Isiitwe Yahwe, Nitumugonza Muno

1-2. Habwaki Yahwe yatukoliire entekaniza ey’okutaaha omu ka ye, kandi akagikora ata?

YAHWE atuhaire omugisa ogw’okuba omu ka ye ey’erumu abaheereza be. Gunu kamugisa gw’amaani! Eka enu erumu abantu abehaireyo hali Ruhanga kandi abarukwikiririza omu kicunguro ky’Omwana we. Erumu okusemererwa kwingi. Twine obwomeezi obw’ekigendererwa hati, kandi twine okusemererwa habw’okunihira okutwine okw’okutunga obwomeezi obutahwaho omu iguru rundi omu rugonjo orurungi omu nsi.

² Yahwe habw’okutugonza muno, akefeereza nukwo tusobole kutunga omugisa ogw’okutaaha omu ka ye. (Yoh. 3:16) Akatugura “nomuhendo” omwingi. (1 Kol. 6:20) Yahwe ak’akozesa ekicunguro kutusobozesa kutunga enkoragana enungi hamu nauwe. Kamugisa gw’amaani kweta omuntu arukukirrayo kimu omu buhangwa bwona Isiitwe. Kandi nk’oku twarozere omu kicweka eky’enyuma, Yahwe nuwe Isiitwe arukukirrayo kimu oburungi.

3. Kikaguzo ki ekitusobora kwekaguza? (Rora n’akasanduuko “Yahwe Antaho Omutima?”)

³ Nk’Omuhandiiki omu owa Baibuli nitusobora kwekaguza tuti: “Kiki ekindagarurra Mukama obwemigisaye yona hali nyowe?” (Zab. 116:12) Eky’okugarukamu kiri ngu titwine ekitusobora kumusasura. Baitu kinu kituletera kumugonza. Omukwenda Yohana akahandiika ati: “Itwe ntugonza, baitu uwe akabanza okutugonza itwe.” (1 Yoh. 4:19) Miringo ki ei tusobora kwolekamu Isiitwe ow’omu iguru ngu nitumugonza?

IKARA HAIHI NA YAHWE

4. Kusigikirra ha Yakobo 4:8, habwaki tusemeriire kwekamba kwirra haihi na Yahwe?

⁴ Yahwe n’agonza tumwirre haihi kandi tubaze nauwe. (Soma Yakobo 4:8.) Atutererra ‘kwekamba omu kusaba,’ kandi aikara ayetegekere kutuhuliiriza obwire bwona. (Bar. 12:12) Taburwa bwire rundi amaani ag’okuhurra esaara zaitu. Kandi naitwe tumuhuliriza kuraba omu kusoma Baibuli hamu n’ebitabu eby’omwiru omwesigwa ebitukonyera kugyetegereza. Omulingo ogundi ogutumuhulirizaamu nugwo kuteekaho omutima obutuba tuli omu nsorrokano ez’Ekikristaayo. Nk’oku abaana abaikara nibabaza n’abazaire baabo beyongera kubairra haihi, nukwo naitwe turayeyongera kwirra haihi na Yahwe obuturaikara nitubaza nauwe butoosa.

5. Nitusobora tuta kusemezaamu omulingo tusaba?

⁵ Tekerezaaho omulingo osaba hali Yahwe. Yahwe nagonza obuturaaba nitusaba, tumugambire kiki kyonyini ekiri ha mutima gwaitu. (Zab. 62:8) Wekaguze: ‘Esaara zange zisisana nk’ebbaruha omuntu ondi ahandiikire omu ibara lyange rundi zisisana nk’ebbaruha ei nyehandiikire kuruga ha mutima?’ Hataroho kugurukyagurukya n’ogonza muno Yahwe, kandi n’ogonza kwikaza enkoragana yaawe nauwe egumire. Kusobora kugumya enkoragana enu, osemeriire kwikara n’obaza nauwe obutoosa. Mugambire ensita zaawe, ebintu ebikuletiire okusemererwa hamu n’ebikusaliize. Kandi tosemeriire kutiina kumusaba kukukonyera.

