Omulingo Esaara Zisobora Kukukonyera

Pamela akaba arwaire muno kandi yagenda kutunga obujanjabi. Baitu, akasaba na Ruhanga amukonyere kugumira enyikara ye ey’egumangaine. Okusaba kukamukonyera?

Pamela akasoborra ati: “Obubabaga nibajanjaba kansa, nakiraga kwehurra ntiniire muno. Baitu obunasabaga hali Yahwe Ruhanga, natekanaga kandi ntandika kutekereza kurungi. Nahati ky’aine obusaasi obw’amaani, baitu okusaba kunkonyera kwikara nyine entekereza nungi. Abantu obubankaguza omulingo ndukwehurra, mbagarukamu nti, ‘Tindikwehurra kurungi, baitu nyine okusemererwa!’”

Tikirukutwetaagisa kubanza kurwara oburwaire obw’amaani rundi kuhikwaho ebizibu nukwo tukasaba. Itwena tuhikwaho ebizibu, kabibe by’amaani muno rundi bitaito, kandi tukira kwehurra ngu nitwetaaga obukonyezi obw’okubigumiisiriza. Okusaba nikusobora kukukonyera?

Baibuli n’egamba ngu: “Nagira Mukama enketo yawe, uwe arakusagika: talireka abahikiriire okutengesebwa ebiro byona.” (Zabuli 55:22) Ebigambo ebi kanibigarramu muno amaani! Hati, okusaba nikusobora kukukonyera kuta? Obworasaba Ruhanga omu mulingo oguhikire, naija kukuha ekyorukwetaaga kusobora kugumira ebizibu byawe.—Rora akasanduuko “Eby’Osobora Kutunga Kakuba Osaba.”

Eby’Osobora Kutunga Kakuba Osaba

Obusinge omu bitekerezo

“Mumanyisege ebimuserra hali Ruhanga. Kandi nobusinge bwa Ruhanga oburukukira okumanywa kwona bulirinda emitima yanyu nebitekerezo byanyu omu Kristo Yesu.” (Abafiripi 4:6, 7) Obworagambira Ruhanga ebintu ebikweralikiriize, naija kukukonyera kwikara otekaine kandi n’okukora encwamu nungi.

Amagezi kuruga hali Ruhanga

“Omuntu wena omulinywe obwaburwa amagezi, asabe Ruhanga, arukuha bona okutaima kunu tarukuhana, kandi alihabwa.” (Yakobo 1:5) Obutuba twetuntwire muno, titukira kukora encwamu enungi. Kakuba osaba Ruhanga akuhe amagezi, n’asobora kukwijukya emisingi nyingi ey’eri omu Baibuli ey’esobora kukukonyera.

Amaani n’okuhumuzibwa

“Ninsobora kukora byona habwogu arukumpa amani.” (Abafiripi 4:13) Habwokuba Yahwe nuwe Ruhanga Ow’obusobozi bwona, n’asobora kukuha amaani ag’okugumiisiriza ebizibu byawe rundi kukukonyera kuraba omu birengo eby’oine. (Isaya 40:29) Baibuli ebazaaho Yahwe nka “Ruhanga owokuhumuza kwona.” Nasobora kutuhumuza “omu muhito gwaitu gwona.”—2 Abakolinso 1:3, 4.

ORAGASIRWA?

Yahwe tasobora kukuhambiriza kumusaba. Baitu n’okugonza okwingi nakuraaliza omusabe. (Yeremiya 29:11, 12) Ekiki eky’osemeriire kukora kakuba oba noyehurra ngu omu busumi bwakara Ruhanga atagarukemu esaara zaawe? Otahwamu amaani. Abazaire abaine okugonza nibasobora kutakonyera abaana baabo omu bwire bwonyini abaana baabo barukunihira. Abazaire abo nibasobora kuba baine omulingo ogurukukira oburungi ogw’okumara ekizibu eki. Baitu ekintu kimu ekitutasobora kugurukyagurukya kiri ngu: Abazaire ab’okugonza bakonyera abaana baabo.

Yahwe Ruhanga—omuzaire arukukirrayo kimu okugonza—nagonza muno kukukonyera. Kakuba oyekebiija kurungi obuhabuzi obutubalizeeho kuruga omu Baibuli, kandi okakora kyona ekirukusobora kubuteeka omu nkora, Ruhanga naija kugarukamu okusaba kwawe omu mulingo ogurukukira oburungi!—Zabuli 34:15; Matayo 7:7-11.