Amaka Gaawe Nigasobora gata Kubamu Okusemererwa?

1. Kuhandiikisa obuswere kikonyera kita amaka kubamu okusemererwa?

Amakuru amarungi garuga hali Yahwe, Ruhanga ow’okusemererwa ow’agonza amaka gabemu okusemererwa. (1 Timoseo 1:11) Nuwe y’atandikireho obuswezi. Abaana abakuliire omu maka nambere abazaire bali omu buswezi oburukwikirizibwa baba n’obulinzi. Abakristaayo kibasemerire kuta ekitiinisa omu biragiro ebirukukwata ha kuhandiikisa obuswezi omu kicweka kyaabu.​—Soma Luka 2:1, 4, 5.

Ruhanga aina ntekereza ki ha buswezi? N’agonza obuswezi hagati y’omusaija n’omukazi bube bw’oruteekerro. Yahwe n’agonza buli omu ha baswerangaine kwesiga mugenzi we. Tarukugonza okugaitururwa. (Maraki 2:16) Baitu omu ha baswerangaine obw’akora obusihani, Ruhanga aikiriza mugenzi we kugaitururwa nawe, kandi akasigara n’asobora kutandika obuswezi obundi.​—Soma Matayo 19:3-6, 9.

2. Nyineka na nyinabwenge basemerire kwetwara bata?

Yahwe akahanga abasaija n’abakazi n’agonza buli omu abe mukonyezi wa mugenzi we. (Okubanza 2:18) Nk’omutwe gw’amaka, nyineka aina obujunanizibwa obw’okurolera ab’omu ka ye n’abahikyaho ebi barukwetaaga kandi n’abegesa n’ebirukukwata hali Ruhanga. Aine kwega kwefereza habwa mukazi we, kandi bombi baine kugonzangana n’okuherezangana ekitiinisa. Nkoku kiri nti tibahikirire, kibasemerire kwega kuganyirangana nukwo babe n’okusemererwa omu maka gaabu.​—Soma Abefeso 4:31, 32; 5:22-25, 33; 1 Petero 3:7.

3. Musemeriire kwahukana kakusangwa amaka gaanyu gaba garumu emitalibaine?

Emitalibaine obu ija omu maka, buli omu aina kulengaho muno kurabya mugenzi we omu mulingo ogw’engonzi. (1 Abakolinso 13:4, 5) Ekigambo kya Ruhanga tikikiriza kwahukana nk’omulingo ogw’okumaraho emitalibaine ekira kuba omu maka.​—Soma 1 Abakolinso 7:10-13.

4. Abaana, kiki Ruhanga eky’arukubagondeza?

Yahwe n’agonza abaana baikale basemerirwe. Abaheereza amagezi agarukukirrayo kimu oburungi agarukusobora kubakonyera kukozesa emyaka yaabu ey’obusigazi kurungi. Kandi n’agonza bagasirwe omu magezi n’okumanya abazaire baabu ebi baine. (Abakolosai 3:20) Yahwe n’agonza omanye ngu kumuheereza uwe n’Omwana we kireeta okusemererwa kwiingi.​—Soma Omugambizi 11:9–12:1; Matayo 19:13-15; 21:15-16.

5. Abazaire basemerire kukora ki kurora ngu abaana baabu basemererwa?

Abazaire baine kukora n’amaani kusobora kutungira abaana baabu ebyokulya, ah’okurara aharungi, n’eby’okujwara. (1 Timoseo 5:8) Abazaire basemerire kwegesa abaana baabu kugonza Ruhanga n’okumwikiriza abegese. (Abefeso 6:4) Omwana waawe obw’arakirora ngu n’ogonza Ruhanga, naija kutwara eky’okuroraho kyawe. Omwana waawe obw’oramwegesa n’okozesa Ekigambo kya Ruhanga nikiija kumukonyera kukura ali muntu ow’amagezi.​—Soma Ekyebiragiro 6:4-7; Enfumo 22:6.

Abaana kibagarramu muno amaani obu basiimwa baine ekirungi eki bakozere. Baitu okuhana n’okubaterekereza nabyo bikuru. Obu batendekwa omu mulingo ogu, kibasobozesa kwetantara ebintu ebimu ebyakubanagire omu mitalibaine. (Enfumo 22:15) Okuterekereza kwiina kuheebwa n’embabazi hatali n’ekiniga.​—Soma Abakolosai 3:21.

Abakaiso ba Yahwe bateera ebitabu biingi ebirukusobora kukonyera abazaire hamu n’abaana baabu. Ebitabu binu bisigikirra ha Baibuli.​—Soma Zabuli 19:7, 11.