Yosiya Akaba n’Abanywani Abarungi

Haroho obundi obw’ohu’ra kigumire kukoro ekintu ekihikire?— Abantu abarukukira obwingi kibagumiira kukora ekihikire. Baibuli etugambira hali omwojo ou bayetaga Yosiya ayakisangire kigumire kukora ekihikire. Baitu banywani be abarungi bakamukonyera kukora ekihikire. Katwege ebirukukiraho hali Yosiya na banywani be.

Amoni omukama wa Yuda nuwe yabaire ise Yosiya. Amoni akaba mukama mubi kandi yaramyaaga ebisisani. Amoni obu yafiire, Yosiya nuwe yafookere mukama. Baitu akaba aine emyaka munaana yoonka! N’oteekereza Yosiya akaba mubi nka ise?— Nangwa, uwe akaba murungi.

N’obwakaba ali muto, y’agonzaga kworobera Yahwe. Nahabwekyo akacwamu kukoma abantu abagonzaga Yahwe kuba banywani be. Bakamukonyera kukora ebirungi omu maiso ga Yahwe. Abamu ha banywani ba Yosiya baali nibaha?

Omu hali bo akaba nuwe Zefaniya. Zefaniya akaba nabbi ayagambiraga abantu ngu kakuba batalekaho kuramya ebisisani, ebintu ebibi bikaba nibigenda kubahikaho. Yosiya uwe akahuliriza. Yaramyaga Yahwe weenka.

Ondi ha banywani ba Yosiya akaba Yeremiya. Bakaba haihi nibaingana omu myaka kandi baikaraga haihingana obu baali bato. Baali banywani muno. Yosiya obu yafiire, Yeremiya akahandiika ekizina n’ayoleka obujune obw’amaani obw’akaba aine habw’okufeerwa munywani we. Yeremiya na Yosiya, buli omu y’agambaga mugenzi we okworobera Yahwe n’okukora ekihikire.

Ekyokuroraho kya Yosiya kitwegesa ki?— Yosiya n’obwakaba ali muto, yagonzaga kukora ekihikire. Akaba akimanyire ngu banywani be baina kuba abantu abagonza Yahwe. Naiwe osemerire kukoma abanywani abagonza Yahwe kandi abarasobora kukukonyera kukora ekihikire.