6. Kiki ekitusemeriire kukora kusobora kwikara tuli haihi na Isiitwe ow’omu iguru?

⁶ Kusobora kwikara haihi na Isiitwe ow’omu iguru tusemeriire, kwikara nitumusiima. Naitwe nitwehurra nk’omuhandiiki wa Zabuli ayahandiikire ati: “Ai Mukama Ruhanga wange, ebyamahano ebiwakozire ka bingi! Nebitekerezo byawe ebiri haliitwe: tibisoboka kuherranizibwa kimu omu maiso gawe; kuba mbaire ninyenda okutebeza nokubigambaho, tibyakusoboire okubarwa.” (Zab. 40:5) Titugarukira ha kwehurra nitugonza kusiima Yahwe; baitu tumwoleka okusiima kwaitu omu bigambo hamu n’omu bikorwa byaitu. Kinu nikyoleka ngu tuli b’embaganiza h’abantu abarukukira obwingi ab’omu kasumi kanu, abatasiima Ruhanga habw’ebirungi byona eby’abakoliire. Kandi abantu kutasiima kali kamu habwokurorraho ‘obw’ebiro bya ha mpero.’ (2 Tim. 3:1, 2) Tweriinde muno kurora ngu entekereza egi tiyatutahamu.

7. Yahwe n’agonza tukole ki, kandi habwaki?

⁷ Abazaire bagonza abaana babo kugonzangana hatali kurwanisangana. Omu mulingo nugwo gumu, Yahwe nawe n’agonza abaheereza be boona kuba banywani. Kandi okugonza okutwiniire bagenzi baitu, nukwo kwoleka ngu tuli Bakristaayo ab’amananu. (Yoh. 13:35) Nitwikiranganiza n’omuhandiiki wa Zabuli ayagambire ati: “Dora oku kiri kirungi, kandi ekirukusemeza ab’oruganda kwikara hamu omu bumu!” (Zab. 133:1, NW) Obutwoleka ab’oruganda n’abanyaanya itwe okugonza, kyoleka ngu nitugonza Yahwe. (1 Yoh. 4:20) Kakirungi muno kuba omu ka ey’erumu ab’oruganda n’abanyaanya itwe abarukutwazangana kurungi kandi abaine emitima y’embabazi!​—Bef. 4:32.

YOLEKA OKUGONZA KWAWE OBU NOYOROBERA YAHWE

8. Kusigikirra ha 1 Yohana 5:3, nsonga ki enkuru ey’etuleetera kworobera Yahwe?

⁸ Yahwe n’agonza abaana borobere abazaire baabo, kandi naitwe nagonza tumworobere. (Bef. 6:1) Tusemeriire kumworobera habwokuba nuwe Muhangi waitu, nuwe aturolerra, kandi nuwe muzaire arukukirrayo kimu amagezi. Ensonga enkuru habwaki tworobera Yahwe eri habwokuba nitumugonza. (Soma 1 Yohana 5:3.) Yahwe tatuhambiriza kumworobera n’obukiraaba ngu haroho ensonga nyingi habwaki tusemeriire kumworobera. Yahwe akatuha obugabe obw’okwecweramu, nahabweki asemererwa muno obutucwamu kumworobera habw’okumugonza.

9-10. Habwaki kikuru kumanya kandi tukorobera ebiragiro bya Yahwe?

⁹ Abazaire tibagonza abaana baabo kuhikwaho akabi. Kandi enu niyo ensonga habwaki baha abaana baabo ebiragiro kusobora kubalinda. Abaana obuborobera ebiragiro ebi, booleka ngu nibesiga abazaire baabo kandi nibabatamu ekitiinisa. Nahabweki, kikuru muno tumanye ebiragiro bya Isiitwe ow’omu iguru kandi tubyorobere. Obutworobera Yahwe tumwoleka ngu nitumugonza, nitumutamu ekitiinisa, kandi eki kitugasira. (Is. 48:17, 18) Baitu abantu abatahondera ebiragiro bya Yahwe bamalirra batungire ebizibu.​—Bag. 6:7, 8.

¹⁰ Obutworobera ebiragiro bya Yahwe, kitukonyera kwerinda ebintu ebisobora kutukora kubi omu mubiri, omu bitekerezo, rundi ebisobora kusiisa enkoragana yaitu nauwe. Munyaanya itwe arukwetwa Aurora, kuruga omu United States, nagamba ati, “Obutworobera Yahwe tutunga obwomeezi oburukukirrayo kimu oburungi.” Ebigambo bya munyaanya itwe ogu by’amananu. Naiwe kikugasiire kworobera ebiragiro bya Yahwe?

11. Okusaba kutukonyera kukora ki?

¹¹ Okusaba kutukonyera kworobera Yahwe. Obwire obumu nikisobora kutugumira kumworobera, nahabweki tusemeriire kwikara niturwanisa obuceke bwaitu obutuletera kusiisa. Omuhandiiki wa Zabuli akesengereza Yahwe nagamba ati: “Ompe amagezi, nanyowe ndakwataga ebiragiro byawe; ego, ndibyerinda nomutima gwange gwona.” (Zab. 119:34) Munyaanya itwe arukweta Denise arukuheereza nka payoniya ow’akasumi koona, nagamba ati: “Obukingumira kworobera kimu ha biragiro bya Yahwe, musaba ampe amaani ag’okukora ekihikire.” Nitukigumiza kimu ngu Yahwe naija kugarukamu esaara nk’ezo.​—Luk. 11:9-13.

