1921—Emyaka Kikumi Enyuma

“MULIMO ki ogutulindiriire kukora omu mwaka gunu?” Watch Tower eya Janwali 1, 1921 ekabamu ekikaguzo kinu kuletera Abeegi ba Baibuli ekihika. Hanyuma ekajuliza Isaya 61:1, 2, ekyahandiikirwe kinu kikabaijukya obujunaanizibwa bwabo obw’okutebeza. Nikigamba kiti: “[Yahwe] ansesereho amagita [okutebeza] abanaku ebigambo ebirungi . . . , okuduma omwaka gwa [Yahwe] oguikirizibwa, nekiro kya Ruhanga waitu ekyokuhorraho enzigu.”

ABATEBEZI ABAMANZI

Kusobora kuhikiiriza obujunaanizibwa bwabo obw’okutebeza, Abeegi ba Baibuli bakaba nibetaaga kuba bamanzi. Bakaba nibagenda kutebeza “ebigambo ebirungi” hali abaculeezi hamu “nekiro kya Ruhanga ekyokuhorraho enzigu” hali ababi.

Ow’oruganda J. H. Hoskin, ay’aikaraga omu Canada, akatebeza atarukutiina n’obwaraaba yahakaniziibwe. Ha kutandika kw’omwaka gwa 1921, akatangatangana omutebezi ow’Abamesodisiti. Ow’oruganda Hoskin obwakaba n’atandika kubaza na uwe akagamba ati: “Leka tubazeeho Ebyahandiikirwe, n’obuturaaba tutaikiranganiize ha bintu ebimu nakugondeze twikale tuli banywani.” Baitu eki tinukwo kyabaire. Ow’oruganda Hoskin akagamba ati: “Tukaba twakabazaaho obudakiika buke, nubwo omutebezi ogu yakingire orwigi rwe n’amaani maingi muno eky’andetiire kutekereza ngu ekirahule ky’orwigi ekikooto kyali nikigenda kugurukamu kyeteere hansi.”

Omutebezi ogu akatoka ati: “Habwaki otagenda okatebeza abantu abatali Abakristaayo?” Ow’oruganda Hoskin atamugarukemu baitu obwakaba n’agenda akatekereza ati: ‘Nayetwaza nk’omu halibo!’

Omu kutebeza kwe ekiro ekyayongiireho, akabazaaho Ow’oruganda Hoskin ebisuba. Ow’oruganda Hoskin akagamba ati: “Akagambira abahondezi be ngu ninyowe omubiihi w’ebisuba ow’arukukirayo ayakaijaga omu tawuni egi, kandi ngu nkaba nsemeriire kwitwa.” Baitu eki kitamulemese, akagumizaamu n’atebeza kandi akabaza n’abantu baingi. Akagamba ati: “Nkegondeza muno omu kutebeza omu kicweka eki. Abantu abamu bangambiraga bati: ‘Nkimanyire oli musaija wa Ruhanga,’ kandi bansabaga kunkonyera nukwo ntabaho n’ekintu kyona ekindukwetaaga.”

OKWESOMESA HAMU N’OKWEGA BAIBULI NK’EKA

Kukonyera abantu kwetegereza kurungi Baibuli, Abeegi ba Baibuli baturukyaga ebikaguzo kuruga omu Baibuli hamu n’ebigarukwamu omu magaziini eya The Golden Age.a Hali harumu n’ebikaguzo kuruga omu Baibuli abazaire ebi babazaahoga n’abaana baabo abato. Abazaire bakaguzaaga abaana baabo ebikaguzo binu kandi babakonyeraga kutunga eby’okugarukamu kuruga omu Baibuli.” Ebikaguzo ebimu nka “Bitabu bingaha ebiri omu Baibuli?,” byayegesaaga ebintu ebimu ebyanguhire ebirukukwata ha Baibuli. Ebindi nka, “Buli Mukristaayo wena ow’amananu asemeriire kunihira kuhiganizibwa?,” byakonyeraga abato kufooka abatebezi abamanzi.

Hali haroho n’ebikaguzo kuruga omu Baibuli hamu n’ebigarukwamu habw’abo abaali bamanyire bingi kuruga omu Baibuli, ebigarukwamu byasangwaga omu muzingo ogw’okubanza ogw’ekitabu Studies in the Scriptures. Ebikaguzo binu bikakonyera abasomi baingi, baitu omu The Golden Age eya Desemba 21, 1921, kikarangwa ngu ebikaguzo binu bikaba bitarukugenda kwongera kuturukibwa. Habwaki habaireho empindahinduka enu eya bwangu bwangu?

