Omusaija Owakaba Atarukutiina

RORA abantu nkoku barukusekerra omusigazi onu. Nomanya noha? Onu nuwe Yeremiya. Akaba ali murangi wa Yahwe w’omugaso muno.

Hanyuma ya Yosiya kutandika kuhwerekereza ebisisani byona kuruga omu nsi, Yahwe akagambira Yeremiya okuba omurangi We. Baitu Yeremiya natekereza ngu akyali muto muno okuba omurangi. Baitu Yahwe amugambira ngu naija kumukonyera.

Yeremiya agambira Abaisareri okulekeraho kukora ebibi. ‘Baruhanga b’abantu abarukuramibwa amahanga b’ebisuba,’ aba nukwo yabagambira. Baitu Abaisareri abaingi baali nibagonza muno kuramya ebisisani mukiikaro ky’okuramya Yahwe Ruhanga ow’amananu. Yeremiya obu abagambira ngu Ruhanga akaba naija kubahwerekereza habw’ebibi byabu, bamusekerra kyonka.

Obusumi bukarabaho. Yosiya yafa. Hanyuma y’emyezi esatu, Yehoyakimu mutabani we akafooka omukama. Yeremiya agumizamu nagambira abantu ati: ‘Yerusalemu niija kuhwerekerezebwa obu mutahinduleho ha ngeso zanyu.’ Banyakatagara bakwata Yeremiya bamugamba n’okumwamira bati: ‘Osemerire kwitwa habw’ebigambo ebyo.’ Nukwo bagambira ababiito ba Isareri bati: ‘Yeremiya asemeriire kwitwa habwokuba ajumiriire orubuga rwaitu.’

Yeremiya yakukozire ki hati? Tarukutiina! Agambira boona ati: ‘Yahwe akantuma kubagambira ebintu binu byona. Obu mutahinduleho ha ngeso zanyu, Yahwe naija kuhwerekereza Yerusalemu. Baitu mumanye kinu, kakuba munyita, nimwija kuba mwisire omuntu ataine musango.’

Ababiito ba Isareri baleka Yeremiya okuba mwomezi baitu Abaisareri batahinduleho ha ngeso zabu. Hanyuma, Nabukadeneza omukama wa Baburoni aija arwanisa Yerusalemu. Hampero, Nabukadeneza akafoora Abaisareri bairu be, kandi baingi abatwara mu Baburoni. Kyecumitirizeho nkoku kyasisaine abantu abotarukumanya kukutwara mu kicweka ekyotarukumanya kuruga mu nsi owanyu!