EKICWEKA KY’OKWEGA 13
Tugonzangane Muno
“Mugonzangane omu mutima nokugonza kwingi.”—1 PET. 1:22.
EKIZINA 109 Tugonzangane Kuruga ha Mutima
EBITURAYEGAa
Yesu obw’akaba ali n’abakwenda be ha kiro eky’okumalirra atakafiire, akabazaaho muno okugonza (Rora ekicweka ky’okwega 13, akacweka 1-2)
1. Kiragiro ki eky’embaganiza Yesu ekiyahaire abageswa be? (Rora ekisisani ekyaha kyesweko.)
HA KIRO eky’okumalirra Yesu atakafiire, akaha abegeswa be ekiragiro eky’embaganiza. Akabagambira ati: “Nk’oku nabagondeze, nainywe mugonzanganege muti.” Akongera yagamba ati: “Boona balimanya muli begeswa bange, kakuba mugonzangana.”—Yoh. 13:34, 35, NW.
2. Habwaki kikuru kwolekangana okugonza?
2 Yesu akagamba ngu abantu bakaba nibagenda kumanyirra abahondezi be ab’amananu kakuba bolekangana okugonza nk’okwa Yesu yabolekere. Ekiragiro kinu kyali kikuru muno omu kyasa eky’okubanza kandi na hati kikyali kikuru. Egi niyo ensonga habwaki kikuru kugonzangana n’obukiraaba kitanguhire!
3. Kiki ekiturukwija kubazaaho omu kicweka kinu?
3 Habwokuba tuli bantu abatahikiriire tikyanguhire kugonzangana kuruga ha mutima. Baitu eki n’obukiraaba nukwo kiri, tusemeriire kulengaho muno kuhondera ekyokurorraho kya Yesu. Omu kicweka kinu nitwija kubazaaho omulingo okugonza kutukonyera kuba bantu abarukugarraho obusinge, abatakusoroora, kandi abarukwoleka amakune. Obworaaba nosoma ekicweka kinu, wekaguze: ‘Kiki ekinsobora kwegera h’ab’oruganda n’abanyaanya itwe abaikara nibolekangana okugonza n’obukiraaba kitanguhire?’
IKARA OLI MUNTU ARUKUGARRAHO OBUSINGE
4. Kusigikirra ha Matayo 5:23, 24, habwaki tusemeriire kugarraho obusinge hagati yaitu n’ow’oruganda ow’aine eky’arukutujunaana?
4 Yesu akatwegesa omulingo tusobora kugarraho obusinge n’ow’oruganda outurukuba tutungire nauwe obutetegerezangana. (Soma Matayo 5:23, 24.) Akooleka ngu obuturaaba nitugonza kusemeza Ruhanga, tusemeriire kwikara twine enkoragana enungi n’abantu abandi. Yahwe asemererwa muno obutukora kyona ekirukusoboka kugarraho obusinge hagati yaitu n’ab’oruganda. Yahwe tarukwija kwikiriza okuramya kwaitu kakuba twikara twahuliire bagenzi baitu enzigu kandi tukanga n’okulengaho kugarraho obusinge.—1 Yoh. 4:20.
5. Kizibu ki ow’oruganda omu yatungire obw’akaba nalengaho kugarraho obusinge?
5 Obwire obumu nikisobora kutugumira kugarraho obusinge. Habwaki? Tekerezaaho eky’ahikire hali Mark.b Akehurra kubi muno ow’oruganda obuyamuswaize kandi yayongera yamubazaaho kubi omu maiso ag’aboruganda abandi. Mark aketwaza ata? Nagamba ngu: “Nkakwatwa ekiniga eky’amaani kandi namubaliza kubi.” Hanyuma yakaire, Mark akayeijukya habw’ekintu yakozere kandi yalengaho kumusaba ekiganyiro nukwo agarreho obusinge. Baitu ow’oruganda akanga kuganyira Mark. Ha kubanza, Mark akekaguza, ‘Habwaki Ndengaho kuserra obusinge kandi kunu tarukugonza kunganyira?’ Baitu omuroleerezi wabo ow’ekicweka akamwekambisa kugumizaamu naserra obusinge. Mark akakora ki?
