Nk’Oku Osobora Kwikara Omu Nsi Empyaka

Ebicweka ebihoire byolekere nk’oku omu kasumi akatali ka hara Ruhanga naija kuhwerekereza abantu ababi n’okumaraho ebizibu byona. Nitusobora kukigumya ngu kinu nikiija kubaho. Habwaki? Habwokuba Ekigambo kya Ruhanga Baibuli kiraganiize kiti:

“Ensi ehwaho.”—1 YOHANA 2:17.

Nitusobora kukigumiza kimu ngu nihaija kubaho abantu abaliikiraho habwokuba orukarra orwolekerwe eruguru rwongera ruraganiza ruti:

“Anyakukora Ruhanga ebyagonza aikaraho ebiro nebiro.”

Nahabweki, obuturaaba nitugonza kukiraho, tusemeriire kukora Ruhanga eby’agonza. Kusobora kumanya ebintu Ruhanga agonza, tusemeriire kubanza kumumanya.

KUSOBORA KUKIRA EMPERO ‘MANYA’ RUHANGA

Ebisisani: 1. Naasi ali omu irwarro aigamiire ekisiika, ajwahire kandi ayetuntwire. 2. Omu bwire bw’okuhumura agenda omu hoteeri kandi arora mugenzi nasoma magaziini asemeriirwe. 3. Omukozi mugenzi we amusomera orukarra kandi amuha kaadi erukuragirra ha mukura ogwa jw.org.

Yesu akagamba ati: “Bunu nubwo obwomezi obutahwaho, okumanya iwe Ruhanga omu owamananu.” (Yohana 17:3) Kusobora kukiraho ha mpero kandi tukomeera ebiro n’ebiro, tusemeriire “okumanya” Ruhanga. Kinu tikirukugarukira ha kwikiriza kwonka ngu Ruhanga aroho rundi kumumanyaho ebintu bike kyonka, baitu tusemeriire n’okuba banywani be. Nk’oku obunywani obundi bwona bwetaagisa kuteekamu obwire, nikyo kimu n’obunywani bwaitu na Ruhanga. Tekerezaaho amananu agamu agaturukwega kuruga omu Baibuli agatukonyera kukurakuraniza obunywani bwaitu na Ruhanga kandi agatukonyera kubwikazaaho.

Amananu Agaturukwega Kuruga omu Baibuli

Nitwega ngu Ruhanga akaba nagonza twikale omu Rugonjo Orurungi.

Akahanga abantu ab’okubanza, Adamu na Hawa, kandi yabateeka omu kiikaro ekirungi ekirukwetwa orugonjo rwa Adeni. Bakaba bahikiriire, kandi Ruhanga akaba abahaire buli kimu kyona ekibarukwetaaga kusobora kuba n’obwomeezi oburumu okusemererwa. Bakusoboire kwomeera ebiro n’ebiro. Kakuba baikaire bali banywani ba Ruhanga, tibakufiire. Baitu bakacwamu kujeemera ekiragiro kya Ruhanga ekyanguhire.

Nitwega ensonga habwaki tubonabona kasumi kanu.

Habwokuba omusaija ow’okubanza Adamu akajeemera Ruhanga, akafeerwa omugisa ogw’okwomeera ebiro n’ebiro kandi yagufeereza n’abantu abandi. Baibuli esoborra eti: “Nukwo, nkekibi okukyatahire omu nsi obwomuntu omu, kandi nokufa obwekibi; nukwo nokufa kwahikire kuti habantu bona.” (Abarumi 5:12) Nk’oku omuzaire asobora kuturra omwana we oburwaire, Adamu nauwe akaturra abaana be boona obutahikirra. Ekyarugiremu, hati tukaikura kandi tufa.

Nitwega ebintu Ruhanga eby’amazire ira kukora kutukonyera.

Baibuli n’egamba eti: “Ruhanga nukwo yagondeze ati Ensi, nahayo Omwanawe ayazairwe omu wenka, omuntu wena anyakumuikiriza aleke okubura, baitu atunge obwomezi obutahwaho.” (Yohana 3:16) Ruhanga akatuma Yesu omu nsi kuhayo obwomeezi bwe habwaitu. Omusaija kuruga India ow’emyaka 86 arukwetwa Prabhakar akabazaaho ekikorwa kinu ky’okugonza ati: “Nikyoleka okugonza okwingi Yahwea okwanyiniire. Habw’okugonza kwe okwingi, nsoboire kutunga okunihira okw’obwomeezi obutahwaho.”