EKITABU EKIHYAKA!

Ekitabu *The Harp of God*

Kaadi erukwoleka ekicweka omuntu asemeriire kusoma

Kaadi eziroho ebikaguzo

Ab’oruganda abakaba nibebembera bakakyetegereza ngu Abeegi ba Baibuli abahyaka baali nibetaaga kwega amananu agarukubandirizibwaho omu mulingo ogutekaniziibwe kurungi. Kuhikiiriza ekigendererwa kinu, ekitabu The Harp of God kikaturukibwa omu Novemba 1921. Abarukugonza amananu abaikirizaaga ekitabu kinu bayeteranizaaga na ha ntekaniza ey’okwesomesa Baibuli eyayetwaga Harp Bible Study Course. Entekaniza enu ey’okwesomesa wenka ekakonyera abasomi kwetegereza “ekigendererwa kya Ruhanga eky’okuha abantu obwomeezi obutahwaho.” Entekaniza enu yakoraga eta?

Omuntu obuyatungaga ekitabu kinu yaheebwaga n’akakaadi akataito akarukwoleka ekicweka eky’asemeriire kusoma. Wiiki eyayongerahoga, yatungaga kaadi empyaka ey’eroho ebikaguzo ebirukukwata ha kicweka ekiyasomere. Kaadi enu ey’eroho ebikaguzo yamalirraga n’ekicweka ekyakaba asemeriire kusoma habwa wiiki erukwongeraho.

Buli wiiki kumara ameezi asatu, omwegi yasindikirwaga kaadi empyaka kuruga omu kitebe ekyamubaga haihi. Kaadi zinu zakiraga kusindikwa abakuzire muno omu myaka, rundi abo abakaba batarukusobora kugenda kutebeza enju ha nju. Ekyokurorraho, Anna K. Gardner, kuruga omu kicweka Millvale, Pennsylvania, omu U.S.A., akagamba ati: “Ekitabu The Harp of God obukyaturukiibwe, kikakonyera munyaanya nyowe Thayle, ow’akaba atarukusobora kurubata, kutunga bingi eby’okukora. Yasindikaga buli wiiki kaadi eziroho ebikaguzo.” Omwegi obuyamaraga entekaniza enu ey’okwesomesa, omuntu kuruga omu kitebe yamubungiraga kumukonyera kweyongera kwega bingi kuruga omu Baibuli.

OMULIMO OGUKABA GUBAINDIRIIRE

Ha kumalirra kw’omwaka ogu, Ow’oruganda J. F. Rutherford akasindikira ebitebe byona ebbaruha. Akagamba ngu, “omulimo ogw’okutebeza Obukama ogukozerwe mwaka gunu, gukozerwe ha rulengo hamu n’omu mulingo ogurukukirayo oburungi kukira omu myaka eyakara, omu kasumi kanu ak’amagesa.” Hanyuma akongeraho ati: “Tukyaine omulimo ogw’amaani ogw’okukora. Mwekambise n’abandi kwejumbira omu mulimo gunu omurungi.” Nikyeyolekera kimu ngu, Abeegi ba Baibuli bakahuliriiza okutererra oku. Omu 1922 bakatebezaaho Obukama n’obumanzi, kukira nk’oku baali bakozere kara.

Abanywani Abamanzi

Abeegi ba Baibuli bakolekangana okugonza okw’Ekikristaayo kuraba omu kukonyerangana. Bakaba bali banywani abamanzi abaakonyire bagenzi baabo omu bwire obw’obujune nk’oku ekyokurorraho ekirukwongeraho kirukwoleka.—Nfu. 17:17.

Omu 1921, Maayi 31, kyali Kyakabiri, omusaija arukwiragura omu rubuga rwa Tulsa, Oklahoma omu U.S.A akateebwa omu nkomo habw’okujunaanwa kukora kubi omukazi ow’arukwera. Hanyuma y’ebi abasaija abarukwera abarukuhingura omu 1,000 bakarwana na guruupu entaito ey’abasaija abarukwiragura. Okurwana kunu kukeyongera bwangu kwahikira kimu n’omu kicweka ekyakiraga kwikarwamu abantu abarukwiragura ekyayetwaga Greenwood. Amaka agarukuhingura omu 1,400 hamu na bizineesi bikacwibwa kandi hanyuma byayokebwa. Nikigambwa ngu abantu 36 nubo baisirwe baitu nikisobora kuba ngu abantu nka 300 nubo baisirwe. Hanyuma akaimukirro kanu kakeetwa Tulsa Race Massacre.

