Omulingo Osobora Kukonyera Abaine Oburwaire bw’Omutwe

Eki Nikimanyisa Ki?

N’osobora kutamanya eky’okukora kakuba munywani wawe aba natalibanizibwa oburwaire bw’omutwe. Baitu nitusobora kwoleka ngu nitumufaaho kuraba omu kumukonyera kubugumira. Omu mulingo ki?

Eki Kitukonyera Kita?

“Omuntu arahukege okuhurra.”—YAKOBO 1:19.

Omulingo ogurukukirayo oburungi ogw’okukonyera munywani wawe nukwo kumuhuliiriza obwarukuba n’agonza kubaza. Otatekereza ngu naiwe oine kugira ekiwabaza. Mwoleke ngu nohuliiriza kurungi kandi ngu n’omufaaho. Lengaho kwetegereza ebyarukukugambira kandi otamucwera omusango. Ijuka ngu n’asobora kubaza ebintu ebyatarukumanyisa rundi ebyarayeyijukya hanyuma.—Yobu 6:2, 3.

‘Mwekambise.’—1 ABASESALONIKA 5:14.

Munywani wawe n’asobora kuba ayetuntwire, rundi nayehurra ngu taine mugaso. Baitu kakuba omwoleka ngu n’omufaaho, naija kuhurra ahuumuziibwe kandi agarwirwemu amaani n’obworukuba otamanyire ekyokumugambira.

“Enganjani negonza obusumi bwona.”—ENFUMO 17:17.

Gira ekiwakora kumukonyera. Omu kiikaro kyokutekereza ngu omanyire omulingo oramukonyeramu, mukaguze eky’osobora kukora kumukonyera. Obukiramugumira kukusoborra ekyarukugonza, lengaho kumugambira bimu ha bintu ebimusobora kukora hamu nk’okugenda kurubataho hamu. Rundi n’osobora kumukonyera kugenda okamugurra ebintu, kuyonja enju rundi kumukorra omulimo ogundi.—Abagaratiya 6:2.

“Mugumisirizege.”—1 ABASESALONIKA 5:14.

Obwire obumu munywani wawe n’asobora kuba atarukugonza kubaza. N’osobora kumugambira ngu obwaraaba nagonza kubaza, oyetekaniize kumuhuliiriza. Oburwaire nibusobora kumuleetera kubaza rundi kukora ebintu ebirakusaaliza. N’asobora kusazamu entekaniza ezimubaire mukozere hamu rundi akubalize kubi. Ba muntu arukugumiisiriza kandi arukwetegereza obworaaba n’omukonyera.—Enfumo 18:24.

Obukonyezi Bwawe Nibusobora Kumuleetera Kwehurra Kurungi

“Nyikara nyetekaniize kumuha obwire. N’obukiraaba ngu tinsobora kumaraho ebizibu bye, ntekaho muno omutima kuhuliriiza obwarukuba nambaliza. Obwire obumu omuntu ekyaba nayetaaga nukwo kumuhuliiriza nukwo ayehurre kurungi.”—Farrah,a ow’aine omunywani arukutalibanizibwa oburwaire bw’omutwe.

“Omu h’abanywani bange angarramu muno amaani. Akandaliza muka ye tuliire hamu ekiihuro. Nkamugambira omulingo nkaba ninyehurra omu nyikara egi etekaine. Eki mali kikangarramu muno amaani!”—Ha-eun, ow’atalibanizibwa oburwaire bw’okwenuuba.

“Kugumiisiriza kikuru muno. Mukazi wange obwakora ekintu ekirukumbihiza, nyijuka ngu oburwaire nubwo bumuletiire kukikora habwokuba tinukwo ali. Kinu kinkonyera kuleka kubiihirwa kandi kindetera kweyongera kumwoleka embabazi.”—Jacob, ow’aine omukazi arukutalibanizibwa oburwaire bw’okwenuuba.

“Mukazi wange ansagika kandi ampumuza muno. Obumba nyetuntwire muno, tampambiriza kukora ekintu ekintarukugonza. Eki nikimanyisa ngu obwire obumu takora ekintu ekiyakugondeze kukora. Mali nimugonza muno habw’omutima ogw’okwefereza n’okunfaaho.”—Enrico, ow’aine oburwaire bw’okwetuntura ekihinguraine.