Yahwe Akagarramu Eriya Amaani

Yezeberi akahurra ekyahikire hali banabbi ba Baali, kyamubihiza muno. Akasindikira Eriya obutumwa oburukugamba buti: ‘Nyenkya, noija kufa nk’oku abanabbi ba Baali bafiire.’ Eriya akatiina muno kandi yairukira omu irungu. Akatandika kusaba n’agamba ati: ‘Yahwe, nambere byahika ndemerwe. Ndeka nfe.’ Obu yamazire kusaba, akabyama hansi y’omuti yagwijagira.

Maraika akamusisimura yamugambira ati: ‘Imuka olye.’ Eriya akarora omugaati guli ha mabaale agarukwokya kandi yarora n’ekisisi kyamaizi. Akaimuka yalya kandi yanywa hanyuma yayongera yagwijagira. Maraika akongera yamwimukya kandi yamugambira ati: ‘Imuka olye. Noyetaga amaani habwokuba okyaine orugendo rw’amaani.’ Eriya akongera yalya kandi yarubata kumara ebiro 40 nyamusana n’ekiro, kuhikira kimu ha Rusozi Horebu. Eriya obu yahikireyo, akataaha omu bwingira yabyama. Baitu Yahwe akamukaguza ati: ‘Eriya, n’okora ki hanu?’ Eriya yamugarukamu ati: ‘Abaisareri bacwire endagano yabo hali iwe. Basesere ekyoto kyawe kandi baita banabbi baawe. Nanyowe nibanserra kunyita.’

Yahwe akamugambira ati: ‘Genda oyemerre ha Rusozi.’ Ha kubanza, omuyaga gw’amaani gukaraba ha bwingira. Hanyuma, hakaija omusisa kandi hayongeraho omurro. Hakumalirra, Eriya akahurra iraka erike. Akeswekerra ha maiso n’orugoye rwe yayemerra aheru y’obwingira. Yahwe akongera yamukaguza habwaki yali airukire. Eriya akamugarukamu yagamba ati: ‘Ninyowe nyenka asigaireho.’ Baitu Yahwe yamugambira ati: ‘Tosigaire wenka. Haroho n’abandi 7,000 omu Isareri abarukundamya. Genda ofoole Erisa kuba nabbi omu kiikaro kyawe.’ Aho n’aho, Eriya akagenda kukora eki Yahwe yali amuragiire. Notekereza naiwe Yahwe n’aija kukukonyera kakuba okora eby’arukugonza? Ego, n’aija kukukonyera. Hati katurole ekyabaireho omu kasumi k’ekyanda.