Amakuru amarungi Na. 37

Obutumwa Hali Ensi Yoona

Emperu ya Madiini ag’Ebisuba Eri Haihi!

▪ Amadiini ag’ebisuba nikyo kiki?

▪ Galihwaho gata?

▪ Kinu kirakukwataho kita?

Amadiini ag’ebisuba nikyo kiki?

Otuntwire muno habw’obucwi bw’ebiragiro omw’ibara lyamadiini? Ebi ebirukukorwa nk’okwetahya mumalemu, omwoyo gw’obwisi hamu n’obuli bw’enguzi nabo abarukwefora ngu nibahereza Ruhanga, bikubihize muno ha bikukwata habwinganiza okubukubaire nambere oli? Habwaki nikizo­oka ngu amadiini nigo ndugirro y’emitalibane yoona?

Ensobi teri hali ediini zoona, baitu eri hali amadiini ag’ebisuba. Omunyadiini ruranganwa arukutebwamu ekitinisa Yesu Kristo akoleka ngu amadiini ag’ebisuba galetera abantu okukora ebintu ebibi, ‘omuti ogubihire gwana ebyaana ebibihire.’ (Matayo 7:15-17) Byaana ki ebi amadiini ag’ebisuba ebigalesere?

Amadiini ag’Ebisuba  . . .

◼ GETAHYA OMU MALEMU HAMU N’EBY’OBULEMI: Orupapura rw’amakuru orw’Asiaweek, rukagamba ngu “ensi ez’omu Asia n’eziherraineho abalemi abaine omururu gw’okulema nibakozesa enyikiriza z’abantu okweyigusa bonka.” Hamuheru rukahabura ruti: “Ensi yoona eri haihi n’okugwa iraro.” Omunyadiini omu ruraganwa kuruga omu Amerika akarangirra ati: “Oine kwita abo boona abaine omwoyo ogw’obwisi nukwo omaleho obwisi bwoona.” Enu niyo njangurra ye ey’ebintu: “Boona bahwerekerezebwe mw’ibara lya Mukama.” Kutasisana enkora egi, Baibuli egamba eti: “Omuntu obwagamba ati Ningonza Ruhanga, kandi nanoba mugenziwe, nuwe mubihi.” (1 Yohana 4:20) Yesu nawe akagamba: “Mugonzege abanyanzigwa banyu.” (Matayo 5:44) Amadiini aingaha egorukumanya mbere abakurasi baago betahya mubulemu?

◼ KURARANGYA ENYEGESA Z’EBISUBA: Amadiini agarukukira obwingi gegesa ngu omwoyo kicweka ky’omuntu ekitakurorwa ekitaffa. Okuraba munyegesa enu amadiini ganu gahambirize abakurasi bago akusasurra emikoro y’okusabira emyoyo yabo ababa bafiire. Baitu Baibuli eyegesa enyegesa ey’embaganiza. “Abomezi bamanyire balifa: baitu abafire tibamanyire kigambo nekimu.” (Omugambizi 9:5) Yesu akegesa ngu abafiire balihumburwa, okuhumbuka kwakubaire kutaine mugaso kakuba omuntu yakubaire aine obwomezi oburukweyongerayo kwomera hanyuma y’okuffa. (Yohana 11:11-25) Ediini yawe eyegesa ngu omwoyo tiguffa?

◼ OKUGUMISIRIZA ENGESO EMBI EZ’OBUSIHANI: Omunsi nyingi, ebitebe by’amakanisa bikomere abakurasi babo abamanyirwe ngu bali basaija abarukubyama n’abasaija batahi babo, hamu nabo abarukwefora bakazi okuba abahule, kandi beyongire okusindikiriza abalemi ngu baikirize obuswezi bwa basaija na basaija. N’ekanisa ezijumirra engeso z’obusihani zeyongire kugumisiriza abakuru bazo abarukumanywa ngu nibasihana n’abaana bato. Baitu, Baibuli eyegesaki? Egambira kimu butunu eti: ‘Mutalibihwabihwa nobubakuba abanjuka, nobubakuba abaramya ebisisani, nobubakuba abasihani, nobubakuba abafooka abakazi nobubakuba abakuhya tibaligwetwa bukama bwa Ruhanga.’ (1 Abakolinso 6:9, 10) Nomanyayo amadiini agarukusembera kimu engeso zinu ez’obusihani?

Kiki ekirahika h’amadiini ago goona agarukwana ebyaana ebibihire? Yesu akahabura ati: ‘Omuti gwona ogutaana ebyaana ebisemire bagutema bagunaga omu mu’ro.’ (Matayo 7:19) Kyamananu, amadiini ag’ebisuba nigaija kwihwaho hamu n’okuhwerekerezebwa! Galihwaho gata kandi kiribaho ddi? Obunabbi obwahandikirwe mu kitabu ekya Baibuli eky’Okusuku’rwa, esura eya 17 na 18, nibutuha eky’okugarukamu.

Amadiini ag’ebisuba galihwaho gata?

Cumitiriza hali kinu. Omusihani aikalire ha mugongo gw’ekisoro ekikutinisa muno. Ekisoro kinu kiine emitwe musanju hamu n’amahembe ikumi. (Okusuku’rwa 17:1-4) Omusihani onu nakikirra ki? Aine obusobozi hali “abakama abensi.” Ajwaire engoye za bafuta, n’akozesa n’obubbani, kandi ngu mugudda muno. Okwongereza hali kinu, habw’eby’oburogo bwe, ‘amahanga goona gakabihwabihwa.’ (Okusuku’rwa 17:18; 18:12, 13, 23) Baibuli netukonyera okwetegereza ngu omukazi onu omusihani nikyo kitebe ky’amadiini ag’ensi yoona. Tarukukikirra ediini emu yonka, kwihaho amadiini goona agarukwana abyaana ebibihire.

