OBWOMEEZI BWAITU NK’ABAKRISTAAYO

Semerererwa omu Kutebeza Amakuru Amarungi

Kira kugumiireho kutebeza amakuru amarungi? Baingi omuli itwe, kiratubaireho. Baitu habwaki kitubaho? Nitusobora kuba nitutiina kubaza n’abantu abatutamanyire rundi habw’okwikara nitutangaana abantu abatarukugonza kuhuliriza rundi ab’ekininga. Mali ensonga zinu nizisobora kutumaraho okusemererwa kwaitu. Baitu, nk’oku turamya “Ruhanga ow’okusemererwa” n’agonza tumuhereze tusemeriirwe. (1Tim 1:11, NW; Zab 100:2) Nsonga ki isatu ezituletera kusemerererwa omu kutebeza?

Ensonga ey’okubanza, tutebeza obutumwa obuleta okunihira. N’obukiraaba ngu abantu abarukukira obwingi tibakyaine okunihira, nitusobora kubatebeza “ebigambo ebirungi ebyomugisa.” (Is 52:7) Baitu amakuru ganu amarungi ag’Obukama bwa Ruhanga naitwe gatuletera okusemererwa. Obworaaba otakagenzere omu buheereza, banza ocumitirizeho emigisa Obukama bwa Ruhanga buraleta omu nsi.

Ensonga eya kabiri, amakuru amarungi agaturukutebeza nigakonyera abantu omu by’omubiri n’omu by’omwoyo. Ebi baba begere bibakonyera kuleka engeso embi kandi n’okutunga okunihira okw’obwomeezi obutahwaho. (Is 48:17, 18; Bar 1:16) Omulimo gwaitu ogw’okutebeza nitusobora kugulengesaniza n’omulimo gw’okujuna abantu. Abantu abamu n’obubaraaba baturukugonza kujunwa, itwe nitwija kugumizaamu nituserra abo abarukogonza kujunwa.—Mat 10:11-14.

Ensonga eya kasatu, kandi erukukira obukuru eri ngu, kutebeza kwaitu kuhaisa Yahwe ekitinisa kandi asiima muno omulimo ogutukora. (Is 43:10; Baheb 6:10) Yahwe habw’embabazi ze atuha omwoyo ogurukwera kutukonyera kukora omu mulimo gunu. Nahabweki, saba Yahwe akukonyere otunge okusemererwa, kimu ha byana eby’omwoyo. (Bag 5:22) Nitusobora kutebeza n’obumanzi kandi tutaine kweralikirra kwona habwokuba Yahwe ayetegekere kutukonyera. (Eng 4:31) Nahabweki, abantu n’obubaraaba batahuliriize, nitwija kwikara nitusemerererwa omulimo gwaitu ogw’okutebeza.—Ez 3:3.

Ebisisani bibiri ebirukwoleka enyehurra ibiri ezirukwahukana omu buheereza—kubiihirwa n’okusemererwal — Wakugondeze kuba muntu wa mulingo ki omu kutebeza? N’osobora kwoleka ota kusemererwa kwawe?

MUROLE VIDIYO TUNGA OKUSEMERERWA OKURUGA OMU KWESOMESA HAMU N’OKUCUMIITIRIZA, KANDI MUGARUKEMU EBIKAGUZO BINU:

Habwaki kwesomesa kikuru, n’obutubaraaba nitumara obwire bwingi omu kutebeza buli kwezi?
Malyamu nitumwegeraho ki?
Bwire ki obwocumiitirizaaho Ekigambo kya Ruhanga?
Kiki eki kuletera okusemererwa obw’oba notebeza amakuru amarungi?