Ow’oruganda ow’arukwiragura Richard J. Hill, Omwegi wa Baibuli kandi ayaikaraga omu kicweka kya Greenwood, akasoborra ebyabaireho ati: “Ekiro ekyakaimukirro, twali tuli omu nsorrokano nk’oku twakoraga butoosa obutwamazire ensorrokano tukahurra amasasi omu rubuga rwa Tulsa kandi gakagumizaamu kuhikira kimu omu itumbi.” Nambere kyahikiire Kyakasatu Juuni 1 enyikara ekaba ey’eyongeriire kimu kusiisikara. “Abantu abamu bakaija batugambira ngu obuturaaba nitwetaaga obulinzi tusemeriire kugenda omu kyombeko ekya gavumenti ekikooto ekiri omu rubuga.” Nahabweki Ow’oruganda Hill, mukazi we, hamu n’abaana baabo bataano bakairuka baagenda omu kyombeko kinu omu Tulsa. Omu kyombeko kinu haali harumu abasaija n’abakazi abarukwiragura abaali nibateberezebwa kuba nka 3,000 abaali balinzirwe amahe agaali gasindikirwe gavumenti kusobora kutanga okurwana kunu.

Omu kaire ako, Ow’oruganda Arthur Claus ow’akaba nayera, akakora encwamu ey’obumanzi. Akagamba ati: “Obunahuliire ngu abantu baali nibacwa kandi nibookya amaka omu Greenwood nkacwamu kugendayo kurora munywani wange nfe na nfe Ow’oruganda Hill nk’okwali.”

Ow’oruganda Arthur Claus akegesa kilaasi y’abaana 14 n’akozesa ekitabu The Harp of God

Obuyahikire omuka y’Ow’oruganda Hill akarora omutaahi wa Hill ow’arukwera akwasire emundu, omutaahi onu na uwe ow’akaba ali munywani w’Ow’oruganda Hill akateekereza ngu Arthur ali omu h’abarukwesalinga. Akatoka ati: “Noserra ki hanu?”

Arthur akagamba ati: “Kakuba ntaramugarukiremu omu mulingo ogw’amunanwire akaba n’agenda kunteera isasi. Nkamugumya ngu ndi munywani w’Ow’oruganda Hill kandi ngu mbungire omu ka enu emirundi nyingi.” Arthur hamu n’omutaahi onu bakasobora kulinda eka ya Hill tiyatahirirwa abarukwesalinga.

Hanyuma y’akasumi kake, Arthur akakyetegereza ngu Ow’oruganda Hill hamu n’eka ye bakaba bali omu kyombeko kya gavumenti ekiri omu rubuga. Arthur bakamugambira ngu abantu abarukwiragura bali batarukusobora kurugayo rundi buli baine ekihandiiko ekirukubaikiriza, ekiroho omukono gwa General Barret. Arthur nagamba ati: “Kyali kigumire muno kutunga General okabaza na uwe. Obunamugambiire eki ndukugonza kukora, akankaguza ati: ‘Nogenda kulinda eka enu kandi ogihikyeho ebyetaago byayo?’ N’okusemererwa nkagamba ego.”

Obuyatungire ekihandiiko kinu Arthur akanguha kugenda ha kyombeko nambere ba Hill bakaba bali. Obuyahaire omuserukale ekihandiiko kinu, omuserukale akagamba ati: “Gunu mukono gwa general wenyini! Okimanyire ngu niiwe obandize kwiha omuntu omu kiikaro kinu?” Omu bwire butaito omuserukale onu hamu na Arthur bakazoora Ow’oruganda Hill hamu n’eka ye. Boona bakataaha omu motoka ya Arthur bagenda omu ka ya Hill.

Ow’oruganda Arthur akakigumya ngu obwomeezi bw’Ow’oruganda Hill n’eka ye tibuli omu kabi. Ekyokurroraho eky’Ow’oruganda Arthur eky’obumanzi hamu n’okugonza okw’Ekikristaayo kikakwataho muno n’abantu abandi. Arthur akagamba ati: “Omutaahi ayakonyiire kulinda eka ey’Ow’oruganda Hill akeyongera kuteekamu Abakaiso ba Yahwe ekitiinisa kukira na kara. Kandi abantu baingi bakagonza kwegaho Obukama habwokuba bakarora ngu titurukusoroora omurangi, kandi ngu itwena abaheereza ba Ruhanga abehaireyo nitwingana.”

a Omu 1937 magaziini eya The Golden Age ekahindurwa yayetwa Consolation, kandi omu 1946 ekongera yahindurwa yayetwa Awake!