Oine Omwoyo Ogutafa?

HALIYO obwomezi hanyuma y’okufa? Ekikaguzo kinu kitalibaniza abantu okumara omwanya mwingi. Mu byaasa bingi abantu babaire nibecumitiriza muno ha kintu kinu kandi kibaletiire kuba n’enyikiriza nyingi ez’embaganiza.

Abantu baingi nibaikiriza ngu “omwoyo” gwikara mwomezi omuntu bwafa. Baitu haroho ekintu ekiruga omu mubiri gw’omuntu ha kufa kandi kikeyongera kuba kyomezi? Omwoyo nikyo kiki omu muntu omwomezi? Kiki ekigubaho obutufa? Baibuli, Ekigambo kya Ruhanga ekyaterekerezibwe omwoyo gwe, nikituha ebyokugarukamu ebyamananu hali ebikaguzo ebi.

Omwoyo Nikyo Kiki?

Omu Baibuli ekigambo ekihindurwa “omwoyo” mu mazima nikimanyisa “orwoya.” Baitu kinu kina amakuru agarukukira ha kikorwa ky’okwikya. Nk’ekyokurorraho, omuhandiki owa Baibuli Yakobo akagamba ngu: “Omubiri hataroho mwoyo guba gufire.” (Yakobo 2:26) Nahabw’ekyo, omwoyo nugwo guha omubiri obwomezi.

Ganu amani g’obwomezi tigasobora kuba rwoya bwoya oru­raba mubihaha. Habwaki kiri kiti? Habwokuba hanyuma y’okwikya kwemerra, obwomezi busigara mubucweka cweka bw’omubiri okumara akacu “rundi nk’edakika nke” okusigikirra ha kitabu The World Book Encyclopedia. Habwensonga enu okulengaho okugarramu obwomezi omu muntu kiba nikyanguha. Baitu akanyunyuzi k’obwomezi kanu obu kararra kimu kuruga mubucweka bwoona bw’omubiri, okulengaho kwona kugarramu obwomezi mu muntu kuba kyabusa. Orwoya orw’omunsi yoona tirukusobora kugarramu obwomezi n’omukacweka cweka kamu ak’omubiri kuba komezi. Omwoyo nigo mani g’obwomezi agarukuha obutafali bwoona obw’omubiri okuba bwomezi. Ganu amani ag’obwomezi nigasagikwa okwikya.—Yobu 34:14, 15.

Omwoyo gunu nigukorra omu bantu honka? Baibuli n’etuyamba okutunga engarukamu ehikire. Omukama omugezi Sulemani akahandika: “Noha amanyire omwoyo gwomuntu rundi nigutemba haiguru nomwoyo gwekisoro rundi gugenda hansi omu itaka?” (Omugambizi 3:21) Nahabw’ekyo, ebisoro hamu n’abantu nibigambwa kuba bine omwoyo. Kinu nikisoboka kita?

Omwoyo, rundi amani g’obwomezi nigasobora kulengesanizibwa nkamasanyarazi agarukuraba mu kyoma. Amasanyarazi ganu agatarukurorwa gasobora kukozesebwa kukora emirimu etali emu kusigikirra nkoku ekyoma kyakozerwe kukoramu. Nk’ekyokurorraho, sitovu n’esobora kukozesebwa kuleeta obutagasi, compyuta n’ekozesebwa kubara n’okukuha eby’orukwenda kumanya mukanya kake kandi televizoni n’esobora kukuletera ebisisani hamu n’iraka. Baitu amasanyarazi agarukukora mu byooma binu tigafooka byooma ebigarukukorramu. Gasigara mani bwani. Nikyo kimu, amani g’obwomezi tigatwara emiringo y’ekihangwa ekigarukukoramu. Tigaine buntu; tigaine busobozi bwokutekereza. Abantu hamu n’ebisoro bine “omwoyo gumu.” (Omugambizi 3:19, New World Translation) Nahabw’ekyo omuntu obwafa omwoyo gwe tigugenda kwikara ahandi nk’ekihangwa ky’omwoyo.

Hati bunu abafu bali mu mulingo ki? Kandi kiki ekiba ha mwoyo gw’omuntu obwafa?

“Omu Cucu Numwo Oligaruka”

Omuntu w’okubanza Adamu obu yasazireho agenderire okujeemera ekiragiro kya Ruhanga, Yahwe akamugambira ngu: “Omu mpiita ezomu maiso gawe numwo oraliraga ebyokulya, okuhikya obwoligaruka omu itaka baitu omu numwo waihirwe: baitu oli cucu, kandi omu cucu numwo oligaruka.” (Okubanza 3:19) Adamu akaba ali nkaha Yahwe atakamuhangire kuruga omu cucu? Mananu akaba ataroho! Akaba atali mwomezi. Nahabw’ekyo Yahwe obu yagambire ngu Adamu ‘yakugarukire omu itaka’ kikamanyisa ngu Adamu yakufire. Adamu tiyakuhindukire akagenda mu nsi ey’ebyomezi eby’omwoyo. Ha kufa kwe yakufookere nkata kabahoga rundi ekintu ekitaine bwomezi. Ekifubiro kye kyali kufa,—obutaba n’obwomezi—tikyali kyakuhinduka kugenda mu mwanya gundi.—Abarumi 6:23.