Ekisoro eki omukazi aikalireho, nikikikirra ekitebe ky’obulemi eky’ensi yoona.a (Okusuku’rwa 17:10-13) Amadiini ag’ebisuba gaikaliire ha mugongo gw’ekisoro kinu eky’obulemi n’okulengaho kukyoleka ekyokucwamu kandi n’okukiragira ekyokukora.

Mukasumi akatali kahara ekintu ekyokuhuniriza nikigenda kubaho. “Namahembe ikumi agoboine nekisoro, abo balinoba omusihani, balimulekesa ali kwonka, balirya enyamaye, balimwokeza kimu nomu’ro.” (Okusuku’rwa 17:16) Mukikorwa ekyabwangu kandi eky’okuhunirra, ekitebe eky’obulemi eky’ensi kirihindukira amadiini goona ag’ebisuba n’okugahwerekerereza kimu! Kiki ekiriretereza ekikorwa kinu? Ekitabu eky’omu Baibuli Eky’Okusuku’rwa nikigarukamu kiti: ‘Ruhanga akakita omu mitima yabu okukora ebiyahanuire.’ (Okusuku’rwa 17:17) Ego, Ruhanga naija kusarra amadiini goona ag’ebisuba omusango habwebyo byoona ebibi ebi gakozire mw’ibara lye. Mukikorwa eky’obwinganiza obuhikirire, alikozesa banywani be ab’ebyobulemi nk’eky’okumuhwerekereza.

Hati iwe oine kukora ki obwaraba otarukwenda kuhwerekerezebwa hamu n’amadiini ag’ebisuba? Omukwenda wa Ruhanga natuhabura ati: “mumuturukemu abantu bange.” (Okusuku’rwa 18:4) Mananu hati bunu nubwo obwire kwiruka kuruga omu madiini ag’ebisuba! Baitu orairukira nkaha? Toine kwirukira mubakafiri abataine kunihira kwona. (2 Abasesalonika 1:6-9) Ekikaro ky’okwirukiramu nikyo mudiini eya mananu. Nosobora ota kumanya ngu enu niyo diini aya mananu?

Omulingo ogw’orukusobora kuzoramu ediini y’amananu

Byaana ki ebirungi eby’ediini ey’amananu ebyeyana?—Matayo 7:17.

Ediini ey’Amananu  . . .

◼ EYOLEKA OKUGONZANGANA: Abaramya ab’amananu “tibali bensi,” tibabaganizibwemu erangi rundi enganda kandi boleka ‘okugonzangana inywenka.’ (Yohana 13:35; 17:16; Engeso 10:34, 35) Mukikaro ky’okwitangana boleka omutima gw’okuferrangana.—1 Yohana 3:16.

◼ BESIGA EKIGAMBO KYA RUHANGA: Mukikaro ky’okwegesa “engeso” ‘n’ebiragiro eby’abantu nk’ebyokukwata,’ enyegesa zoona az’ediini ey’amananu zina kusigikirra omu Kigambo kya Ruhanga, Baibuli. (Matayo 15:6-9) Habwaki? Habwokuba ‘ebihandikirwe byoona ebiterekerezebwa omwoyo gwa Ruhanga nibigasa habwokwegesa, habwokuhana, habwokusobo’ra.’—2 Timoseo 3:16.

◼ BAGUMYA AMAKA KANDI BALINDA ENGESO ENUNGI: Ediini y’amananu eyegesa abasaija ‘okugonza abakazi babu nkemibiri yabu,’ ekonyera n’abakazi okutamu ‘baibabo ekitinisa,’ kandi eyegesa abaana ‘okuhurra abazaire babu.’ (Abefeso 5:28, 33; 6:1) Okwongereza hali kinu, abo boona abaine obujunanizibwa mu kitebe baine okutekaho ekyokurorraho ekirungi mungeso.—1 Timoseo 3:1-10.

Haroho ediini yoona erukuhikiriza binu byoona? Ekitabu ekirikwetwa Holocaust Politics, ekyatiirwe mu mwaka 2001, nikigamba ngu: “Kakuba abantu baingi bakukuratire ebi Bakaiso ba Yahwe begesa, n’okubikorraho obwisi obwingi obwabaireho, tubwakubaireho, hamu n’obutemu obuli munsi yoona tibwakubaireho.”

Mananu, Abakaiso ba Yahwe abali munsi 235, tibamara gegesa ngeso za Baibuli zonka baitu bazikorraho. Nitukusaba okaguze omu h’Abakaiso ba Yahwe okukukonyera okumanya Ruhanga ekyarukukwetagisa nukwo osobole kumuramya nkoku arukugonza. Bunu nubwo obwire obwokukorraho. Otakerererwa. Emperu y’amadiini ag’ebisuba eri haihi!—Zefaniya 2:2, 3.

Obworaba noyenda kumanya bingi ebirukukwata habutumwa obukuruga omu Baibuli obw’Abakaiso ba Yahwe obu begesa otatiina okubahikirra hali emu handagirro eri hansi.

□ Ninsaba akatabu kamu aka Ba Bulindaara!

□ Yoleka h’okusangwa nukwo osobole okutunga okusomesebwa okwabusa.

[Obugambo obuli hansi]

[Ebigambo ebirukusoborra ekisisani ekiri ha rupapura 3]

Amadiini ag’ebisuba gaine obusobozi hali “abakama bensi”

[Ebigambo ebirukusoborra ekisisani ekiri ha rupapura 3]

“Mumuturukemu abantu bange”