Ebikaguzo Kuruga Omu Basomi Baitu

Baibuli ebazaaho ki kuteera ebirahiro?

Ekirahiro nikimanyisa “kubaza ekintu ekyorukumanyisiza kimu, kurangirra rundi kuraganiza kukora ekintu, emirundi erukukira obwingi oteekamu Ruhanga . . . nka kaiso.” N’osobora kukibaza rundi kukiteeka omu buhandiiki.

Abamu nibasobora kutekereza ngu tikihikire kuteera ekirahiro, habwokuba Yesu akagamba ati: “Otalirahira [ekirahiro] na kake . . . Baitu ebigambo byanyu biikalege biti Ego, ego; nangwa, nangwa, baitu ebikira ebi nibyo biruga hali omubi.” (Mat. 5:33-37) Hataroho kugurukyagurukya, Yesu akaba akimanyire ngu omu Biragiro bya Musa haroho enyikara ezimu ezayetagisaaga Abaisaleri kuteera ebirahiro, kandi ngu n’abaheereza ba Ruhanga abesigwa nabo bakabiteera. (Kub. 14:22, 23; Kurug. 22:10, 11) Kandi akaba akimanyire ngu na Yahwe wenyini akateera ebirahiro. (Baheb. 6:13-17) Nahabweki Yesu akaba atarukumanyisa ngu titusemeriire nakake kuteera ebirahiro. Oihireho, akaba natutererra kwerinda kuteera ebirahiro ha bintu ebitali bikuru rundi ebitaine kigendererwa. Buli kaire tusemeriire kuhikiiriza ebintu ebituba turaganiize, habwokuba eki nikyo Yahwe arukugonza tukole.

Hati, kiki eky’osemeriire kukora, kakuba bakusaba kuteera ekirahiro? Eky’okubanza, kigumye ngu n’osobora kukora ekyorukugenda kurahira kukora. Obworaaba otarukukigumya, kirungi otateera ekirahiro. Ekigambo kya Ruhanga nikitutererra kiti: “Hakire oleke okweraga, oteraga hatali kumara.” (Mug. 5:5) Ekindi, tekerezaaho emisingi ya Baibuli erukukwata ha kirahiro eki, kandi hanyuma cwamu eky’okukora n’osigikirra ha muntu wawe ow’omunda ow’atendekerwe kurungi. Emu ha misingi enu kuruga omu Byahandiikirwe niyo eha?

Ebirahiro ebimu bikwatagana na Ruhanga eby’agonza. Ekyokurorraho, Abakaiso ba Yahwe bateera ebirahiro obubaba nibagaitwa. Omugole omusaija hamu n’omukazi barahira omu maiso ga Ruhanga ngu nibaija kugonzangana, kufaahongana, n’okuteekamungana ekitiinisa, kandi ngu binu nibaija kubikora “kuhikya okufa obukulibabaganizaamu.” (Abaswerangaine abandi tibabaza ebigambo binu byonyini obubaba nibagaitwa, baitu nabo barahira omu maiso ga Ruhanga.) Hanyuma barangirirwa nk’omunyoro n’omukyara, kandi basemeriire kwikara hamu obwomeezi bwabo bwona. (Kub. 2:24; 1 Kol. 7:39) Entekaniza enu ehikire, esemeriire, kandi nikiranganiza na Ruhanga eby’agonza.

Ebirahiro ebimu tibikwatagana na Ruhanga eby’agonza. Omukristaayo ow’amananu tasemeriire kuteera ekirahiro ekyo, ekyokurorraho nk’eky’okulinda ihanga nakozesa eby’okurwanisa, rundi eky’okwehakana okwikiriza kwe omuli Ruhanga. Ekyo obwakikora aba naacwa ebiragiro bya Yahwe. Abakristaayo tibasemeriire kuba kicweka ky’ensi, nahabweki tibasemeriire kwejumbira omu nkungani zaayo hamu n’obulemu.​—Yoh. 15:19; Isa. 2:4; Yak. 1:27.

