Omulingo Baibuli Ebazaho Okugaiturura n’Okwahukana

Yahwe n’agonza abaswerangaine kuhikiriza endagaano ei baragaine. Obu yateraniize omusaija n’omukazi ab’okubanza omu buswere, akagamba ati: “Omusaija . . . [agume] na mukaziwe: nabo baliba omubiri gumu.” Hanyuma, Yesu nauwe akabazaho ensongo enu ati: “Nukwo Ruhanga ekiyateraniize ahamu, omuntu atalikibaganizamu.” (Okubanza 2:24; Matayo 19:3-6) Nahabweki, Yahwe na Yesu nibagonza abaswerangaine bagume hamu kuhikya ha kufa. (1 Abakolinso 7:39) Kusigikirra obuswere oku buli oburukwera, ensonga y’okugaiturura tesemeriire kutwarwa nk’ey’okuzanisa.​—Maraki 2:15, 16.

Kusigikirra ha Byahandikirwe, nsonga ki esobora kurugirraho abaswerangaine kugaiturura? Yahwe anoba obusihani. (Okubanza 39:9; 2 Samuiri 11:26, 27; Zabuli 51:4) Kwoleka ngu anobera kimu obusihani, Yahwe n’aikiriza okugaiturura kakuba omu ha baswerangaine asihana. (Kumanya ebirukukiraho ha bikwatiraine n’obusiihani, rora Esuura eya 9, akacweka 7 erukusoborraho ensonga enu) Ogu ataine omusango Yahwe n’amuha obusobozi bw’okwecweramu okugaiturura rundi kusigara na mugenzi we omu buswere. (Matayo 19:9) Nahabweki, kakuba ogu ataine musango acwamu kusaba agaitururwe, n’aija kuba ataine omusango omu maiso ga Yahwe. Baitu ekitebe eky’Abakristayo tikitererra omuntu weena kugaitururwa. Kandi nihasobora kubaho ensonga erukuletera ogu ataine musango kwikara nanyakusihaine kukira muno kakuba aba ayegarukiremu kuruga ha mutima. N’obu kiraaba kiri kiti, abo abarukwikirizibwa kugitururwa baine kwecweramu bonka eky’okukora kandi baikirize byona ebirarugamu kusigikirra ha ncwamu ei bakozere.​—Abagaratiya 6:5.

Oihireho okusihana, haroho ensonga ezindi ez’amaani muno ezireteriize Abakristaayo abaswerangaine okwahukana rundi okugaiturura. Omu nsonga nka zinu, Baibuli n’etererra ogu anyakwahukaine okutataha obuswere obundi, kandi kakuba agonza kugaruka omu buswere, agarukemu aikale n’omugenzi we ou bateranizibwe nauwe omu butongole. (1 Abakolinso 7:11) Omukristayo nk’ogu tasemeriire kuswerwa rundi kuswera omuntu ondi. (Matayo 5:32) Katubazeho zimu ha nsonga zinu ez’amaani muno ezirukusobora kuletera abaswerangaine okwahukana.

Kakuba akigenderra kwanga kulorerra ab’omu ka ye. Nyineka n’asobora kukigenderra kwanga kurolerra ab’omu ka ye kandi kinu kikabarugirramu kubonabona bataine ebyetago eby’obwomeezi. Baibuli n’egamba: “Baitu omuntu wena obwatalisa . . . abomu njuye, buli ayehakaine okuikiriza, nakira obubi atarukuikiriza.” (1 Timoseo 5:8) Omusaija nk’ogu kakuba atahinduraho, omukazi n’asobora kucwamu kugenda omu balemi nukwo bahukane omu butongole kusobora kujuna obwomeezi bwe n’obw’abaana be. Abagurusi omu kitebe basemeriire kubanza kumanya obu garaaba gali mananu ngu omusaija Omukristayo ayangire kurorerra ab’omu ka ye. Kakuba gaba mananu, n’asobora kubingwa omu kitebe.

Kubonabonesebwa ekihinguraine. Omu ha baswerangaine n’asobora kubonabonesa mugenzi we muno kikaletera obwomeezi bw’omugonzebwa we kuba omu kabi. Kakuba arukubonabonesa mugenzi we aba ali Mukristayo, abagurusi basemeriire kuseruriza obu garaaba gali mananu. Ekiniga hamu n’okurwana biri bimu ha bintu ebisobora kubingisa omuntu omu kitebe.​—Abagaratiya 5:19-21.

Obwomeezi bw’eby’omwoyo obwa mugenzi waawe kubuta omu kabi. Omu ha baswerangaine n’asobora kwikara n’alemesa mugenzi we kuramya Yahwe rundi n’asobora kwikara namusindikiriza kucwa ekiragiro kya Yahwe. Kakuba ekintu kinu kibaho, ou barukubonesa n’asobora kwecweramu kurora okwahukana omu butongole obu guraaba nugwo guli mulingo ‘gw’okuhu’ra Ruhanga okukira abantu.’​—Engeso Ezabakwenda 5:29.

Omu nsonga zinu zoona ezi tubalizeho, twijuke ngu busaho muntu asemeriire kwetahya omu nsonga z’abaswerangaine n’alengaho kuha amagezi ngu ou barukubonesa ayangane rundi agumisirize. Abakristayo abakuzire omu by’omwoyo rundi abagurusi nibasobora kuha obukonyezi rundi obuhabuzi kuruga omu Baibuli, baitu baijuke ngu tibarukumanya ensonga zoona eziri hagati y’omusaija n’omukazi we. Yahwe wenka nuwe arukumanya buli kimu kyona ekirukugenda omu maiso. Kandi, omukazi rundi omusaija Omukristayo n’aba atarukutamu Yahwe hamu n’entekaniza y’obuswere ekitinisa kakuba atumbisa ebizibu bye omu ka nukwo ayahukane n’omugonzebwa we. Yahwe n’amanya obugobya bwona obuba enyuma y’okwahukana omuntu n’obwakulengaho kubusereka. Baibuli egamba, “Baitu ebintu byona biri kwonka, kandi bisukuliirwe omu maiso gogu outuletera ebigambo byaitu.” (Abaheburaniya 4:13) Baitu kakuba enyikara embi eyeyongera, busaho omuntu asemeriire kucwera Omukristayo omusango kakuba acwamu kwahukana n’omugonzebwa we. Ha mpero ya byona, “Itwena tulyeme’ra omu maiso gekitebe ekicwe’rwaho emusango ekya Ruhanga.”​—Abarumi 14:10-12.