6. (a) Mark akakora bintu ki kulengaho kugarraho obusinge? (b) Mark akahondera ata obuhabuzi obuli omu Abakolosai 3:13, 14?
6 Mark obuyayecumitirizeeho entekereza ye, akakyetegereza ngu akaba aine emyehembo kandi yayetwaraga kuba w’amaani kukira abandi. Akahika yakyetegereza ngu akaba asemeriire kuhindura entekereza ye. (Bak. 3:8, 9, 12) Akongera yahikirra ow’oruganda ogu omu mulingo ogw’okwebundaaza yamusaba ekiganyiro habw’omulingo yamutwaizeemu. Mark akongera yahandiikira ow’oruganda onu amabbaruha namusaba ekiganyiro kandi yamusaba bongere bafooke banywani. Mark akamuha n‘ebisembo natekereza ngu nibiija kumusemeza. Eky’obusaasi, ow’oruganda akanga kumuganyira kandi yaikara amwahuliire enzigu. Baitu, Mark akagumizaamu nahondera ekiragiro kya Yesu eky’okugonza mutaahi we kandi y’aikara n’amuganyira. (Soma Abakolosai 3:13, 14.) Kakuba tulenga kugarraho obusinge n’abantu abandi baitu bakanga, okugonza okw’Ekikristaayo nikwija kutukonyera kwikara nitubaganyira, kandi nitubasabira bahinduke emitima.—Mat. 18:21, 22; Bag. 6:9.
Nikisobora kwetagisa kukozesa emiringo erukwahukana kusobora kugarraho obusinge (Rora akacweka 7-8)c
7. (a) Kiki Yesu ekiyatutereriire kukora? (b) Munyaanya itwe omu akesanga munyikara ki ey’egumangaine?
7 Yesu akatutererra ngu twikale nitutwaza abantu omu mulingo ogutwakugondeze batutwazeemu. Kandi akongera y’agamba ngu titusemeriire kugonza abo ab’arukutugonza bonka. (Luk. 6:31-33) Nobukiraaba kitakira kubaho, kiki eky’osobora kukora kakuba omuntu omu kitebe akwetantara kandi ayanga kukuramukya? Eki nikyo kyahikire hali Lara. Nasoborra ati: “Munyaanya itwe akaba nanyetantara baitu nkaba ntamanyire ensonga habwaki. Ekintu kinu kikantuntuza muno kandi tinagonzaaga n’okugenda omu nsorrokano.” Ha kubanza nkatekereza nti: ‘Tinyine musango gwona. Kandi n’abandi omu kitebe nibakirora ngu omulingo arukwetwazaamu tiguli murungi.’
8. Kiki Lara ekiyakozere kugarraho obusinge, kandi ekyokurorraho kye nikitwegesa ki?
8 Lara akalengaho kugarraho obusinge. Akasaba hali Yahwe kandi yacwamu kugenda kubaza na munyaanya itwe ogu. Bakabazaaho ekizibu eki kurungi, bagwangana omu kifuba, kandi bagarraho obusinge. Kikazooka ngu ensonga enu ehwaire. Lara nayongera nagamba ati: “Baitu hanyuma y’akasumi munyaanya itwe akongera yantwaza kubi nk’oku akaba nakora. Eki kikamaramu muno amaani.” Lara akabanza kutekereza ngu tarukwija kutunga okusemererwa kuhikya munyaanya itwe ogu obw’arahindura enyetwaza ye. Baitu hanyuma Lara akakyetegereza ngu ekintu ekirukukirayo oburungi eky’asemeriire kukora nukwo kugumizaamu nayoleka munyaanya itwe ogu okugonza kandi ‘namuganyira.’ (Bef. 4:32–5:2) Lara akaijuka ngu okugonza okw’Ekikristaayo tikwahura enzigu, ‘tikutekereza obubi. Nikugumira byona, nukuikiriza byona, nikunihira byona, nikugumiisiriza byona.’ (1 Kol. 13:5, 7) Lara akongera yatunga obusinge omu mutima. Hanyuma y’akasumi, munyaanya itwe onu akatandika kumutwaza kurungi. Kakuba oikara nolengaho kugarraho obusinge hagati yaawe n’Abakristaayo bagenzi baawe, okigumye ngu “Ruhanga owokugonza owobusinge aliikara [naiwe].”—2 Kol. 13:11.
