ISOMO 18

Yegesa Abarukukuhuliiriza Ebirukubagasira

1 Abakolinso 9:19-23

EKY’OSEMERIIRE KUKORA: Konyera abarukukuhuliiriza kutekerezaaho ensonga ey’orukubazaaho kandi n’okwega ekintu ekirabagasira.

Tekerezaaho ebintu ebibamanyire. Omu kiikaro ky’okugarukamu kubegesa ebintu ebibamanyire, bakonyere kwetegereza ensonga omu mulingo omuhyaka.

Kozesa obwire buke kusoborra ensonga ezibamanyire, kandi kozesa obwire bwingiho kusoborra ebintu ebihyaka.
Seruliiriza kandi oyecumiitirize. Obukiraaba nikisoboka, kozesa ebintu ebihyaka rundi ebibaireho kusoborra ensonga enkuru. Tekerezaaho muno eby’orukugenda kwegesa, n’omulingo orukugenda kubyegesaamu.

Obworaaba noyekebiija eby’orukugenda kwegesa, wekaguze ebikaguzo nka ‘kiki, habwaki, di, nkaha, oha, kandi omu mulingo ki’ kutekerezaaho eby’orayegesa. Kozesa ebikaguzo binu kandi obigarukemu obworaaba noyegesa nukwo oyongere obutagasi omu kwegesa kwawe.
Yoleka omugaso gw’obutumwa bwawe. Soborra abarukukuhuliiriza omulingo ebintu eby’orukubegesa bisobora kubakonyera omu bwomeezi bwabo obwa buli kiro. Bazaaho enyikara, entekereza, n’ebikorwa ebirukubakwataho.