Omulingo gw’Okukozesamu Ebintu eby’Okuhuliriza Buhuliriza
1. Oihireho ebitabu ebitiirwe, bintu ki ebindi ebitwine ebirukusobora kutugasira?
1 Abantu baingi bagonza kukozesa omukura gwaitu ogwa jw.org kusoma ebigambo ebirungi kandi eby’amananu. (Mug. 12:10) Baitu oratungire omugisa kukozesa ebintu eby’okuhuliriza buhuliriza ebiri ha mukura gwaitu? Ebintu binu bitusobozesa kumanya ebintu bingi ebiri ha mukura. Ebintu binu eby’okuhuliriza buhuliriza bitugasira bita?
2. Tusobora tuta kukozesa ebintu eby’okuhuliriza buhuliriza nitwesomesa rundi omu kuramya kw’eka?
2 Tusobora Kubikozesa omu Kuramya kw’Eka Rundi Nitwesomesa: Kuteekaho Baibuli, magaziini rundi ebitabu eby’okuhuliriza buhuliriza twine nambere turukugenda rundi nitukora emirimo yaitu endi, kitukoonyera kukozesa kurungi obwire bwaitu. (Bef. 5:15, 16) Omu kuramya kwanyu okw’eka musobora kucwamu kuteekaho kimu ha bitabu eby’okuhuliriza buhuliriza, nukwo buli muntu n’ahoondera omu kitabu kye ebirukusomwa. Kandi ebicweka binu bisobora kutukoonyera kukurakuraniza kusoma kurungi, rundi kwega orulimi orundi kakuba tubikozesa nitwesomesa.
3. Bantu ba mulingo ki abarukusobora kugasirwa omu bintu eby’okuhuliriza buhuliriza?
3 Omu Buheereza: Abantu abamu abatusanga nitutebeza abagamba ngu tibaine bwire bw’okusoma ebitabu byaitu basobora kwikiriza kubateeraho kimu ha bitabu byaitu eby’okuhuliriza. Obundi tusobora kusanga abantu abarukubaza orulimi orututarukumanya baitu basobora kusiima amakuru amarungi kakuba bagahurra omu “ngambo [ndimi]” zaabu. (Eng. 2:6-8) Omu biikaro ebimu, okuhuliriza kintu kikuru muno. Nk’ekyokurorraho, omu buhangwa bw’aba Hmong, abantu abakuru beegesa abaana baabu ebirukukwata ha buhangwa bwabu n’ebyafaayo nibababaliza bubaliza. Nahabwekyo abaana kusobora kukwata ebintu ebyo, baina kuhuliriza kurungi. Kandi abantu baingi omu Afrika bagonza muno kuhuliriza enganikyo.
4. Bikaguzo ki ebitusemeriire kwekaguza kusobora kukoonyera abantu abatusanga nitutebeza?
4 N’osobora kwekaguza: Nambere tutebeza, abantu basobora kuhurra bata tubateriireho bimu ha bintu ebitwine eby’okuhuliriza buhuliriza omu ndimi zaabu? Hahoro abarukusobora kugasirwa omu bintu binu eby’okuhuliriza buhuliriza kakuba tubibasindikira nitukozesa e-mail rundi tubibatwarra? Ninsobora kwihira omuntu asiimire amakuru amarungi ekitabu eky’okuhuliriza buhuliriza kuruga ha mukura gwaitu nkakimuteera ha CD nka muheeraho n’ekyokusoma? Ekitabu kyona ekitwihire ha mukura gamba nka, burocuwa, turakiti, rundi magaziini gonze kiri ky’okuhuliriza buhuliriza tukakigabira omuntu omu buhikirire bwakyo tusemeriire kukiteeka ha ripooti yaitu. Ebintu byona eby’okuhuliriza buhuliriza biteirweho kutukoonyera nitwesomesa, n’okusiga embibo ey’amananu.—1 Kol. 3:6.