Bintu Ki ruhanga Eby’arukugenda Kukora?

Obwoba oine ekizibu, oba n’onihira munywani wawe omurungi kukukonyera. Omu mulingo nugwo gumu, abantu abamu bagamba ngu Ruhanga tali munywani murungi habwokuba batekereza ngu taine eky’arukukora kubakonyera. Amananu gali ngu, Ruhanga atukoliire ebintu bingi ebirungi kandi naija kumaraho ebizibu byona hamu n’okubonabona okuturukurabamu kasumi kanu. Bintu ki Ruhanga eby’arukugenda kukora?

NAIJA KUMARAHO OBUBI BWONA

Ruhanga naija kumaraho obubi bwona kandi kinu naija kukikora obw’araihaho ow’arukubuletaho. Baibuli eyoleka endugirro y’obubi obwesoborra ngu: “Ensi yoona eri omu busobozi obw’omubi.” (1 Yohana 5:19, NW) Kandi Yesu akeeta ‘omubi’ onu “[omulemi] wensi enu,” Setani Diabolo. (Yohana 12:31) Setani habw’okuhabisa abantu nikyo kirugiriiremu abantu okubonabona omu nsi. Kiki Ruhanga eky’arukugenda kukora?

Yahwe Ruhanga ali haihi kukozesa Omwana we Yesu Kristo “[kuhwerekereza] ogu anyakuina obusobozi obwokufa, nuwe Setani.” (Abaheburaniya 2:14; 1 Yohana 3:8) Kandi Baibuli eyoleka nk’oku Setani nauwe akimanyire ngu “ayina akacu kake” nukwo ahwerekerezebwe. (Okusuku’rwa 12:12) Ruhanga naija n’okwihaho ebintu byona ebibi kandi ahwerekereze n’ababi boona.—Zabuli 37:9; Enfumo 2:22.

NAIJA KUFOORA ENSI YOONA ORUGONJO ORURUNGI

Hanyuma y’okumaraho obubi bwona omu nsi, Omuhangi waitu naija kuhikiriza ekigendererwa kye eky’okufoora abantu bahikiriire kandi n’okubaha obwomeezi obutahwaho omu rugonjo orurungi omu nsi. Biki ebitusemeriire kulindirra?

Obusinge n’obulinzi obutalihwaho. “Abaculezi baligwetwa ensi; balikyanganuka obwobusinge obwingi.”—Zabuli 37:11.

Ebyokulya ebirukumara kandi ebirungi. “Halibaho omweru gwobura omu nsi, ha mutwe gwensozi.”—Zabuli 72:16.

Amaju amarungi hamu n’emirimo enungi. “Balyombeka enju balizitahamu; balibyabara emisiri eyemizabibu, baliryaho ebyana. . . . Balisemererwa omwanya omukoto omulimo gwengaro zabu.”—Isaya 65:21, 22.

Wakugondeze kurora enyikara zinu? Omu kasumi akatali kahara, binu byona nibiija kuhikirra.

KUMARAHO OBURWAIRE N’OKUFA

Buli muntu wena arwara kandi ahika afa, baitu ebi tibiryongera kubaho. Omu kasumi akatali kahara Ruhanga naija kuhikiriza ebintu byona ebirungi eby’ekicunguro kiratusobozesa kutunga. Kinu Ruhanga naija kukikora nukwo “omuntu wena anyakumuikiriza aleke okubura, baitu atunge obwomezi obutahwaho.” (Yohana 3:16) Ekicunguro nikiija kutusobozesa kutunga birungi ki?

Kwihiraho kimu oburwaire. “Anyakuikarayo taligamba ati ndi murwaire: abantu abaikaramu baliganyirwa okutahikirra kwabu.”—Isaya 33:24.

Okufa tikulyongera kubonabonesa abantu. “Amiriire kimu okufa ebiro byona; kandi Mukama Ruhanga aliragaza amaizi ha maiso gona.”—Isaya 25:8.

Abantu nibaija kwomeera ebiro byona. “Ekisembo kyembabazi ekya Ruhanga bwomezi obutahwaho omu Kristo Yesu Mukama waitu.”—Abarumi 6:23.

Abaafiire nibaija kuhumbuuka. “Halibaho okuhumbuka okwabahikiire natahikiriire.” (Engeso Ezabakwenda 24:15) Nibaija kuhumbuuka ha bw’ekicunguro.

Binu byona Yahwe naija kubihikiriza ata?

NAIJA KUTEKAHO GAVUMENTI ENUNGI

Ruhanga naija kuhikiriza ekigendererwa kye hali abantu hamu n’ensi n’akozesa gavumenti ye ey’omu iguru ey’erukulemwa Yesu, Omulemi ow’akomere. (Zabuli 110:1, 2) Gavumenti enu rundi Obukama bunu, nubwo Yesu yayegeseze abahondezi be kwikara nibasaba nibagamba ngu: “Isitwe ali omu iguru, . . . Obukama bwawe buije.”—Matayo 6:9, 10.

Obukama bwa Ruhanga nibwija kulema ensi kandi bumaleho obusaasi bwona hamu n’okubonabona. Obukama bunu niyo gavumenti erukukirayo oburungi abantu ei barukwija kutunga! Egi niyo ensonga habwaki Yesu obwakaba ali omu nsi, y’ayekambire muno kutebeza “enjiri eyobukama” kandi yagambira abegeswa be kukora omulimo nugwo gumu.—Matayo 4:23; 24:14.

Habwokuba Yahwe n’agonza muno abantu, naija kuhikiriza ebirungi binu byona ebiyaraganiize. Eki tikirukukuletera kugonza kumumanya n’okumwirra haihi? Kirakugasira kita obw’oracwamu kumwirra haihi? Ekicweka ekirukwongeraho nikiija kusoborra.