Yesu Bamukwata

Yesu hamu n’abakwenda be bakaraba omu Kihanga kya Kidironi obu bakaba nibagenda ha Rusozi Zeituni. Okwezi kwali kujwire kandi zaali zihingwire saaha mukaaga ez’ekiro. Obu bahikire omu rugonjo Gesesemane, Yesu akagambira abakwenda be ati: ‘Mwikale hanu kandi mwikale nimurora.’ Hanyuma Yesu akagenda haraho omu rugonjo kandi yateeza amaju. Omu kuganya okwingi, Yesu akasaba Yahwe nagamba ati: ‘Leka ebyogonza bikorwe.’ Hanyuma Yahwe kasindika maraika kugumya Yesu. Yesu obuyagarukire nambere abakwenda be bakaba bali, akasanga basatu bagwijagiire. Akagamba ati: ‘Mwimuke! Kanu tikali kaire k’okubyama! Akaire kahikire ak’okukwatwa abanyanzigwa bange.’

Obu harabiraho akasumi kake, Yuda akaija n’abantu bakwasire empirima hamu n’emiigo. Akaba amanyire nambere bakusangire Yesu habwokuba bakiraga muno kugenda omu rugonjo oru. Yuda akaba agambiire abaserikale ngu naija kubooleka Yesu. Yuda akagenda hali Yesu kandi yamugambira ati: ‘Mirembe, Mwegesa,’ kandi yamunywegera. Yesu akamugarukamu ati: ‘Yuda, mali nongobeza n’okunywegera?’

Yesu akabairra haihi yabakaguza ati: “Nimuserra oha?” Bamugarukamu bati: “Yesu owa Nazalesi.” Akabagarukamu ati: ‘Ninyowe,’ abasaija bakagaruka enyuma kandi bagwa ha nsi. Yesu akongera yabakaguza: “Nimuserra oha?” Bayongera bagamba bati: “Yesu owa Nazalesi.” Yesu yabagarukamu ati: ‘Mbagambiire ngu ninyowe. Muleke abasaija banu bagende.’

Petero obuyaboine ebikaba nibigenda omu maiso, akasomorayo empirima yasaraho okutu kwa Maliko, ow’akaba ali mwiru owa nyakatagara omukuru. Baitu Yesu akakwata ha kutu kw’omusaija onu yamukiza. Hanyuma Yesu akagambira Petero ati: ‘Yahura empirima yaawe. Obworakozesa empirima kurwana, naiwe n’oija kwitwa empirima.’ Abaserikale bakakwata Yesu bamuboha emikono, kandi abakwenda be bairuka. Hanyuma abakaba bamukwasire bakamutwara owa Ana nyakatagara omukuru. Ana akakaguza Yesu ebikaguzo hanyuma yamusindika bamutwale omwa nyakatagara omukuru wabo arukwetwa Kayafa. Baitu kiki ekyahikire hali abakwenda?