Kandi hati abo abandi abafire? Omulingo abafu ogubalimu nigusobororwa kurungi omu Omugambizi 9:5, 10 nambere tusoma tuti: “Abafire tibamanyire kigambo nekimu . . . tiharoho mulimo nobukwakuba okuhanura nobukwakuba okumanya nobugakuba amagezi, [o]kuzimu nambere orukugenda.” Nahabw’ekyo okufa mulingo gw’obutabaho. Omuhandiki wa Zabuli akahandika ngu omuntu obwafa “omwoyo gumurugamu, agaruka omu itaka lye; omu kiro ekyo ebitekerezo bye nubwo bihwaho.”—Zabuli 146:4, NW.

Mu mazima abafiire tibaine eki barukumanya kandi tibaine ekibarukukora. Tibamanyire na kintu kyoona. Tibasobora kukurora, kukuhurra, rundi kubaza naiwe. Tibasobora kukuyamba rundi kukukora akabi koona. Nahabw’ekyo tosemerire kutiina abafu. Baitu omwoyo ‘gurugamu’ guta omu muntu habwire bw’okufa kwe?

Omwoyo ‘Gugaruka Hali Ruhanga ow’Amazima’

Baibuli egamba ngu omuntu obwafa ‘omwoyo gugaruka hali Ruhanga ayaguhaire.’ (Omugambizi 12:7) Hati kinu nikimanyisa ngu omwoyo guruga omu mubiri nigugenda kuraba omu mwanya kuhika obuguhika omu maiso ga Ruhanga? Nangwa! Omulingo Baibuli gy’ekozesa ekigambo ‘okugaruka’ tikirukumanyisa ngu haroho kugenda kwona kuruga mu kikaro kimu kugenda mu kindi. Nk’ekyokurorraho, Abaisareri abatali besigwa bakagambirwa ngu ‘mugaruke namberendi: nanyowe ndigaruka namberemuli, agambire Yahwe Ruhanga wa mahe.” (Maraki 3:7) ‘Okugaruka’ kwa Baisareri hali Yahwe kwali nikumanyisa okuhinduka kuruga mumihanda emibi bakagaruka mwogu ogwarukusima. Kandi Yahwe ‘okugarukira’ Abaisaeri kyali nikimanyisa kugaruka kubagirra ekisa nkoku akaba nakora. Mumiringo enu yombi ‘okugaruka’ kyali nikitwarramu entwaza y’ebintu ekyali kitali ky’okuruga mukikaro kimu kugenda mu kindi.

Mulingo nugwo gumu, ha kufa busaho kintu ekiruga omu muntu kikagenda mukikaro ekindi rundi eky’emyoyo, obu omwoyo ‘gugaruka’ hali Ruhanga. Ijuka omwoyo mani g’obwomezi. Amani ganu abu gaba garugiire omu muntu, Ruhanga wenka nuwe aine obusobozi kugamugarramu. ‘Omwoyo okugaruka hali Ruhanga’ ow’amazima nikimanyisa ngu okunihira kw’obwomezi bwona obw’omu maiso obwogu afiire kuba mu mikono ya Ruhanga.

Cumitiriza ha kyokurorraho, nkoku Ebyahandikirwe bigamba ha kufa kwa Yesu. Omuhandiki w’enjiri Luka akahandika ati: “Yesu obuyamazire okwamuza mwiraka erihango yagamba ati: ‘Isenyowe, omu mikono yawe mpaireyo omwoyo gwange:’ kandi obuyamazire okugamba eki yahayo obwomezi.’ (Luka 23:46) Omwoyo gwa Yesu obu gwamurugiremu, eki kitamanyise ngu hati akaba ali mu muhanda nagenda omu iguru. Yesu akahumburwa hanyuma y’ebiro bisatu; hanyuma akamara ebiro 40 nukwo yatembere omu iguru. (Engeso 1:3, 9) Habwire bw’okufa kwe, Yesu akaba aine obwesige bw’amani obuyataire omwoyo gwe mu mikono ya Ise, nagumiza kimu mubusobozi bwa Yahwe kumugarra abe mwomezi.

Ego, Ruhanga wenka nuwe arukusobora kugarra omuntu kuba mwomezi. (Zabuli 104:30) Kinu nikitwiguirraho okunihira kwa mani!

Okunihira okw’Amazima

Baibuli egamba: “Akasumi nikaija boona abali omu bituro ebirukwijukwa akabalihuliramu iraka lye [Yesu] kandi bakarugamu. (Yohana 5:28, 29, NW) Ego Yesu Kristo akaraganiza ngu abo boona Yahwe abarukwijuka balihumburwa rundi baligarurwa obwomezi. Mukikaro ky’ebirango ebyenaku byabo abafiire halibaho kusasana kwa makuru ag’okusemererwa garukukwata hali abo abaliba bagarwirwe kuba bomezi. Kakiriba kyomuhimbo gw’amani okutangirra enganjani zawe okuruga mu bituro!

Wakugondeze kumanya ebirikukiraho h’amulingo gw’okusobora kutungamu emigaso kuruga mukunihiza kunu okwa Ruhanga ‘arukuha’? Nitukutangirra kuhandikira hali emu handagirro erukwolekwa hansi, osobole kutunga ha brocuwa erukumanywa nka Ruhanga Natwetagisa Ki?

Kwihaho kyolekerwe kundi, ebyokujurra byona birugire mu Baibuli y’Orutoro eya 1965.