Ruhanga Araganiza Orugonjo

EKISISANI kinu eky’orugonjo nikisisanira kimu noru Ruhanga yayolekere Isaya. Isaya akabaho hanyuma ya Yona.

Orugonjo nikimanyisa ‘omusiri omurungi’ rundi ‘paaka.’ Kinu tikirukutwijukya ekintu eki tumazire kwegaho omukitabu kinu? Tirurukusisanira kimu n’orugonjo orurungi oru Yahwe akaba akoliire Adamu na Hawa? Baitu ensi enu yoona erifooka nk’orugonjo?

Yahwe akagambira omurangi Isaya okuhandiika ha rugonjo oruhyaka orukaba nirugenda kwija ha bw’abantu ba Ruhanga. Akagamba ati: ‘Engagya eratahaga n’akataama kandi biraikaraga omubusinge. N’enyana hamu n’ekyana ky’entale biririira hamu, n’omwana omuto alibirolerra. N’omwana omuto talikorwa kabi koona obu alizanira haihi n’enjoka y’obusagwa.’

Baingi nibasobora kugamba bati: ‘Kinu tikirukusoboka kubaho. Habwokuba habaireho emihito nyingi muno omu nsi kandi ginyine kweyongera kubaho.’ Baitu kicumitirizeho. Bwomezi bwa mulingo ki obu Ruhanga akaba ahaire Adamu na Hawa?

Ruhanga akateeka Adamu na Hawa omurugonjo orurungi muno. Okusiisa kwabo nukwo kwabaletiire okufeerwa amaka gabu amarungi, kandi kinu kikarugwamu okukaikura hamu n’okufa. Baitu Ruhanga akaraganiza ngu naija kuha abantu abarukumugonza ebintu byona ebirungi ebi Adamu na Hawa bafeeriirwe.

Omurugonjo oruhyaka orurukwija, tihalibayo ekintu kyona ekirukurumya rundi kuhwerekereza. Halibaho obusinge bwonyini. Abantu boona baliba n’obwomezi oburungi n’okusemererwa. Nikiija kuba nkoku Ruhanga yagondeze omukubanza. Baitu nitwija kwegaho omulingo Ruhanga alibikoramu.