ISOMO 8
Habwaki Ruhanga aikiriza Obubi n’Okubonabona?
1. Obubi bukatandika buta?
Akasumi Ruhanga akahaire abantu kulema bagenzi baabu kolekere ngu tibarukusobora kwihaho ebizibu by’abantu
Obubi bukatandika obu Setani y’abalize ekisuba ekyabandize. Setani akaba ali maraika ahikirire baitu ‘ataikale omu mananu.’ (Yohana 8:44) Akegondeza okuramya okwiina kuheebwa Ruhanga. Akabihabiha Hawa omukazi ayabandize kujeemera Ruhanga, hanyuma na Adamu nawe akabeteranizaho omu bujeemu obu. Okubonabona n’okufa bikaijaho habw’omulingo Adamu y’acwiremu.—Soma Okubanza 3:1-6, 19.
Setani obu y’aletiire Hawa kujeemera Ruhanga, akatandikaho obujeemu hali obulemi bwa Ruhanga. Abantu abarukukira obwingi beteranize ha Setani bayanga Obulemi bwa Ruhanga. Omu mulingo ogu, Setani afookere “omulemi wensi.”—Soma Yohana 14:30; 1 Yohana 5:19.
2. Ebihangwa bya Ruhanga bikaba bitahikirire?
Byoona Ruhanga ebi y’ahangire bikaba bihikirire. Akahanga abamaraika n’abantu nibasoborra kimu kumworobera. (Ekyebiragiro 32:4, 5) Kandi akatuhanga twiina obugabe bw’okwecweramu kukora ekirungi rundi ekibi. Obugabe obu butusobozesa kwoleka ngu mali nitugonza Ruhanga.—Soma Yakobo 1:13-15; 1 Yohana 5:3.
3. Habwaki Ruhanga alekereho okubonabona n’okuhikya hati?
Habwaki Yahwe alekere obujeemu kugenda omu maiso? Akikozire kusobora kwoleka abantu ngu We nambere atali, tibarukusobora kwerema bonka. (Omugambizi 7:29; 8:9) Harabireho emyaka 6,000 kuruga omuntu ahangwa baitu abebembezi b’ensi tibasoboire kumaraho bulemu, obucwi bw’ebiragiro, obutali bwinganiza, rundi endwaire.—Soma Yeremiya 10:23; Abarumi 9:17.
Butasisana obulemi bw’abantu, obwa Ruhanga bugasira boona ababwikiriza. (Isaya 48:17, 18) Omu kasumi akatali kahara Ruhanga obw’araihaho gavumentu z’abantu zoona, abo bonka abaikiriza kuba hansi y’obulemi bwe nubo bonka abarasigara omu nsi.—Isaya 11:9.—Soma Danieri 2:44.
Rora vidiyo Habwaki Ruhanga Alekereho Okubonabona?
4. Okugumisiriza kwa Ruhanga kutuhereza akagisa k’okukora ki?
Setani akagamba ngu abantu boona bahereza Ruhanga habwokuba aina eby’abaha. Haroho omulingo ogw’orukusobora kwoleka ngu ebya Setani y’abalize bisuba. Okugumisiriza kwa Ruhanga itweena kutuha akagisa k’okwoleka rubaju ki oru tukusagika—orwa Ruhanga rundi orwa’bantu. Omulingo ogu twetwaramu nugwo gwoleka rubaju ki oru tukomereho kusagika.—Soma Yobu 1:8-11; Enfumo 27:11.
5. Nitusobora tuta kukomamu Ruhanga nk’Omulemi waitu?
Ebitucwamu byoleka ngu nitugonza Ruhanga kuba Mulemi waitu
Obu twega ebirukukwata ha kuramya okw’amananu kandi tukabikorraho, tuba tukomeremu Ruhanga kuba mulemi waitu. (Yohana 4:23) Kandi obu twanga kwetahiriza omu bulemu n’eby’obulemi bw’ensi enu nkoku Yesu y’akozere, tuba twecwire ha bulemi bwa Setani.—Soma Yohana 17:14.
Setani akozesa obusobozi bwe kuletera abantu kukora ebintu eby’obusihani. Abamu ha banyabuzaale baitu n’enganjani zaitu obu baturora tutakukora ebintu ebibi batusekereza n’obundi batuhakaniza. (1 Petero 4:3, 4) Nahabwekyo twiina kucwamu eki turakora. Turakomamu kukoragana n’abantu abarukugonza Ruhanga, n’okworobera ebiragiro bye eby’amagezi? Obu turakora tutyo, nitwija kwoleka ngu mali Setani akaba n’abaza ebisuba obu y’agambire ngu abantu tibarukusobora kuhereza Ruhanga baine ebizibu.—Soma 1 Abakolinso 6:9, 10; 15:33.
Okugonza Ruhanga okw’agirra abantu tikurukutulekamu okugurukyagurukya kwoona ngu naija kumaraho okubonabona. Boona abarukwikiriza kinu nibaija kwegondeza omu nsi ebiro byoona.—Soma Yohana 3:16.