, okuruga ha Ruhanga omwomezi.”—Abaheburaniya 3:1, 12.

Ebisuba ebirukukwata ha kuba muntu arukwera

Ekisuba: Okutaterana kiretera omuntu kweyongera kuba arukwera.

Amananu: N’obukiraaba ngu Omukristaayo nasobora kucwamu kutataaha obuswere, okutaterana kyonka tikisobora kuleetera omuntu kuba arukwera omu maiso ga Ruhanga. Amananu gali ngu abo abatali omu buswere baramya Ruhanga bataine ekintu kyona ekirukubahugura. (1 Abakolinso 7:32-34) Baitu, Baibuli eyoleka ngu naabo abali omu buswere nibasobora kuba abarukwera. Amananu gali, hakiri omu h’abakwenda ba Yesu arukwetwa Petero akaba ali omu buswere.—Matayo 8:14; 1 Abakolinso 9:5.

Habwaki Baibuli eyetwa “Ekitabu Ekirukwera”?

Kumara emyaka, ebyahandiikirwe ebyaterekereziibwe omwoyo ogurukwera ebiteraniziibwe hamu nibyetwa “Ekitabu Ekirukwera” rundi “Ebyahandiikirwe Ebirukwera” habw’ensonga zinu:

● Endugirro yayo. ‘Abantu bagambaga ebyarugire hali Ruhanga baterekereziibwe omwoyo ogurukwera.’—2 Petero 1:21.

● Obutumwa bwayo. ‘Ekiragiro kya [Yahwe] nikyera, kihwezesa amaiso. Okutina [Yahwe] kusemiire, kuikaraho ebiro byona.’—Zabuli 19:8, 9.

Egi niyo ensonga habwaki Baibuli etwarwa kuba erukwera. Eyahukaniziibwe hali ebihandiiko ebindi habw’ebintu ebigirumu ebisemiire kandi ekozesebwa omu kuramya okurukwera.

[OBUGAMBO OBULI HANSI]