Omu Kasumi k’Ekiijukyo, Orayekamba Kutebeza nka Yahwe na Yesu?
1. Omu kasumi k’ekiijukyo, Abakaiso ba Yahwe bekamba kukora ki?
1 Yahwe n’agonza muno kandi n’akora n’amaani nukwo asobole kuhikiriza ekigendererwa kye. Nirubaza ha migisa ereserwe Obukama bwa Ruhanga, Isaya 9:7 rugamba ruti: “Obwekambi bwa Mukama wamahe bulihikiriza kinu.” Yesu obwakaba ali omu nsi, akakora n’amaani kwegesa abantu ebirukukwata ha kuramya okw’amananu. (Yoh. 2:13-17; 4:34) Omu kasumi k’ekiijukyo obukaikuru n’obukaikuru bw’Abakaiso ba Yahwe booleka obwekambi nk’obwa Yahwe na Yesu nibongera ha bwire obubamara nibatebeza. Orabeteranizaaho?
2. Kutandika na Maaci 7, kiki ekiturayekambira okukora?
2 Okweta Abantu Kwija ha Kiijukyo: Omwaka gunu nitwija kutandika kuraaliza abantu kutandika na Kyamukaaga 7, okwezi kwa Maaci. Kora enteekaniza ezirakusobozesa kwongera ha buheereza bwawe. Ab’oruganda nibaija kugonza kukora kyoona ekirukusoboka kuhika ha buli muntu, omu kicweka kyaabu. Otebwa kweta ab’oyega nabo Baibuli, ab’okora nabo, abanyabuzaale baawe, n’abaana ab’osoma nabo ha isomero. Osobora kubatwara kaadi rundi kubaraliza kuraba ha jw.org.
3. Tusobora tuta kwongera ha buheereza bwaitu omu meezi ga Maaci na Apuli?
3 Payoniya Omukonyezi: Obuturaaba beekambi kiija kutukoonyera kwongera ha bwire bwaitu obw’okutebeza. Baingi nibaija kusobora kuheereza nka bapayoniya abakonyezi omu meezi ga Maaci na Apuli habwokuba baija kuba nibasobora kuhayo esaaha 30. Omu kuramya kwanyu okw’eka rundi omu kwesomesa, musabe Yahwe abakoonyere kukora enteekaniza ezirabasobozesa kuteeka amagezi ganu omu nkora. (Nfu. 15:22) Abandi obu bararora otekeremu amaani, nabo kiija kubeekambisa kutebeza n’amaani. Obw’orakora enteekaniza enungi nukwo osobole kukora ekirukukiraho omu buheereza, oija kuba n’ohondera ekyokurorraho kya Yesu.—Mar. 6:31-34.
4. Migisa ki eruga omu kuhondera ekyokurorraho eky’obwekambi bwa Yahwe na Yesu?
4 Obuturahondera ekyokurorraho ky’obwekambi bwa Yahwe na Yesu omu kasumi k’ekiijukyo, nitwija kutunga emigisa nyingi. Nitwija kusobora kutebeza abantu baingi omu kiikaro kyaitu. Nitwija kutunga okusemererwa okuruga omu kuheereza Yahwe n’okugabira abandi. (Eng. 20:35) N’ekirukukirayo obukuru, twija kusemeza Ruhanga waitu hamu n’Omwana we Yesu.