KONYERA ABANDI KUGONZA ISIITWE

12. Kusigikirra ha Abefeso 5:1, kiki ekitusemeriire kukora?

¹² Soma Abefeso 5:1. Nk’abaana ba Yahwe “abarukugonzebwa,” tukora kyona ekirukusoboka kwegera ha kyokurorraho kye. Twegera ha kyokurorraho kye obutwoleka okugonza, embabazi, kandi n’obutuganyira bagenzi baitu. Abantu abandi abatamanyire Yahwe obubarora omulingo twetwaza kurungi, nikisobora kubaletera kugonza kwega hali Yahwe. (1 Pet. 2:12) Abazaire Abakristaayo basemeriire kulengaho muno kutwaza abaana baabo omulingo Yahwe atutwazaamu. Abazaire obu bahondera ekyokurorraho kya Yahwe, kinu nikisobora kuletera abaana baabo kufooka banywani ba Yahwe.

13. Kiki ekitusemeriire kukora kufooka bamanzi?

¹³ Omwana omuto ayesiimisa ise kandi agonza muno kumugambiraho abantu abandi. Omu mulingo nugwo gumu, naitwe twesiimisa Yahwe Isiitwe ow’omu iguru, kandi nitugonza abandi bamumanye. Itwena nitwehurra omu mitima yaitu nk’Omukama Daudi ayahandiikire nagamba ati: “Obwomezi bwange burayenyumirizaga [omuli] Mukama.” (Zab. 34:2) Baitu nitusobora kuba twine ensoni ezitulemesa kubazaaho Yahwe. Kiki ekisobora kutukonyera kuleka kutiina? Tweyongera kufooka bamanzi obututekerezaaho omulingo tusobora kuletera Yahwe kusemererwa kandi n’omulingo abantu abandi baragasirwa obubaramwegaho. Yahwe naija kutuha obumanzi obuturukwetaaga. Nk’oku Yahwe y’akonyire Abakristaayo bagenzi baitu ab’omu kyasa eky’okubanza kufooka bamanzi, naitwe naija kutukonyera.​—1 Bas. 2:2.

14. Habwaki kikuru muno kutebeza amakuru amarungi?

¹⁴ Yahwe tasoroora, nahabweki asemererwa muno obwarora nitwoleka abantu ababuli mulingo okugonza. (Eng. 10:34, 35) Gumu ha miringo erukukirayo oburungi nk’oku tusobora kwoleka abandi okugonza, nugwo ogw’okubatebeza amakuru amarungi. (Mat. 28:19, 20) Birungi ki ebisobora kuruga omu mulimo gunu? Abantu abatuhuliiriza nibasobora kutunga obwomeezi oburungi omu kasumi kanu kandi batunge okunihira okw’okutunga obwomeezi obutahwaho omu kasumi ak’omu maiso.​—1 Tim. 4:16.

GONZA ISIITWE OTUNGE OKUSEMERERWA

15-16. Bintu ki ebituletera okusemererwa?

¹⁵ Yahwe muzaire ow’okugonza, nahabweki n’agonza ab’omu ka ye batunge okusemererwa. (Is. 65:14) Haroho ebintu bingi ebituletera kusemererwa, n’obukiraaba ngu twine ebizibu. Ekyokurorraho, nitukigumiza kimu ngu Isiitwe ow’omu iguru n’atugonza muno. Tumanyire amananu kuruga omu Kigambo kye Baibuli. (Yer. 15:16) Tuli kicweka ky’eka ey’embaganiza enyakurumu abantu abarukugonza Yahwe, abagonza ebiragiro bye, kandi abarukugonzangana.​—Zab. 106:4, 5.

¹⁶ Nitusobora kwikara twine okusemererwa habwokuba nitukigumya ngu omu kasumi ak’omu maiso obwomeezi nibwija kuba burungi. Tukimanyire ngu Yahwe naija kwihaho abantu ababi boona kandi akozese Obukama bwe kufoora ensi yoona orugonjo orurungi. Kandi twine n’okunihira okurungi ngu abantu baitu abaafiire nibaija kuhumbuuka kandi nitwija kwongera kuba hamu n’abo. (Yoh. 5:28, 29) Ekyo kanikiija kutusemeza muno! Ekirukukira obukuru, nitukigumiza kimu ngu buli omu wena omu iguru rundi omu nsi naija kuha Isiitwe ow’okugonza ekitiinisa, kukugizibwa, hamu n’okuramibwa ebimusemeriire.