OBWOMEEZI BWAITU NK’ABAKRISTAAYO
Kugiza Yahwe Obu n’Oheereza nka Payoniya
Abaisaleri bakaba baine ensonga nyingi ez’okukugiza Yahwe. Akaba abaihire omu ihanga lya Misiri kandi akaba abajunire ihe lya Faraho! (Kurug 15:1, 2) N’omu kasumu kanu, Yahwe n’akyakorra abantu be ebintu ebirungi. Nitusobora tuta kwoleka ngu nitusiima?—Zab 116:12.
Omulingo gumu ogutwolekamu okusiima nugwo ogw’okuheereza nka payoniya omusagiki rundi ow’akasumi koona. N’osobora kusaba Yahwe akuhe okugonza hamu n’amaani kusobora kuheereza nka payoniya. (Baf 2:13) Baingi babanza kuheereza nka bapayoniya abasagiki. N’osobora kucwamu kuhayo esaaha 30 rundi 50, omu kwezi kwa Maaci na Apuli hamu n’omu kwezi kw’orubungo rw’omuroleerezi w’ekicweka. Hanyuma y’okurora okusemererwa okuli omu kuheereza nka payoniya omusagiki, n’osobora n’okugonza kuheereza nka payoniya ow’akasumi koona. Naabo abaine emirimo erukubetagisa kukora buli kiro rundi abo abaine obuceke bw’omubiri basoboire kuheereza nka bapayoniya ab’akasumi koona. (mwb16.07 8) Mali, tusemeriire kuteekamu amaani maingi kukugiza Yahwe habwokuba kimusemeriire!—1Byom 16:25.
MUROLE VIDIYO BANYAANYA ITWE BASATU KURUGA OMU IHANGA LYA MONGOLIA, HANYUMA MUGARUKEMU EBIKAGUZO BINU:
Bizibu ki banyaanya itwe basatu ebibakaba baine kandi bakakora ki kubimaraho nukwo basobole kuheereza nka bapayoniya?
Batungire migisa ki?
Buheereza bwa mulingo ki obundi obubasoboire kwejumbiramu habwokuba bakaba nibaheereza nka bapayoniya abakasumi koona?
Ekyokurorraho kyabo kikwasireho kita abandi?