Okwikiriza kwe Kukalengwa

Iburahimu akegesa mutabani we Isaka kugonza Yahwe n’okwesiga emirago ye yoona. Baitu Isaka obwakaba ahikize emyaka nka 25, Yahwe akasaba Iburahimu kukora ekintu ekikaba kigumire muno. Akamusaba kukora ki?

Ruhanga akagambira Iburahimu ati: ‘Twara omutabani wawe omu wenka omuhonge nk’ekihongwa ha rusozi omu nsi ya Moliya.’ Iburahimu atamanye habwaki Yahwe akaba n’amusaba kukora ekintu kinu. Baitu nabwo akorobera Yahwe.

Obwire obu bwakiire ha kiro ekyahondiireho, Iburahimu akatwara Isaka n’abaheereza be babiri bagenda Moliya. Hanyuma y’ebiro bisatu nibarubata, bakatandika kulengera orusozi. Iburahimu akagambira abahereza be babiri basigale nukwo uwe na mutabani we bagende bahonge ekihongwa. Iburahimu akaha Isaka enku azetweke nukwo Iburahimu uwe yakwata omuhyo. Isaka akakaguza ise: ‘Ekisoro ekiturukugenda kuhonga kiri nkaha?’ Iburahimu akamugarukamu ati: ‘Mutabani, Yahwe naija kukituha.’

Obu bahikire ha rusozi, bakombeka ekyoto. Nubwo Iburahimu yasiba mutabani we kandi yamuta ha kyoto.

Iburahimu obu yakwasire omuhyo, maraika wa Yahwe akamwetera omu iguru yagamba: ‘Iburahimu! Otahutaaza omwojo ogu! Hati nkyetegeriize ngu noikiririza omuli Ruhanga habwokuba obaire nogenda kuhonga mutabani wawe.’ Nubwo Iburahimu yarozere entaama amahembe gayo gakwatiire omu kisaka. Akanguha yasumurra Isaka kandi yahonga entaama omu kiikaro kye.

Kuruga ekiro eki, Yahwe aketa Iburahimu munywani we. Omanyire habwaki? Iburahimu yakoraga kyona eki Yahwe yagonzaga n’obuyabaga atamanyire ensonga habwaki.

Yahwe akongera yagarukamu eki yali araganiize Iburahimu nagamba ati: ‘Ninyija kukuha omugisa, kandi ninyija kwongera oruzaaro rwawe.’ Kinu kikaba nikimanyisa ngu Yahwe akaba n’agenda kuha abantu boona abarungi omugisa kuraba omu ka ya Iburahimu.