Eky’Amahano Ekyakozerwe ha Nyanja Erukutukura

Faraho obu yakimanyire ngu Abaisareri bakaba barugire omu ihanga lya Misiri, aho n’aho akayeijukya habwaki y’abalekere kugenda. Akaragira abarwani be n’agamba ati: ‘Mutekanize ebigaali byange byona eby’obulemu tubahambye! Tubaire tutasemeriire kubaleka bakagenda.’ Uwe n’abasaija be bakatandika kuhambya Abaisareri.

Yahwe akebembera abantu be n’akozesa ekicu omu bwire bwa nyamusana, kandi yakozesaga omurro obwire bw’ekiro. Akabebembera yabatwara ha Nyanja Erukutukura, yabaragira kutera orukande.

Abaisareri bakarora Faraho n’ihe lye nibabahambya. Ha rubaju orumu hakaba haroho enyanja, kandi orubaju orundi hali haliyo ihe lya Misiri. Bakakungira Musa nibagamba bati: ‘Nitugenda kufa! Wakubaire otuleke twikale Misiri.’ Baitu Musa akabagambira ati: ‘Mutatiina. Mulinde murole omulingo Yahwe arukugenda kutujuna.’ Orozere omulingo Musa akaba n’ayesiga Yahwe?

Yahwe akaragira Abaisareri kuruga nambere bakaba batiire orukande. Omu bwire bw’ekiro, Yahwe akafurra ekicu yakigarra hagati y’Abamisiri n’Abaisareri. Ha rubaju rw’Abamisiri, hakabayo omwirima gw’amaani. Baitu ha rubaju rw’Abaisareri hakabayo ekyererezi.

Yahwe akagambira Musa kugorra omukono gwe ha nyanja. Hanyuma, Yahwe akaleta omuyaga gw’amaani ogwatiire kuhika obwire kukya. Enyanja ekabaganizibwamu, haijamu omuhanda hagati yayo. Obukaikuru n’obukaikuru bw’Abaisareri bakaraba ha itaka eryomere, hagati na hagati y’amaizi agakaba gemeriire nk’ebisiika ha mukono gw’abo gw’obulyo na ha mukomo ogw’emoso.

Faraho n’ihe lye nabo bakabahondera bataha omu nyanja nibaraba ha itaka eryomere. Aho n’aho, Yahwe akaburanganiza ihe ly’Abamisiri. Engata z’ebigaali zikatandika kurugaho. Abasirikale ba Misiri bakatandika kutokera haiguru nibagamba: ‘Twiruke turugemu! Yahwe n’abarwanirra.’

Yahwe akagambira Musa ati: ‘Gorra omukono gwawe ha nyanja.’ Aho n’aho, amaizi agakaba gakozere ebisiika gakagaruka gasweka omuhanda. Faraho n’ihe lye lyona bafa. Busaho muntu n’omu ayakizireho.

Ha rubaju rundi orw’enyanja, Abaisareri boona bakakugiza Ruhanga nibazina bati: “Ndazinira Mukama, baitu asinguire nekitiinisa; embarasi nomutembi wayo abinagire omu nyanja.” Abantu obu bakaba nibazina, abakazi ubo bakatera obugoma nibacekeca. Buli muntu akaba asemeriirwe habwokuba bakaba bacungwirwe kuruga omu bwiru.