OTASOROORA
9. Kusigikirra ha Engeso Ezabakwenda 10:34, 35, habwaki tutasemeriire kusoroora?
9 Yahwe tasoroora. (Soma Engeso Ezabakwenda 10:34, 35.) Obututasoroora, twoleka ngu tuli baana ba Yahwe. Kandi twoleka ngu nitworobera ekiragiro eky’okugonza mutaahi waitu nk’oku turukwegonza itwenka, kandi kinu kiretera eka yaitu ey’eby’omwoyo kwikara erumu obusinge.—Bar. 12:9, 10; Yak. 2:8, 9.
10-11. Munyaanya itwe omu akasobora ata kweihamu entekereza embi?
10 Abantu abamu kibagumira kwerinda kusoroora. Ekyokurorraho, tekerezaaho eky’ahikire ha munyaanya itwe arukwetwa Ruth. Obw’akaba akyali mwisiki, omuntu kuruga omu ihanga erindi akakora eka yabo ekintu ekibi muno. Kinu kikamukwataho kita? Ruth nagamba ati: “Nkanoba buli kimu kyona ekirukukwata ha ihanga eryo. Kandi nkatekereza ngu abantu boona kuruga omu ihanga eryo nukwo betwaza otwaliremu ab’oruganda n’abanyaanya itwe.” Kiki ekyakonyire Ruth kuleka kwehurra ati?
11 Ruth akakyetegereza ngu akaba aine kwekamba muno kuleka kwehurra ati. Akasoma ebyokurorraho na ripooti omu Yearbook ebirukukwata ha ihanga eryo. Nagamba ati: “Nkekamba kuleka kutekerezaaho kubi abantu kuruga omu ihanga eryo. Nkatandika kukyetegereza ngu ab’oruganda n’abanyaanya itwe abo baali nibekamba muno kuheereza Yahwe. Nkakirorra kimu nk’oku nabo bali kicweka ky’oruganda rwaitu orw’ensi yoona.” Mpora mpora, Ruth akakyetegereza ngu akaba asemeriire kwoleka Abakristaayo abo okugonza. Nasoborra ati: “Obunatanganaga ab’oruganda n’abanyaanya itwe kuruga omu ihanga eri, n’alengahoga muno kubanywana. Nabazaaga nabo kandi kinu kikankonyera kubamanya kurungi.” Kiki ekyarugiremu? Ruth nagamba ati: “Hanyuma y’akasumi, entekereza yange ekahindukira kimu.”
Obuturaaba ‘nitugonza bene baitu’ titurukwija kubasoroora (Rora akacweka 12-13)d
12. Munyaanya itwe arukwetwa Sarah akaba aine kizibu ki?
12 Abamu basoroora bangezi babo batakimanyire. Ekyokurorraho, Sarah akaba natekereza ngu tarukusoroora habwokuba tiyatekerezaaga kubi h’abantu abandi nasigikirra h’arangi, sente ezi baine, rundi obujunaanizibwa obu baine omu kitebe. Baitu nagamba ati: “Nkatandika kukyetegereza ngu nkaba ninsoroora.” Omu mulingo ki? Sarah n’abanyabuzaale be bantu abasomere muno nahabweki yagonzaaga kwikara n’abantu abasomere muno nkawe. Kiro kimu akagambira munywani we ati: “Nyowe obwire bwange mbumara n’Abakristaayo abasomere muno. Kandi nyetantara abo abatarasomere.” Nikyeyolekera kimu ngu Sarah akaba aine kuhindura entekereza ye. Kiki eky’amukonyire?
