Obukama Oburalema Ensi Yoona

N’omanya Obukama obuturukubazaho?— Nubwo Bukama bwa Ruhanga, oburafoora ensi yoona orugonjo orurungi. Wakugondeze kumanya ebirukukiraho hali Obukama bunu?—

Obukama bwona buba n’omukama. Omukama ogu alema abantu ab’omu nsi ye rundi ekiikaro kye. Omanyire Omukama w’Obukama bwa Ruhanga?— Nuwe Yesu. Aikara omu iguru. Baitu omu kasumi akatali kahara aija kulema abantu boona omu nsi! Notekereza abantu barayegondeza omu nsi Yesu obwaraaba n’alema?—

Abantu baija kwegonza. Omu rugonjo rwa Ruhanga abantu tibaija kukungana rundi kugenda omu bulemu. Buli omu aliba nagonza mugenzi we. Busaho alirwara rundi alifa. Abafu b’amaiso baliba nibarora, abafu b’amatu nabo baliba nibahu’ra, abalema baliba nibasobora kwiruka n’okuguruka. Buli muntu aliba n’ebyokulya ebirukumumara kulya. Ebisoro biriba bitakusobora kukora kubi abantu gonze bisoro bigenzi byabyo. Abantu abafiire balihuumbuka. N’abantu abatwizire nitwegaho omu katabu kanu nka Rebeka, Rahabu, Dawudi na Eriya nabo baija kuhuumbuka. Wakugondeze kubarora bahuumbukire?—

Yahwe akugonza kandi akugondeza obwomezi oburungi. Obworayeyongera kwega ebirukumukwataho kandi okeyongera kumuhuliriza oija kusobora kwikara omu rugonjo orurungi ebiro byoona! Naiwe ekyo nikyo orukugonza?—