Yesu Afooka Masiya

Yohana akaba amazire akasumi natebeza ati: ‘Omuntu arukunkira obukuru naija.’ Yesu obwakaba aine emyaka nka 30, akaruga Galiraya yaija ha Kyambu Yorudani nambere Yohana akaba n’abatiriza abantu. Yesu akaba nagonza Yohana amubatize, baitu Yohana akamugambira ati: ‘Tinsemeriire kukubatiza. Iwe, niiwe osemeriire kumbatiza.’ Yesu akagarukamu Yohana ati: ‘Yahwe nagonza iwe ombatize.’ Yesu na Yohana bakagenda omu Kyambu Yorudani kandi Yohana yabatiza Yesu, obu namwibika wena omu maizi.

Yesu akasaba hanyuma y’okuruga omu maizi. Omu kasumi nuko kamu, iguru likakinguka kandi omwoyo ogurukwera gwasirimuka omu kisisani ky’eriiba gwamugwaho. Hanyuma, iraka lya Yahwe likaruga omu iguru nirigamba: “Ogu nuwe Mwana wange oundukugonza, ounsemereriirwe muno.”

Omwoyo gwa Yahwe obugwasirimukire hali Yesu, akafooka Kristo, rundi Masiya. Hati, obu nubwo obwire obwakaba asemeriire kutandika kukora omulimo Yahwe ogw’akaba amutumire kukora omu nsi.

Hanyuma y’okubatizibwa, Yesu akagenda omu irungi kandi yamarayo ebiro 40. Obuyagarukire kuruga omu irungu, akagenda kubungira Yohana. Yesu obwakaba ali haihi kumuhikaho, Yohana akagamba ati: ‘Dora Omwana gw’Entaama ogwa Ruhanga ogurukwihaho ebibi by’ensi.’ Yohana akabaza ebigambo binu kwoleka ngu Yesu nuwe Masiya. Omanyire ekyahikire hali Yesu obwakaba ali omu irungu? Katurole.