Omwiru Omwesigwa kandi ow’Amagezi Nuwe Oha?

Nihakyaburayo akasumi kake aitwe, Yesu akabazaho na bbana ha begeswa be, Peteero, Yakobo, Yohana, na Andereya. N’abaza ha manyikirizo y’okubaho kwe omu biro bya ha mpero, akakaguza: “Araha omuiru ogu orubale owokwesiga owamagezi, omukamawe ouyasigire abomukaye, okubaha ebyokulya byabu omu kasumi kabu?” (Matayo 24:3, 45; Marako 13:3, 4) ‘Nk’Omukama’ waabu, Yesu akaba n’agumya abegeswa be ngu y’akukomere abantu abamu abakugenzere omu maiso n’okubahereza ebyokulya eby’eby’omwoyo omu biro bya ha mpero. Abantu banu bakubaire nibaha?

Bahondezi ba Yesu ab’amananu abaseserweho amagita. Omwiru ahereza abantu ba Yahwe ebyokulya eby’eby’omwoyo omu bwire bwabyo. Omwiru omwesigwa nuwe ahairwe obujunanizibwa obw’okutuhikyaho ‘omugabo gwaitu ogw’ebyokulya omu kasumi kabyo.’​—Luka 12:42.

Barolerra enju ya Ruhanga. (1 Timoseo 3:15) Yesu akahereza omwiru obujunanizibwa obw’amaani obw’okurolera emirimo ekorwa ekitebe kya Yahwe eky’omu nsi. Obujunanizibwa obu butwarramu okurolerra ebintu by’ekitebe, okutwebembera omu mulimo gw’okutebeza, n’okutwegesa. Nahabwekyo, ‘omwiru omwesigwa kandi ow’amagezi’ kusobora kutuhikyaho ebiturukwetaaga, akozesa ebitabu ebitukozesa omu kutebeza n’okwegesebwa okututunga omu bitebe byaitu n’omu nso’rokano zaitu enkooto.

Omwiru onu ayetwa mwesigwa habwokuba agumirra ha mananu agali omu Baibuli kandi n’obujunanizibwa bwe obw’okutebeza amakuru amarungi abuhikiriza kurungi. W’amagezi habwokuba arolerra ebintu bya Kristo ebiri hanu omu nsi omu mulingo ogw’amagezi. (Engeso 10:42) Yahwe ahaire omulimo gw’omwiru omwesigwa omugisa y’asobora kutuhikyaho ebyetaago byaitu eby’eby’omwoyo kandi hasobora n’okubaho enkurakurana omu kutebeza.​—Isaya 60:22; 65:13.

• Nibaha abakomerwe Yesu kulisa abegeswa be omu by’omwoyo?

• Omwiru ayolekere ata ngu mwesigwa kandi w’amagezi?