Timoseo Yagonzaga Kukonyera Abantu

Timoseo yali musigazi ayagonzaga kukonyera abantu. Yagendaga omu biikaro ebitali bimu kukonyera abantu. Ekyo kikamuletera okusemererwa kwingi. Wakugondeze kumanya ebiyakozere?—

Timoseo akaku’ra omu rubuga orubayetaga Rusitura. Nyinenkuru Loi na nyina Unike bakatandika kumwegesa hali Yahwe akyaali mwana muto. Timoseo obu yakuzire nauwe akaba nagonza kukonyera abantu kwega hali Yahwe.

Timoseo obu yafookere musigazi, Pawulo akamusaba bagendege hamu kutebeza omu biikaro ebiindi. Timoseo akaikiriza kugenda na Pawulo kukonyera abantu abandi.

Timoseo akagenda na Pawulo omu rubuga orumu orubayetaga Sesalonika orwasangwaga omu Makedoni. Kuhikayo bakaba baina kurubata ebiro bingi kandi bamale batembe n’eryato. Obu bahikireyo, bakakonyera abantu baingi kwega hali Yahwe. Baitu abantu boona batakigonze, abamu bakabateera amabaale. Pawulo na Timoseo bakarugayo bagenda omu biikaro ebiindi.

Emyezi obu yarabireho, Pawulo akasaba Timoseo agarukeyo omu Sesolonika arole nkoku ab’oruganda bali. Abantu b’omu rubuga oru baali babi nahabwekyo kyali nikyetagisa obumanzi kugarukayo. Kyonka Timoseo akagarukayo habwokuba akaba nagonza kumanya nkoku ab’oruganda bali. Obu yagarukire akaleetera Pawulo amakuru amarungi. Akasanga ab’oruganda bali kurungi.

Timoseo akakora na Pawulo kumara emyaka nyiingi. Haroho na Pawulo obu yahandiikire hali Timoseo ngu akaba nuwe owarukukirayo kwesiga kusindika omu b’oruganda, habwokuba yagonzaga Yahwe kandi yafayoga hali abantu.

Naiwe ogonza abantu? Ogonza kubakonyera kwega hali Yahwe?— Obukiraaba kiri kityo, naiwe noija kukozesa obwomeezi bwawe omu mulingo ogurukukirayo oburungi nkoku Timoseo yakozesize obwe.