2 | Okuhuumuzibwa Kuruga omu Byahandiikirwe

BAIBULI EGAMBA: “Byona ebyahandikirwe ira, bikahandikwa obwokwegesa itwe, nukwo tube nokunihira obwokugumisiriza nobwokuhumura okwomu byahandikirwe.”—ABARUMI 15:4.

Eki Nikimanyisa Ki?

Baibuli erumu ebigambo ebituhuumuza kandi ebisobora kutukonyera kugumira enyehurra embi. Obutumwa obuli omu Baibuli butuha okunihira ngu omu kasumi akatali ka hara enyehurra embi niziija kuhwaho.

Eki Kitukonyera Kita?

Itwena haroho obutuhurra twetuntwire; baitu abo abaine oburwaire bw’okwenuuba rundi obw’okwetuntura baraba omu busaasi bunu buli kiro. Baibuli n’esobora kubakonyera eta?

Baibuli erumu ebigambo ebirungi ebitusobora kutekerezaaho. (Abafiripi 4:8) Nibisobora kutuhuumuza n’okutugarramu amaani, kandi bikatukonyera kweyihamu ebitekerezo rundi enyehurra embi.—Zabuli 94:18, 19.
Baibuli n’esobora kutukonyera kuleka kutekereza ngu titwine mugaso.—Luka 12:6, 7.
Omu Baibuli harumu enkarra nyingi ezirukutugumya ngu Ruhanga waitu nayetegereza kurungi omulingo turukwehurramu.—Zabuli 34:18; 1 Yohana 3:19, 20.
Baibuli eraganiza ngu Ruhanga naija kwihaho obusaasi. (Isaya 65:17; Okusuku’rwa 21:4) Obuturukuba nitutalibanizibwa ebitekerezo ebibi n’enyehurra embi, omurago gunu nigusobora kutukonyera kugumiisiriza.

Omulingo Baibuli Ekonyiire Jessica

Omulingo Ntalibanizibwa Okwenuuba

“Obunkaba nyine emyaka 25, badakitaali bakansangamu oburwaire bw’okwenuuba. Naijukaga ebintu ebyampikireho ira kandi byandeteraga obusaasi bw’amaani. Badakitaali bakankonyera kwetegereza ngu oburwaire bwange bukaleetwa kutekerezaaho ebintu ebirukusaaliza ebinarabiremu. Ekindi, oihireho emibazi einatungire, nkaba ninyetaaga obujanjabi obwakunkonyiire kumanyirra n’okurwanisa ebitekerezo ebibi.”

Omulingo Baibuli Enkonyiire

“Okwenuuba kwange obukwayeyongiire, naikaraga ninyekanga, ninyeralikirra kandi mburwa oturo. Omu bwire bw’ekiro natungaga ebitekerezo bingi ebibi ebyandeteraga kweralikirra. Nk’oku Zabuli 94:19 esoborra, Ruhanga n’asobora kutuhuumuza n’okutugumya obutuba twetuntwire muno. Nahabweki naikazaga Baibuli yange n’akatabu akanahandiikamuga Ebyahandiikirwe ebirukungarramu amaani haihi n’ekitabu kyange. Obunaburwaga oturo, nasomaga enkarra kuruga omu Baibuli nukwo nyikirize ebigambo bya Ruhanga kumpumuza.

“Baibuli etugambira kwetantara ebitekerezo ebirukuhakaniza ebitumanyire hali Ruhanga. Kara, nkaba ninkigumya ngu tinyine mugaso, kandi ngu busaho asobora kungonza. Baitu, hati nkimanyire ngu entekereza ya mulingo ogu tehikire, habwokuba Baibuli eyoleka ngu Ruhanga w’okugonza, ali Isiitwe ow’embabazi kandi ngu afaaho buli omu hali itwe. Mporampora nkatandika kulema ebitekerezo byange, omu kiikaro ky’okubiikiriza kundema. Nyegere kwerora nk’oku Ruhanga andora. Runu rukaba rutambu orw’amaani orwankonyiire kuleka kwerora nk’ow’ataine mugaso.

“Ndindiriire akasumi nambere ebitekerezo byona ebirukusaaliza n’ebitekerezo ebibi obubiriba bitakyaroho. Kukimanya ngu oburwaire bw’omutwe bulihika buhwereho kimu kinkonyera kugumiisiriza, nindindirra omurago ogw’omu kasumi ak’omumaiso nambere oburwaire bw’okwenuuba buliba butakyaroho.”