Omulingo Obazaamu Nigusobora Guta Kusemeza Yahwe?

Yahwe obuyatuhangire, akatuha ekisembo ekirungi muno. Ekisembo kinu nubwo obusobozi bw’okubaza. Akwatwaho omulingo tukozesaamu ekisembo eki? Ego! (Soma Yakobo 1:26.) Hati, nitusobora tuta kukozesa obusobozi bwaitu obw’okubaza omu mulingo ogurukusemeza Yahwe?

1. Nitusobora tuta kukozesa kurungi ekisembo eky’okubaza?

Baibuli etugambira ngu “muhumuzanganege inywenka kandi [mwombekanganege].” (1 Abasesalonika 5:11) N’osobora kutekerezaaho abantu abarukwetaaga kugarurwamu amaani. Kiki eky’osobora kukora kubaletera kwehurra kurungi? Bagumye ngu n’obafaaho kandi ngu n’obagonza. N’osobora n’okubagambira ebirungi ebyorukubagonzaho. N’osobora kutekerezaho ekyahandiikirwe eky’osobora kukozesa kugarramu amaani omuntu ow’omanyire? Haroho ebyahandiikirwe bingi eby’osobora kukozesa. Ijuka ngu n’omulingo obazaamu ekintu, nagwo nigusobora kugarramu omuntu amaani. Nahabweki lengaho kwikara n’obaza omu mulingo ogw’embabazi kandi ogw’obuculeezi.​—Enfumo 15:1.

2. Mbaza ya mulingo ki eitusemeriire kwetantara?

Baibuli egamba eti: “Ekigambo kyona ekitasemiire kitaliruga omu kanwa kanyu.” (Soma Abefeso 4:29.) Kinu nikimanyisa ngu titukozesa ebigambo ebibi, ebirukuhemura, ebirukusaaliza enyehurra z’abandi rundi ebirabakora kubi. Tusemeriire n’okwetantara orugambo hamu n’okubazaaho kubi abantu abandi.​—Soma Enfumo 16:28.

3. Kiki ekiratukonyera kubaza omu mulingo ogurukwombeka?

Obwire oburukira obwingi, ebigambo ebitubaza byoleka kiki ekiri omu mutima gwaitu rundi ekiturukutekerezaaho. (Luka 6:45) Nahabweki tusemeriire kwetendeka kutekerezaaho ebintu ebirungi. Ebi nibyo eby’okuhikirra, ebisemiire, ebirukugonzebwa hamu n’ebirukukugizibwa. (Abafiripi 4:8) Kusobora kwikara nitutekerezaaho ebintu binu, tusemeriire kukomamu eby’okwesemeza hamu n’abanywani n’obwegendereza. (Enfumo 13:20) Kandi tusemeriire kubanza kutekerezaho ebiturukugenda kubaza n’omulingo turabibazaamu. Tekerezaaho omulingo ebigambo eby’orabaza birakwataho abandi. Baibuli egamba ngu: “Ow’abaza atabandize kutekereza, ebigambo bye bicumita nk’empirima: baitu ebigambo eby’ow’amagezi bikiza.”​—Enfumo 12:18, “NWT.”

YEGA EBIRUKUKIRAHO

4. Werinde ebigambo byawe

Obwire obumu, itwena tubaza ebigambo ebituhika tukeijukya. (Yakobo 3:2) Musome Abagaratiya 5:22, 23, hanyuma mugarukemu ebikaguzo binu:

• Miringo ki ey’osobora kusaba Ruhanga ekakukonyera kwegendereza ebigambo byawe? Emiringo enu n’esobora kukukonyera eta?

Musome 1 Abakolinso 15:33, hanyuma mubazeeho ekikaguzo kinu:

• Banywani baawe hamu n’eby’okwesemeza byawe nibisobora kukwataho bita embaza yaawe?

Musome Omugambizi 3:1, 7, hanyuma mubazeeho ekikaguzo kinu:

• N’otekereza ni di obukisobora kuba ky’amagezi kuculeera rundi kulinda akasumi akahikire nubwo okabaza?

5. Bazaaho kurungi abantu abandi

VIDIYO: Baza Ebigambo Ebirungi Ebirukwombeka Abandi (4:07)

• Kusigikirra ha vidiyo, habwaki ow’oruganda akaba nagonza kuhindura ha mbaza ye?

• Kiki ekiyakozere kusobora kuhinduramu?

Musome Omugambizi 7:16, hanyuma mubazeeho ekikaguzo kinu:

• Kiki ekitusemeriire kwijuka kakuba twesanga ngu nitugenda kutandika kubazaaho kubi omuntu?

Musome Omugambizi 7:21, 22, hanyuma mubazeho ekikaguzo kinu:

• Enkarra zinu nizisobora kukukonyera zita kutatabuka kakuba omuntu akubazaaho kubi?

6. Ab’omu ka yaawe babalize omu mulingo gw’embabazi

VIDIYO: Kugonza n’Okutamungana Ekitinisa Kiretera Amaka Kubamu Obumu (3:08)

• Kiki ekirakukonyera kubaliza ab’omu ka yaawe omu mulingo gw’embabazi?

Musome Abefeso 4:31, 32, hanyuma mubazeeho ekikaguzo kinu:

• Nitusobora tuta kubaza n’ab’omu maka gaitu omu mulingo ogurabaletera kwehurra kurungi?

Yahwe akabaza omulingo akaba nayehurra hali Omwana we, Yesu. Musome Matayo 17:5, hanyuma mugarukemu ekikaguzo kinu:

• N’osobora ota kuhondera ekyokurorraho kya Yahwe obukirukuhika ha mulingo obazaamu n’ab’omu ka yaawe?

OYEGERE KI?

Ebigambo biine amaani. Tusemeriire kubanza kutekerezaho muno ebigambo byaitu, ni di obuturabibaza n’omulingo turabibazaamu.

Kweijukyamu

• Miringo ki ey’osobora kukozesamu ekisembo eky’okubaza kukonyera abandi?

• Mbaza ya mulingo ki eitusemeriire kwetantara?

• Kiki ekisobora kutukonyera kubaza omu mulingo ogw’embabazi kandi ogurukwombeka?

SERULIIRIZA

Kiki ekisobora kutukonyera kubaza omu mulingo ogurukugarramu abandi amaani?

Kurakuraniza Embaza ey’Abamagezi (8:04)

Manya kiki ekisobora kukukonyera kwetantara kubaza kubi.

“Mali Kukyena Kibi?” (Ekicweka kinu kiri ha mukura)

Rora omulingo osobora kwetantara omutego ogw’okurarangya orugambo.

Ninsobora Nta Kuleka Orugambo? (2:36)

Wetegereze omulingo Yahwe yakonyiremu omusaija kuleka kubaza kubi.

“Nkatandika Kutekerezaaho Muno Nambere Obwomeezi Bwange Bukaba Nibugenda” (Watchtower, eya Agusto 1, 2013)