ISOMO 8

Habwaki Tujwara Kurungi obu Tuba Nitugenda omu Nso’rokano Zaitu?

Omuzaire hamu n’omwana we nibajwara kugenda omu ruso’rokano — Iceland

Omukazi hamu n’omwana we nibetekaniza kugenda omu ruso’rokano — Mexico

Abakaiso ba Yahwe bajwaire kurungi omu ihanga lya Guinea-Bissau — Guinea-Bissau

Eka enu omu ihanga lya Philippines n’erubata kugenda omu ruso’rokano — Philippines

Oyetegerize omu bisisani ebiri omu katabu kanu nkoku Abakaiso ba Yahwe bajwara kurungi bali omu nso’rokano? Habwaki tufaayo muno ha njwara n’enzooka yaitu?

Tukikora kuhaisa Ruhanga waitu ekitiniisa. Ruhanga tarora kusisana kwaitu kwa haiguru kwonka. (1 Samuiri 16:7) Baitu obutuso’rokana hamu, tuba n’ekigendererwa ky’okuhereza Ruhanga n’Abakristaayo bagenzi baitu ekitiniisa. Obu tuba tuli b’okwemerra omu maiso g’omucwi w’emisango omu kooti, tulengaho kujwara omu mulingo ogurukwoleka ngu nitumutekamu ekitiniisa. Nahabwekyo, enzooka yaitu omu nso’rokano eyoleka ekitiniisa ekituha ‘omucwi w’emisango w’ensi zoona,’ Yahwe Ruhanga, n’ekiikaro eki tumuramizamu.—Okubanza 18:25.

Kwoleka emisingi eyituhondera omu bwomezi bwaitu. Baibuli etererra Abakristaayo kujwara “ebisemire hamu nokwerinda” nkoku kisemerire abo ‘abatiina Ruhanga.’ (1 Timoseo 2:9, 10) Kujwara “ebisemire” kimanyisa kwerinda kujwara engoye ezikurorrana rundi ezirukwoleka ebicweka byaitu eby’omubiri ebitasemerire kurorwa. “Okwerinda” kutukonyera kujwara engoye ezirukuzooka kurungi baitu ezitakujagaraza. Emisingi enu eha buli omu obugabe obw’okwecweramu eky’arukugonza. Hataroho kugurukyagurukya, enzooka yaitu enungi ehaisa “ekitinisa okwegesa okwomujuni waitu” ‘kandi enyumiza Ruhanga.’ (Tito 2:10; 1 Petero 2:12) Obu tujwara kurungi tuli omu nso’rokano zaitu, kiretera abantu bandi kuhereza Yahwe ekitiniisa.

Enjwara yawe etakulemesa kwija omu nso’rokano. Engoye zaitu tizine kuba za sente nyingi baitu zisemerire kuba nizerra kandi nizihaisa ekitinisa.

Habwaki kikuru kujwara kurungi tuli omu nso’rokano?
Misingi ki ey’etukonyera ha mulingo tusemerire kujwara n’okwekoraho?