Omwiru Ayayorobiire Yahwe

Yusufu akaba ali omu ha baana ba Yakobo abato. Bagenzi be abakuru bakarora ngu ise bo akaba nagonza Yusufu kubakira. Notekereza bakehurra bata habw’ekintu kinu? Bakakwatirwa Yusufu ihali kandi bamunoba. Kiro kimu, Yusufu akagambira bagenzi be ekirooto eki yarosere ekitali kya buli kiro. Ubo bakatekereza akaba n’amanyisa ngu akaire nikaija kuhika bamwinamire bamuhe ekitinisa. Kinu kikabaletera kweyongera kumunoba!

Kiro kimu, bagenzi be bakaba nibaliisa entama haihi n’orubuga rwa Sekemu. Yakobo akatuma Yusufu kugenda kurora omulingo bagenzi be bakaba balimu. Obu bamulengiire naija, bagambirangana bati: ‘Dora omuroosi w’ebirooto aizire. Tumwite!’ Bakamukwata bamunaga omu kiina ekiraihire. Baitu omu ha bagenzi be arukwetwa Yuda akagamba: ‘Mutamwita! Hakire leka tumutunde nk’omwiru.’ Nahabweki bakamuguza abasubuzi aba Midiani abakaba nibagenda omu nsi ya Misiri bamugura ebicweka 20 eby’efeza.

Ekyahondiireho, bagenzi be bakakwata ekijwaro kye bakiibika omu sagama y’embuzi kandi bakisindikira isebo nibagamba: ‘Kinu tinikyo ekijwaro kya mutabani waawe?’ Aho n’aho Yakobo akamanya ngu omwana we akaba aisirwe enyamaiswa. Akakwatwa enaku y’amaani muno kandi busaho omuntu akaba n’asobora kumuhumuza.

Yusufu obu bamutwaire omu ihanga lya Misiri nk’omwiru, bakamuguza omusaija ruranganwa ayayetwaga Potifa. Baitu Yahwe akeyongera kulinda Yusufu. Potifa akarora nk’oku Yusufu akaba ali musigazi mukozi kandi mwesigwa. Obwire bukahika Yusufu bamuha obujunanizibwa bw’okurolerra ebintu byona ebya Potifa.

Mukazi wa Potifa akarora omulingo Yusufu yali n’azooka kurungi kandi aine amaani. Emirundi nyingi akaikara nasaba Yusufu kubyama nauwe. Yusufu yakukozere ki? Akanga kandi yagambira omukazi ati: ‘Nangwa! Tikihikire. Mukama wange nanyesiga, kandi iwe oli mukazi we. Kakuba mbyama naiwe, ninyija kuba nsisiire Yahwe Ruhanga!’

Kiro kimu, mukazi wa Potifa akalengaho kuhambiriza Yusufu kubyama nauwe. Akakwata orugoye rwa Yusufu yamusika, baitu Yusufu yairuka. Potifa obu yagarukire omu ka, omukazi akanyegerra Yusufu ngu akaba n’agonza kumuhamba. Akaba nabiiha ebisuba. Potifa akabihirwa muno, yateka Yusufu omu nkomo. Baitu Yahwe atebwe Yusufu.