Nitwega omulingo tusobora kwoleka okusiima habw’ebintu Ruhanga atukoliire.

Baibuli n’egamba ngu nitusobora kwoleka okusiima habw’ebintu Ruhanga atukoliire kuraba omu ‘kukwata ebiragiro bye.’ (1 Yohana 2:3) Omu mulingo ogw’okugonza, Yahwe Ruhanga atwoleka ebintu ebitusemeriire kukora nukwo twegondeza omu bwomeezi kasumi kanu. (Isaya 48:17, 18) Ruhanga tarukugonza tubonabone. Naturaganiza ngu kakuba tuhondera ebiragiro bye, titurukwija kugarukira ha kwegondeza omu bwomeezi oburumu okusemererwa hati, baitu nitwija n’okutunga omugisa ogw’okwomeera ebiro n’ebiro.

SOMA EKIGAMBO KYA RUHANGA, BAIBULI, BULI KIRO

Naasi ali aheeru narora ha iguru hanyuma y’okusoma Baibuli omu bwire bw’ekyamusana. — N’osobora kukiraho ha mpero y’ensi enu kuraba omu kusaba obukonyezi bwa Ruhanga n’okukora ebyagonza

Tulya ebyokulya butoosa kusobora kwikara tuli boomeezi. Baitu Yesu akagamba ati: “Omuntu taba mwomezi nebyokulya byonka, baitu nekigambo kyona ekiruga omu kanwa ka Ruhanga.”—Matayo 4:4.

Kasumi kanu, ebigambo bya Yahwe nitubisanga omu Baibuli. Obworaaba n’osoma ekitabu eki ekirukwera, noija kwega ebintu Ruhanga ebiyakoliire abantu omu kasumi aka kara, ebyarukukora hati, kandi n’ebyarukwija kukora omu kasumi ak’omu maiso.

SABA RUHANGA AKUKONYERE

Kiki eky’osobora kukora kakuba oba n’ogonza kworobera ebiragiro bya Ruhanga, baitu okasanga ngu nikikugumira kuleka kukora ebintu ebyarukugamba ngu bibi? Ekisobora kukukonyera nukwo kumanya kurungi Ruhanga.

Tekerezaaho ekyokurorraho ky’omukazi outurayeta Sandra ow’akaba ali musihani. Obuyatandikire kwega Baibuli, akegaho ekiragiro kya Ruhanga ekirukukwata ha busihani ekirukugamba “muiruke obusihani.” (1 Abakolinso 6:18) Sakura akasaba Ruhanga kumuha amaani kandi yasobora kuleka engeso enu embi. Baitu na hati akyaine kurwanisa ebyohyo. Nagamba ati: “Ebitekerezo eby’obusihani obubinyizira, nsaba Yahwe kuruga ha mutima nimugambira nk’oku ndukwehurra, nimanya ngu tinsobora kubirwanisa nyenka. Okusaba kunkonyiire kweyongera kwirra haihi na Yahwe.” Kusisanaho na Sakura, obukaikuru n’obukaikuru bw’abantu nibeega ebirukukwata hali Ruhanga. Nabaha amaani agabarukwetaaga kukora empindahinduka omu bwomeezi bwabo kandi n’okwetwaza omu mulingo ogurukumusemeza.—Abafiripi 4:13.

Obworayeyongera kumanya kurungi Ruhanga, nauwe naija kweyongera kukumanya nk’omunywani we ow’omuhendo. (Abagaratiya 4:9; Zabuli 25:14) Hanyuma noija kusobora kukira ha kiro eky’empero kandi otaahe omu nsi empyaka. Baitu ensi egi empyaka niija kusisana eta? Ekicweka ekirukwongeraho nikiija kusoborra ekikaguzo eki.

a Yahwe niryo ibara lya Ruhanga nk’oku kyolekerwe omu Baibuli.