Erisabesi Azaara Omwana

Emyaka 400 ekaba ehigwireho hanyuma y’ebisika bya Yerusalemu kwombekwa buhyaka, nyakatagara arukwetwa Zakaliya hamu na mukazi we Erisabesi, baikaraga haihi n’orubuga rwa Yerusalemu. Baali bataine mwana n’obu baraaba bali baikaire hamu kumara emyaka nyingi. Kiro kimu Zakaliya obwaka nahayo ekihongwa omu yekaru, maraika Gabiryeri akamubonekera. Zakaliya akatiina muno, baitu Gabiryeri akamugambira ati: ‘Otatiina, nkuletiire amakuru amarungi kuruga hali Yahwe. Mukazi wawe Erisabesi n’agenda kuzaara omwana omwojo kandi ibara lye arayetwa Yohana. Yahwe amukomere kukora omulimo ogw’embaganiza.’ Baitu uwe Zakaliya akamugarukamu ati: ‘Nyowe ndakikiriza nta? Baitu nyowe na mukazi wange tukuzire muno titusobora kuzaara.’ Gabiryeri akamugarukamu ati: ‘Ruhanga nuwe antumire kukugambira amakuru ganu amarungi. Baitu habwokuba oyangire kwikiriza ebigambo byange, noija kufa omunwa kuhikya omwana obw’alizaarwa.’

Zakaliya akakerererwa kuruga omu yekaru. Obuyarugireyo abantu boona bakaba balindiriire kumanya ekyali kibaireho. Baitu Zakaliya akaba afiire omunwa atarukusobora kubaza oihireho akakozesa emikono ye kulengaho kubasoborra. Obu nubwo abantu bakyetegererize nk’oku Zakaliya akaba atungire obutumwa kuruga hali Ruhanga.

Hanyuma y’obwire, Erisabesi akatwara enda kandi y’azaara omwana omwojo, nkoku maraika akaba agambire. Enganjani zaabo hamu n’abanyabuzaale bakaija kurora omwana onu. Bakasemererwa muno habwa Erisabesi kuzaara omwana. Erisabesi akabagambira ati: ‘Ibara lye nuwe Yohana.’ Nabo bamugarukamu bati: ‘Busaho muntu wena omu kika kyanyu arukwetwa Yohana. Muruke Zakaliya nka ise.’ Baitu Zakaliya akahandika ati: ‘Ibara lye nuwe Yohana.’ Aho n’aho Zakaliya yatandika kubaza! Amakuru agarukukwata ha mwana onu gakararanga omu Buyudaaya yoona, kandi abantu baali nibekaguza bati: ‘Omwana onu obwarakura naija kuba muntu wa mulingo ki?’

Zakaliya akaijura omwoyo ogurukwera, yaranga n’agamba ati: ‘Yahwe akugizibwe. Akaraganiza Iburahimu ngu akaba nagenda kusindika omujuni, Masiya kutucungura. Yohana nagenda kutekaniriza Masiya omuhanda kandi ali nabbi.’

Malyamu omunyabuzaale wa Erisabesi nauwe akahikwaho ekintu eky’embaganiza. Katukirole omu suura erukwongeraho.