13. Kiki ekiturukwega kuruga omu mulingo Sarah yahindwire enyetwaza ye?
13 Omurolereezi ow’ekicweka akakonyera Sarah kumanyirra ekizibu kye. Sarah nagamba ati: “Akansiima habw’okuheereza Yahwe n’obwesigwa, habw’eby’okugarukamu byange ebirungi, kandi na habw’okumanya kurungi Ebyahandiikirwe. Akansobora nagamba ngu obutweyongera kukura omu kumanya, nikitwetagisa n’okukurakuraniza emiringo enungi ey’Ekikristaayo nk’obwebundaazi, obuculeezi, n’embabazi.” Sarah akahondera obuhabuzi obw’omu muroleerezi w’ekicweka y’amuhaire. Nagamba ati: “Nkakyetegereza ngu kikuru muno kwoleka abantu abandi embabazi hamu n’okugonza.” Ekyarugiremu, Sarah akatandika kurora ab’oruganda n’abanyaanya itwe omu mulingo omurungi. Nasoborra ati: “Nkatandika kulengaho kwetegereza emiringo yabo enungi ey’ebafoora b’omugaso hali Yahwe.” Kandi itwe twetwaza tuta? Titusemeriire kwehurra ngu nitukira abandi habwokuba tusomere muno! Obuturaaba ‘nitugonza bene baitu’ titurukwija kubasoroora.—1 Pet. 2:17.
YOLEKA ABANDI AMAKUNE
14. Kusigirra ha Abaheburaniya 13:16, Yahwe ayehurra ata obutukunira abandi?
14 Yahwe asemererwa muno obutukunira abandi. (Soma Abaheburaniya 13:16.) Hali Yahwe kukunira abandi kicweka ky’okuramya kwaitu, kukira muno kukonyera abatarukwesobora. (Yak. 1:27; 2:14-17) Nahabweki Ebyahandiikirwe bitwekambisa biti: “Mukuratire okukunira abagenyi.” (Bar. 12:13) Obutukunira abandi, tuboleka ngu nibafaaho, nitubagonza, kandi nitugonza kufooka banywani baabo. Yahwe asemererwa obutuha abantu abandi eky’okulya, eky’okunywa, rundi obutwefereza obwire bwaitu kuba nabo. (1 Pet. 4:8-10) Baitu haroho ebintu ebimu, ebisobora kutulemesa kukunira abandi.
“Kara, tinagonzaaga kukunira abantu, baitu obunatandikire kubakunira nk’atunga okusemererwa kwingi” (Rora akacweka 16)e
15-16. (a) Habwaki abamu batiina kukunira abandi? (b) Kiki eky’akonyire munyaanya itwe arukwetwa Edit kuleka kutiina kukunira abandi?
15 Nitusobora kutiina kukunira abandi habw’enyikara yaitu. Tekerezaaho ekyokurorraho kya munyaanya itwe omufaakati arukwetwa Edit. Obwakaba atakafookere omu h’Abakaiso ba Yahwe, tiyagonzaga kwehikya muno abantu. Edit yayehurraga ngu abandi baali nibasobora kukunira abantu okumukira.
