Yesu Yali Muhulizi

Kikwanguhira kworobera bazaire baawe?— Obundi kiba kizibu. Obaire okimanyire ngu Yesu tiyahu’raga Yahwe weenka baitu y’ahu’raga n’abazaire be?— Ekyokuroraho kye, kisobora kukukonyera kuhulirizaaga bazaire baawe n’omu mbeera etanguhire. Katumanye ebirukukiraho.

Yesu yaikaraga omu iguru na Ise Yahwe, atakaizire omu nsi. Baitu obu yaizire omu nsi namwo akabamu n’abazaire. Amabara gaabu gakaba Yusufu na Malyamu. Omanyire nkoku banu bafookere bazaire ba Yesu?—

Yahwe akateeka obwomezi bwa Yesu omu nda ya Malyamu nukwo Yesu asobole kuzaarwa n’okwikara hanu omu nsi. Kinu kikaba ky’amahano! Yesu akaku’ra omu nda ya Malyamu nkoku abaana abandi baku’ra omu nda za ba maama baabu. Harabireho emyeezi mwenda, Yesu akazaarwa. Yusufu na Malyamu nukwo bati bafookere bazaire ba Yesu.

Yesu obwaakaba nahikya emyaka 12 akakora ekintu ekyayolekere ngu akaba mali nagonza muno Ise Yahwe. Kinu kikabaho obu yagenzere Yerusalemu n’ab’enganda ze ha bugenyi bw’okuhingurwaho. Obu baali nibagarukayo omuka hanyuma y’obugenyi, bakagenda kurora Yesu tali nabo. Omanyire nambere yali?—

Yusufu na Malyamu bakagaruka Yerusalemu kumuserra. Obu baserwire yabura bakeralikirra. Baitu hanyuma y’ebiro bisatu bakamusanga omu yekaaru. Omanyire habwaki Yesu yali omu yekaaru?— Habwokuba omu yekaru akaba nasobora kwega hali Ise, Yahwe. Yagonzaga Yahwe nahabwekyo yagonzaga kumanya omulingo gw’okukora ebimusemeza. N’obu yakuzire, akasigara n’ayorobera Yahwe. Yesu yayoroberaga Yahwe n’omu mbeera egumire kandi n’obu yakimanyaga ngu kukikora kyakumuletire obusaasi. Yusufu na Malyamu nabo yabahulirizaga?— Ego, Baibuli egamba ngu yabahulirizaga.

Ekyokuroraho kya Yesu kitwegesa ki?— Osemerire kuhu’ra bazaire baawe n’omu mbeera egumire. Orakikora?—