Ebirahiro ebimu buli omu asemeriire kucwamu nasigikirra ha muntu we ow’omunda. Obwire obumu, nikisobora kutwetaagisa kutekerezaaho n’obwegendereza obuhabuzi bwa Yesu oburukugamba ngu “muheyoga hali Kaisali ebya Kaisali, na hali Ruhanga ebya Ruhanga,” tutakacwiremu obuturaaba tusemeriire kuteera ekirahiro rundi nangwa.​—Luk. 20:25.

Ekyokurorraho, kiki Omukristaayo eky’asemeriire kukora kakuba aba nasaba kuba mwikazi rundi pasipooti, baitu akakyetegereza ngu asemeriire kuteera ekirahiro eky’okuba mwesigwa hali ihanga. Kakuba omu ihanga eri, ekirahiro eki kiba nikitwarramu kukora ekintu ekitarukwikirizibwa omu biragiro bya Ruhanga, omuntu we ow’omunda ow’atendekerwe kusigikirra ha Baibuli tarukwija kumwikiriza kukiteera. Baitu gavumenti n’esobora kumwikiriza kuhinduramu ebigambo ebiri omu kirahiro eki nukwo kisobole kwikiranganiza n’omuntu we ow’omunda.

Kuteera ekirahiro eky’okuba mwesigwa hali ihanga baitu ekihindwirwemu nikisobora kwikiranganiza n’omusingi oguli omu Abarumi 13:1, ogurukugamba guti: “Omuntu wena ahurrege abalemi abakuru.” Nahabweki Omukristaayo nasobora kucwamu ngu tikiri kibi kweraga kukora ekintu Ruhanga ekyarukwetaagisa Abakristaayo kukora.

Ekindi, kikuru kworobera omuntu wawe ow’omunda obwosabwa kukwataho ekintu rundi kukora akokurorraho obworukuba noteera ekirahiro. Abarooma ab’omu busumi obwa kara barahiraga bakwasire empirima zaabo, ekikyamanyisaaga ngu bakozeseze akokurorraho aka Ruhanga wabo ow’obulemu kugumya ngu omuntu naija kuba mwesigwa. Abayonaani bahanikaga omukono bagwolekere haiguru obubabaga nibateera ekirahiro. Omu mulingo gunu bakyolekaga ngu nibakyetegereza ngu haliyo amaani ag’obwaruhanga agarukurora ebirukugambwa, ebirukukorwa, kandi againe obusobozi obw’okujunaana abantu.

Hataroho kugurukyagurukya, omuheereza wa Yahwe tasemeriire kurahira n’akozesa akokurorraho kihanga koona akaine akakwate n’okuramya okw’ebisuba rundi akakira kuramibwa. Baitu kiki eky’osemeriire kukora kakuba omu kooti ey’ebiragiro bakusaba kuteeka omukono gwawe ha Baibuli kandi okarahira ngu nogenda kuha obwakaiso obw’amananu? Omu nyikara nk’egi, n’osobora kucwamu kukikora, habwokuba Ebyahandiikirwe nibitugambiraho abaheereza ba Yahwe abesigwa abatiire ebirahiro bakozere akokurorraho. (Kub. 24:2, 3, 9; 47:29-31) Kikuru kukiijuka ngu obwoteera ekirahiro nk’eki, obanorahira omu maiso ga Ruhanga ngu nogenda kubaza amananu. Noyetaaga kuba oyetekaniize kugarukamu omu mananu ekikaguzo kyona ekibarakukaguza.

Enkoragana yaitu na Yahwe habwokuba nkuru muno hali itwe, tusemeriire kusaba n’okwecumitirizaaho ekirahiro kyona ekitusabirwe kuteera, nukwo tukigumye ngu nitwija kwikara twine omuntu ow’omunda omurungi rundi titurukwija kucwa emisingi ya Baibuli. Obworacwamu kuteera ekirahiro, osemeriire kukihikiiriza.​—1 Pet. 2:12.