16 Hanyuma y’okufooka omu ha Bakaiso ba Yahwe, Edit akahindura entekereza ye. Kandi yatandika kukunira abandi. Edit nagamba ati: “Ekyombeko kyaitu eky’Obukama obukyali nikyombekwa, omugurusi w’ekitebe akangambira nk’oku hali haroho ow’oruganda na mukazi abali nibagenda kwija kukonyera omu kwombeka, kandi akankaguza obukiraaba nikisoboka kubaraza habwa wiiki ibiri. Nkaijuka omulingo Yahwe yahaire omugisa omufaakati owa Zalefasi.” (1 Bakam. 17:12-16) Munyaanya itwe Edit akaikiriza kubaraaza. Akatungamu emigisa? Nasoborra ati: “Bataikale nanyowe kumara wiiki ibiri zonka baitu kumara ameezi abiri. Omu bwire obu tukafooka banywani muno.” Edit atungire n’omugisa ogw’okutunga abanywani abandi omu kitebe. Hati naheereza nka payoniya kandi akira kuraliza abaatebiize nabo kumubungiraho nukwo abakunire. Nagamba ati: “Kukunira abandi kindetera kwehurra kurungi! Kandi amananu gali ntungire emigisa nyingi habw’okukunira abandi.”—Baheb. 13:1, 2.
17. Ow’oruganda Luke na mukazi we baketegereza ki?
17 Tusobora kuba tukunira abagenyi, baitu nikisobora kutwetaagisa kwongera kusemeza omulingo tukikoramu. Ekyokuroraho, Ow’oruganda Luke na mukazi bantu ab’amakune. Baakiraga kukunira abazaire babo, abanyabuzaale, abanywani baabo, omurolereezi w’ekicweka na mukazi we. Baitu Luke nagamba ati, “Tukakyetegereza ngu twakiraga kukunira banywani baitu bonka.” Luke na mukazi bakakora ki kusobora kweyongera kwoleka amakune?
18. Ow’oruganda Luke na mukazi we bakongera bata kusemeza omulingo bakuniramu abandi?
18 Ow’oruganda Luke na mukazi we bakahindura entekereza yabo obubayecumitirizeeho ebigambo bya Yesu ebirukugamba ngu: “Baitu obumuraba nimugonza abo abanyakubagonza, muyina empera ki?” (Mat. 5:45-47) Bakakyetegereza ngu basemeriire kuhondera ekyokurorraho kya Yahwe ow’agabira boona atarukusoroora. Nahabweki bakakifoora kigendererwa ky’abo kuraaliza ab’oruganda n’abanyaanya itwe abatakaralizibwaga omu ka yabo. Luke nagamba ati: “Itwena hati nitwegondeza omu bwire obu. Kandi buli omu ayehurra agarukiremu amaani.”
19. Twoleka tuta ngu tuli bageswa ba Yesu, kandi kiki eky’ocwiremu kukora?
19 Twegere omulingo kugonzangana kuruga ha mutima gusobora kutukonyera kuserra obusinge, kutasoroora, n’okukunira abandi. Tusemeriire kurwanisa entekereza zoona ezitahikire kandi twege kugonza ab’oruganda n’abanyaanya itwe kuruga ha mutima. Kakuba tukikora, nitwija kutunga okusemererwa kandi twoleke ngu mali tuli begeswa ba Yesu.—Yoh. 13:17, 35.
EKIZINA 88 Onyegese Emihanda Yaawe
a Yesu akagamba ngu okugonza kakubaire kokurorraho ak’okumanya Abakristaayo ab’amananu. Okugonza okutwiniire ab’oruganda n’abanyaanya itwe kutuletera kulinda obusinge, kutasoroora, n’okwoleka amakune. Baitu kinu nikisobora kuguma. Omu kicweka kinu nitwija kwega omulingo tusobora kwongera kwolekangana okugonza kuruga ha mutima.
b Omu kicweka kinu amabara agamu gahindwirwe.
c KUSOBORRA EBISISANI: Munyaanya itwe obwalengaho kugarraho obusinge omurundi ogw’okubanza alemwa, baitu talekeraho kuserra obusinge. Habw’okugumizaamu nayoleka okugonza agarraho obusinge.
d KUSOBORRA EBISISANI: Ow’oruganda ow’akuzire omu myaka nayehurra bamusoroire.
e KUSOBORRA EBISISANI: Munyaanya itwe ow’akaba natiina kwoleka abandi amakune, ahindura entekereza ye, kandi kinu kimuletera kweyongera kutunga okusemererwa.