Gideoni N’abasaija Be 300

NORORA ekirukugenda omu maiso hanu? Abo boona barwani ba Isareri. Abasaija abainamire, nibanywa amaizi. Omucwi w’Emisango Gideoni nuwe ayemeriire haihi nabo. Akaba nabarolerra omulingo nkoku bakaba nibanywamu amaizi.

Dora oyetegereze embaganiza abasaija abo omulingo bakaba nibanywamu amaizi. Abamu baali nibajumarra kimu mumaizi, baitu ondi akaba nanywa amaizi n’engaro ze. Nukwo asobole kurora ebikaba bimwehingulirize. Kinu kikaba kikuru muno habwokuba Yahwe akaba agambiire Gideoni akomemu abasaija abo bonka abakubaire bulindaara obu bakubaire nibanywa amaizi. Abandi, Ruhanga akagamba babagambe bataahe owabu bo. Katurole habwaki?

Abaisareri bakaba mumihito endi ey’amaani. Ensonga eri nti bakaba bangire kworobera Yahwe. Abantu ba Midiani bakaba hati nibabakiza amaani kandi bakaba nibabatuntuza muno. Nukwo Abaisareri kukungira Yahwe abahe obukonyezi, na Yahwe akahurra okukunga kwabu.

Yahwe akagambira Gideoni kusoroza amahe. Gideoni akasoroza abasaija abarwani 32,000. Baitu abakaba nibagenda okurumba Isareri baali 135,000. Baitu Yahwe akagambira Gideoni ati: ‘Oine abasaija baingi muno.’ Habwaki Yahwe yagambiire Gideoni ati?

Isareri, obu yakusingire obulemu bakutekerize ngu bo bonka habw’amaani gabu nibo babusingire. Bakutekerize ngu bakaba batarukwetaga bukonyezi bwa Yahwe. Nukyo Yahwe yagambiire Gideoni ati: ‘Gambira abo boona abarukutina n’okutukumira bagarukeyo owabu bo.’ Gideoni obu yakozire eki, abasaija 22,000 bakagarukayo mu maka gabo. Hakasigara abasaija 10,000 kurwanisa abasirikale 135,000.

Baitu hati hurra! Yahwe eki yagambire: ‘Okyaine abasaija baingi.’ Nikyo yagambiire Gideoni kutwara abasaija ha kisaru kunywa amaizi, kandi nokugambira ogu wena ayainamiire kimu nanywa amaizi kugaruka omuka. ‘Ninyija kukuha obusinguzi n’abasaija 300 abo abaikaire bulindaara nibanywa amaizi,’ nukwo Yahwe yaraganiize.

Obwire obw’okurwana bukahika. Gideoni akata abasaija be 300 omu bihanda bisatu. Buli omu akamuha engwara n’ensoha hamu n’ekimuli omunda yayo. Obu bwahikire omu itumbi bakehinguliriza orukande rw’abanyanzigwa babu. Boona hamu bakatera engwara, bayata ensoha niraka likooto bati: ‘Busitama ya Yahwe n’eya Gideoni!’ Abasirikale babanyanzigwa obu basisimukire, bakatiina muno batarukumanya kyokukora. Bakatandika kwiruka, Abaisareri basingura obulemu.