Isomo 3

Yesu Kristo Nuwe Oha?

Habwaki Yesu ayetwa Mwana wa Ruhanga “omuzigaijo”? (1)

Habwaki ayetwa “Kigambo”? (1)

Habwaki Yesu yaizire hansi nk’omuntu? (2-4)

Habwaki yakozere eby’amahano? (5)

Kiki Yesu eky’arakora omu bwire obw’omu maisoho? (6)

1. Yesu yaikaraga omu iguru nk’omuntu ow’omwoyo atakabaire kwija hansi. Nikyo kihangwa kya Ruhanga ekyabandize, kandi nikyo ayeterwa Mwana wa Ruhanga “omuzigaijo.” (Abakolosai 1:15; Okusuku’rwa 3:14) Yesu nuwe Mwana wenka Ruhanga owu’yayehangiire wenka. Yahwe akakozesa Yesu atakabaire kufoka muntu nka “omukozesa” we omu kuhanga ebintu ebindi byona omu iguru n’omu nsi. (Enfumo 8:22-31; Abakolosai 1:16, 17) Kandi Ruhanga akamukozesa nka Omugambizi we omukuru. Bunu nubwo bulyo habwaki Yesu ayetebwa “Kigambo.”—Yohana 1:1-3; Okusuku’rwa 19:13.

2. Ruhanga akatuma Omwana We hansi nateeka obwomezi bwe omunda ya Malyamu. Nahabw’ekyo Yesu atabe na ise omuntu. Bunu nubwo bulyo habwaki Yesu ataragweserwe kibi rundi okutahikirra. Ruhanga akatuma Yesu hansi habw’ensonga isatu: (1) Kutwegesa amananu agakukwata hali Ruhanga (Yohana 18:37), (2) okulinda obugumisiriza obuhiikirire, natutekeraho eky’okuroraho eky’okuhondera (1 Petero 2:21), na (3) kuhonga obwomezi bwe kututaisura kuruga omu kibi n’omu kufa. Habwaki kinu kyabaire nikyetaagisa?—Matayo 20:28.

3. Habw’obutorobera kiragiro kya Ruhanga, omuntu ayabandize, Adamu akakora ekyo Baibuli ekyeyeta “ekibi.” Nahabw’ekyo Ruhanga yamucwera omusango gw’okufa. (Okubanza 3:17-19) Akaba atakyahikaana n’orulengo rwa Ruhanga, nahabw’ekyo akaba atakyali ahikirire. Mporampora akakaikura kandi yafa. Adamu akagweta abaana be boona ekibi. Bunu nubwo bulyo habwaki naitwe tukaikura, turwara kandi tufa. Omuntu yakucungwirwe ata?—Abarumi 3:23; 5:12.

4. Yesu akaba ali muntu ahikirire nka Adamu. Kyonka butasisana na Adamu, Yesu ak’orobera Ruhanga omu mulingo oguhikirire gonze obwakaba ali omukulengesebwa okwamani. Nahabw’ekyo akaba nasobora kuhayo obwomezi bwe obw’obuntu obuhikirire kusasurra ekibi kya Adamu. Kinu Baibuli nikyo ebazaho nka “ekicunguro.” Omu mulingo gunu abana ba Adamu baakusoboire kusumururwa kuruga omu kifubiro ky’okufa. Abo boona abakwikiririza omu Yesu basobora kuganyirwa ebibi byabu kandi batunge obwomezi obutahwaho.—1 Timoseo 2:5, 6; Yohana 3:16; Abarumi 5:18, 19.

5. Yesu obwakaba ali hansi akakiza abarwaire, akaliisa abakurumwa enjara, kandi akabundaza emiyaga. Kandi akahumbura abafu. Habwaki yakozere eby’amahano? (1) Akarumirwa abantu abakaba nibabonaabona, kandi akagonza kubakonyera. (2) Ebyamahano ebiyakozere bikagumya ngu akaba ali Mwana wa Ruhanga. (3) Bikooleka ebyo ebyalikorra abantu abaculezi bwaraba nalema ensi nk’Omukama.—Matayo 14:14; Marako 2:10-12; Yohana 5:28, 29.

6. Yesu akafa kandi Ruhanga yamuhumbura nk’ekihangwa eky’omwoyo, kandi yagarukayo omu iguru. (1 Petero 3:18) Kuruga obu, Ruhanga amazire kumufora Mukama. Bwangu muno Yesu aija kwihaho obubi bwona n’okubonabona okuli omu nsi munu.—Zabuli 37:9-11; Enfumo 2:21, 22.

[Ebisisani ebiri ha rupapura 7]

Obuhereza bwa Yesu bukabamu okwegesa, okukora ebyamahano, kandi n’okuhayo obwomezi bwe habwaitu